ភ្នំពេញ៖ កីឡាករ យ៉ន ពិសី មកពីក្លិបសាលវ័ន្តកីឡា និង រ៉ា រយ៉ា របស់ក្លិបអេភូថង នឹងត្រូវប្រកួតប្រជែងគ្នាយកកៅអីទី ៨ ចុងក្រោយ នៅយប់ថ្ងៃសៅរ៍នេះ ដើម្បីឡើងទៅកាន់ការប្រកួតវគ្គទី២ ឬវគ្គ ៨ នាក់ចុងក្រោយនៃព្រឹត្តិការណ៍ជើងឯក TV5 Knock Out Series ក្នុងប្រភេទទម្ងន់ ៥៤ គីឡូក្រាម ជាមួយជើងខ្លាំងៗចំនួន ៧ នាក់ទៀត ដែលបានឆ្លងផុតការប្រកួតជម្រុះវគ្គទី១ នេះរួចហើយ។
ការប្រកួតគ្នារវាងអ្នកប្រដាល់ យ៉ន ពិសី និង រ៉ា រយ៉ា នេះ ជាប្រភេទកីឡាករជើងថ្មីជំនាន់ក្រោយ មានបទពិសោធតិច ប៉ុន្តែមានភាពស្រួចស្រាល់ និងមានឆន្ទៈចូលវាយសម្រុកខ្លាំងទំនងផ្សងសំណាងជាមួយជើងខ្លាំងដូចគ្នា។ ទោះជាយ៉ាងណា សម្រាប់កៅអីវគ្គទី២ នេះ នឹងផ្តល់ជូនអ្នកឈ្នះតែម្នាក់គត់ ដើម្បីបង្គ្រប់ចំនួនប្រកួតក្នុងវគ្គទី២ ទៀត ដែលកំណត់តាមរូបមន្តចំនួនតែ ៨ នាក់ប៉ុណ្ណោះ។
លោក ឡុង សាលវ័ន្ត គ្រូជម្រើសជាតិ និងជាគ្រូបង្វឹករបស់ យ៉ន ពិសី បានប្រាប់ ភ្នំពេញ ប៉ុស្តិ៍ ថា៖ «យ៉ន ពិសី មិនមែនជាកីឡាករជើងថ្មីពេកទេ ព្រោះបើនិយាយពីការហ្វឹកហាត់វិញ តាំងពីជំនាន់កីឡាករ ឡុង សំណាង ឯណោះ ប៉ុន្តែការហ្វឹកហាត់របស់គេ មិនបានជាប់លាប់ ដោយភាគច្រើនហាត់ឈប់ៗ»។
លោក សាលវ័ន្ត បានបន្តថា៖ «អ្នកទាំង ២ នេះ មិនធ្លាប់ជួបគ្នានោះទេ។ ខ្ញុំគិតថា សម្រាប់ជំនួបប្រកួតនេះ ខ្ញុំមានទំនុកចិត្តត្រឹម ៦០ ភាគរយ ព្រោះកម្រិតរបស់ពួកគេនៅតែមិនទាន់ឈានចូលលំដាប់ជួរមុខនៅឡើយទេ ហើយម៉្យាងវិញទៀត អាចនឹងឆាប់ដឹងពីលទ្ធផលចាញ់ ឬឈ្នះដោយលំបាកទស្សន៍ទាយណាស់ ដោយសារវាវាយសម្រុកខ្លាំងដូចគ្នា»។
ចំណែកលោក អេ ភូថង គ្រូបង្វឹករបស់កីឡាករ រ៉ា រយ៉ា មិនអាចសុំសម្ភាសបានទេ ដោយទូរស័ព្ទរបស់លោកគ្មានអ្នកទទួល គឺចុចបិទជាច្រើនលើក ក្នុងពេលហៅចូល។ ទោះជាយ៉ាងណា លោក ញាន សុធី ជំនួយការអ្នករៀបចំផ្គូផ្គងប្រចាំសង្វៀនប៉ុស្តិ៍លេខ ៥ បានប្រាប់ថា៖ «កីឡាករ រ៉ា រយ៉ា នេះ ប្រកួតចិត្តធំគ្រាន់បើ»។
លោក ញាន សុធី បានបន្ថែមថា៖ «តាមខ្ញុំស្រង់ពីប្រវត្តិប្រកួត គឺ រ៉ា រយ៉ា មានកម្ពស់ ១,៦៣ ម៉ែត្រ ធ្លាប់ប្រកួតបាន ២៥ ដង ឈ្នះ ១៥ ចាញ់ ៧ និងស្មើ ៣ ដង។ ចំណែកកីឡាករ យ៉ន ពិសី ប្រកួតបាន ៣៧ ដង ឈ្នះ ២៧ ចាញ់ ៧ និងស្មើ ៣ ដង។ គូនេះ ពិតជាលំបាកវាយតម្លៃ ឬព្យាករណាស់ ព្រោះជើងថ្មីវ៉ៃមិនចេះសំចៃកម្លាំងទេ អ៊ីចឹងបើវ៉ៃចំគោលដៅល្អ ងាយនឹងសន្លប់ដូចគ្នា»។
ក្រៅពីគូដណ្តើមពាននេះ កីឡាករ សេក ចៅជូត មកពីក្លិបអង្គរជ័យខេត្តសៀមរាប ត្រូវប្រកួតមិត្តភាពជាមួយជើងចាស់ សៀវ ង៉ុយ របស់សមាគមកីឡាប្រដាល់កងយោធពលខេមរភូមិន្ទក្នុងប្រភេទ ៦០ គីឡូក្រាម។ ចៅជូត ជាកីឡាករជើងថ្មី បទពិសោធខ្ចីជាង ខណៈ សៀវ ង៉ុយ ចាស់វស្សា ប៉ុន្តែអ្នកប្រដាល់រូបនេះ ប្រកួតធ្លាក់ចុះមួយកម្រិតទៅហើយ។ ចំណែកជើងចាស់ទម្ងន់ធ្ងន់ ធា នុរាជ ក្លិបមកុដរាជសីហ៍ ត្រូវប៉ះកីឡាករចាស់វស្សាបាត់មុខយូរ ផាន់ សុវណ្ណ របស់ក្លិបចតុមុខ ក្នុងប្រភេទទម្ងន់ ៦៥ គីឡូក្រាម៕