.jpg)
លោកអាជ្ញាកណ្តាល បានលើកដៃ យ៉ន ពិសី ឲ្យឈ្នះ ឡុង ខេត្ត នៅក្រោយការប្រកួត៥ទឹកពេញ បានបញ្ចប់។ រូប យឺន ពន្លក
ភ្នំពេញ៖ កីឡាករ យ៉ន ពិសី បានរកឃើញជ័យជម្នះយ៉ាងសំខាន់លើ ឡុង ខេត្ត ដើម្បីឡើងទៅកាន់ការប្រកួតវគ្គផ្តាច់ព្រ័ត្រ ដោយត្រូវប្រឈមជាមួយជើងខ្លាំង រិន ដាវីត ដណ្តើមយកពាន និងប្រាក់រង្វាន់សរុបចំនួន ៤០០០ ដុល្លារ។ ចំណែក ឡុង ខេត្ត ត្រូវធ្លាក់ទៅប្រកួតដណ្តើមយកលេខ៣ ជាមួយអ្នកប្រយុទ្ធ ធន់ អៀនឡៃ។
យ៉ាងណាក៏ដោយ នៅក្រោយការប្រកួតយ៉ាងស្វិតស្វាញ ចំនួន ៣ ទឹកនោះ កីឡាករ ឡុង ខេត្ត ទំនងដូចជាមិនអស់ចិត្ត សម្រាប់ការសម្រេចឲ្យចាញ់ យ៉ន ពិសី ដោយពិន្ទុជាឯកច្ឆន្ទ ៥-០ ប៉ុន្តែទាំងគ្រូ និងសិស្ស គ្មានការតវ៉ាជាផ្លូវការណាមួយនោះឡើយ។ ចំណែក យ៉ន ពិសី បានបង្ហាញការសប្បាយរីករាយខ្លាំង ចំពោះការរកឃើញជ័យជម្នះយ៉ាងសំខាន់នេះ។
សិស្សគណក្លិបសាលវ័ន្តកីឡា យ៉ន ពិសី បាននិយាយថា៖ «ខ្ញុំសប្បាយចិត្ត ព្រោះខ្ញុំឈ្នះនេះ ពិតជាលំបាកណាស់។ ខ្ញុំមានទំនុកចិត្តឈ្នះពេលប្រកួតដល់ទឹកទី ៣ ព្រោះខ្ញុំឃើញ ឡុង ខេត្ត ចាប់ផ្តើមស្រុតចុះ ហើយគាត់វ៉ៃចូលខ្ញុំ មិនសូវចំគោលដៅល្អ និងមានទម្ងន់ស្រាលៗ»។
យោងតាមរូបមន្តប្រកួតគឺ យ៉ន ពិសី នឹងត្រូវឡើងទៅប្រកួតជាមួយ រិន ដាវីត ដណ្តើមយកលេខ ១ ចំណែក ឡុង ខេត្ត ត្រូវប្រកួតជាមួយ ធន់ អៀនឡៃ ដណ្តើមយកលេខ ៣ ។ ចំពោះប្រាក់រង្វាន់វិញ ម្ចាស់ជើងឯកលេខ ១ នឹងទទួលបានរង្វាន់ ៤០០០ ដុល្លារ អ្នកលេខ ២ បាន ២០០០ ដុល្លារ អ្នកលេខ៣ បាន ៧៥០ ដុល្លារ ហើយអ្នកបានចំណាត់ថ្នាក់លេខ ៤ នឹងទទួលបាន ៥០០ ដុល្លារ។
លោក ញាន សុធី ជំនួយការរៀបចំ ការប្រកួតសង្វៀនប៉ុស្តិ៍លេខ ៥ បាននិយាយថា៖ «យ៉ន ពិសី មានប្រៀបផ្នែកកម្លាំងនៅល្អជាង និងវាយតិច តែចូលគោលដៅល្អជាង ចំណែក ឡុង ខេត្ត វាយចេញបានច្រើន មិនសូវចំគោលដៅ និងមានកម្លាំងធ្លាក់ចុះ នៅចុងទឹក ជាមូលហេតុនាំឲ្យចាញ់។ យ៉ាងណាក៏ដោយ ការផ្តល់ពិន្ទុមានតែចៅក្រមប៉ុណ្ណោះ ដែលមានបច្ចេកទេស និងទទួលខុសត្រូវជាផ្លូវការ»។
ចំពោះគូប្រកួតក្រៅព្រឹត្តិការណ៍ ពានរង្វាន់វិញ អ្នកប្រដាល់ ថៃ រ៉េត បានប្រកួតឈ្នះអ្នកប្រដាល់ជើងចាស់ គង់ សំបូរ ដោយពិន្ទុទាំងជក់ចិត្ត។ ជ័យជម្នះមួយនេះ បានធ្វើឲ្យ ថៃ រ៉េត មានឈ្មោះបោះសំឡេង កាន់តែល្បី ក្នុងប្រភេទទម្ងន់ ៦៣,៥គីឡូក្រាម។
មុនពេលប្រកួតចាប់ផ្ដើម មហាជនមានជំនឿចិត្តថា គង់ សំបូរ ជាអ្នកមានប្រៀបឈ្នះខ្ពស់ប៉ុន្តែពេលប្រកួតជាក់ស្តែង គឺគ្រាន់តែទឹកទី១ ចាប់ផ្ដើម ថៃ រ៉េត បានវាយបង្ក្រាបទៅលើ គង់ សំបូរ ដោយស្នៀតជង្គង់ កែង កណ្តាប់ដៃ បានយ៉ាងល្អ ខណៈដែល គង់ សំបូរ ល្អទាត់មកវិញផងដែរ តែមិនអាចមានប្រៀបជាង ថៃ រ៉េត ឡើយ។ ក្នុងជំនួបប្រកួតចំនួន ៥ ទឹកពេញ ថៃ រ៉េត និង គង់ សំបូរ ធ្វើឲ្យអ្នកទស្សនាពេញចិត្តខ្លាំង ជាគូប្រកួត ដែលមានសមត្ថភាពល្អជល់ចិត្ត៕
