.jpg)
កីឡាការិនី អេ យ៉ានុត (ស្តាំ) នឹងត្រូវប្រកួតជាមួយកីឡាការិនី Miam Sabot របស់អុីតាលី។ រូបថត សហការី
ភ្នំពេញ៖ កីឡាការិនី អេ យ៉ានុត និងជើងខ្លាំងកំពុងមានភាពលេច ធ្លោរ វង្ស វិឆ័យ សុទ្ធតែមិនហ៊ានអះអាងពីភាពប្រាកដប្រជាក្នុងការយកឈ្នះលើដៃគូប្រកួតជាជនបរទេស ខណៈអ្នកទាំង ២ ត្រូវឡើងប្រកួតក្នុងព្រឹត្តិការណ៍ Mas Fight ដែលត្រូវវ៉ៃ ៩ នាទី អត់ឈប់នៅលើសង្វៀនថោននាល្ងាចថ្ងៃអាទិត្យនេះ។
ទាក់ទងទៅនឹងការប្រកួតនេះ លោក MC Vutha អ្នកគ្រប់គ្រងបញ្ជីឈ្មោះ និងប្រវត្តិរូបកីឡាករប្រចាំសង្វៀនថោន Mas Fight បានប្រាប់ភ្នំពេញប៉ុស្តិ៍ថា សមាសភាពអ្នកប្រដាល់នៅក្នុងសង្វៀនថោន Mas Fight សប្តាហ៍នេះ មានគូដែលមានប្រជាប្រិយបំផុត គឺជំនួបរវាង វង្ស វិឆ័យ និងអ្នកប្រដាល់ថៃ Lotus Sgg ក្នុងទម្ងន់ ៦៧ គីឡូក្រាម ព្រមទាំងគូរវាងកីឡាការិនីឆ្នើមរបស់កម្ពុជា អេ យ៉ានុត និងជើងខ្លាំងមកពីអ៊ីតាលី Miam sabot ដោយអ្នកទាំង ២ ប្រកួតគ្នាក្នុងទម្ងន់ ៥៧ គ.ក្រ។
ការប្រកួតរបស់ វង្ស វិឆ័យ កាលពីឆ្នាំ ២០១៩ កន្លងមកនេះ ទទួលបានជ័យជម្នះ ស្ទើរគ្រប់ពេល ពិសេសព្រឹត្តិការណ៍ធំចំនួន ៣ ធំៗ គឺជម្រើសជើងឯក ឆ្នាំ ២០១៩ ព្រមទាំងឈ្នះខ្សែក្រវាត់ចំនួន ២ ស្ថាប័ន មកគ្រប់គ្រងក្នុងនោះជើងខ្លាំងៗមួយចំនួនក៏បរាជ័យជាបន្តបន្ទាប់ក្រោមសមត្ថភាពរបស់គេដែរ។
យ៉ាងណាក៏ដោយ ការហត់ចូលមកប្រកួតក្នុងកមុ្មវិធី Mas Fight ដែលមានតែ ១ ទឹកចំនួន ៩ នាទីនេះ ជាការប្រកួតថ្មីសម្រាប់ វង្ស វិឆ័យ ខណៈសមត្ថភាពរបស់រូបនេះ ល្អជង្គង់ និងកែង និងមានកម្ពស់ល្អផងដែរ។ វង្ស វិឆ័យ និយាយថា៖ «មិនធ្លាប់ជួបប្រកួតគ្នាជាមួយកីឡាថៃនេះ ពីមុនមកទេ ហេតុនេះមិនទាន់ហ៊ានអះអាងថា យ៉ាងដូចម៉េចឡើយ ប៉ុន្តែចំពោះខ្ញុំឲ្យតេឡើងដល់លើសង្វៀនដឹងតែពីវ៉ៃតែម្តង»។
បើតាមលោក MC Vutha បានឲ្យដឹងថា កីឡាករថៃ Lotus Sgg មិនធម្មតាទេ គឺគេមានកម្ពស់ ១,៧៦ ម៉ែត្រ ធ្លាប់ប្រកួតបាន ១៣៦ ដង ឈ្នះ ៨៩ ចាញ់ ៣៩ ស្មើ ៨ ដង ក្នុងនោះផ្តួលដៃគូឲ្យសន្លប់ ៣០ ដង ហើយតាមទិន្នន័យនេះ សមត្ថភាពរបស់ វង្ស វិឆ័យ និង Lotus Sgg សុទ្ធតែបង្ហាញពីភាពខ្លាំងដូចគ្នា ហេតុនេះការចាញ់ ឬឈ្នះ ស្ថិតនៅក្នុងលក្ខណៈតឹងតែងបំផុត។
លោក ស្រ៊ុន កុសល ប្រធាន ផ្គូផ្គង និងគ្រប់គ្រងកម្មវិធី Mas Fight និយាយថា កីឡាករដែលលោកបាននាំមកប្រកួត គឺមានសមត្ថភាពខ្ពស់ហើយដាក់ឲ្យប្រកួតក្នុងតម្លាភាព បញ្ចេញអស់នូវសមត្ថភាព ព្រមទាំងធានាបាននូវការឃុបឃឹតគ្នាក្នុងទីផ្សារងងឹត ដែលអាចលេចចេញនូវអំពើមិនប្រក្រតីណាមួយ។ លោកបញ្ជាក់ថា៖ «និយាយទៅ យើងមិនមែនយកកីឡាករបរទេសអន់ៗ មកឲ្យកីឡាករខ្មែរស៊ីផុយ ហើយនាំគ្នាទះដៃជ័យយោៗថាខ្មែរខ្លាំងនោះឡើយ»។
ចំណែកគូប្រកួតរបស់កីឡាការិនី អេ យ៉ានុត Miam Sabot ជាអ្នកប្រដាល់ឆ្នើម ធ្លាប់ឈ្នះខ្សែក្រវាត់នៅប៉ុស្តិ៍លេខ ៨ ថៃកន្លងមក។ Miam Sabot កម្ពស់ខ្ពស់ជាង ១,៧២ ម៉ែត្រ ហើយធ្លាប់ប្រកួតបាន ៦២ ឈ្នះ ៤០ និងចាញ់ ២២ ដង។ ចំណែក អេ យ៉ានុត កូនស្រីរបស់លោក អេ ភូថង គឺមួយរយៈនេះ យូរៗបានប្រកួតម្តង ប៉ុន្តែ ៤ ប្រកួតចុងក្រោយ យ៉ានុត មិនដែលចាញ់នោះឡើយ។
អ្នកស្រី សាំង សុម៉ាលី ជាម្តាយបង្កើតរបស់ អេ យ៉ានុត បានប្រាប់ភ្នំពេញប៉ុស្តិ៍ថា៖ «ការហ្វឹកហាត់ត្រៀមរបស់ យ៉ានុត បានល្អ តែសង្ឃឹមបានត្រឹមស្មើទេ ព្រោះការប្រកួតចំនួន ៩ នាទីនេះ មិនធ្លាប់ប្រកួតទេ ហើយការវាយដៃគូឲ្យសន្លប់ គឺជារឿងលំបាកណាស់ អ៊ីចឹងខ្ញុំគិតថា យ៉ានុត អាចនឹងស្មើច្រើនជាង។ ទោះជាយ៉ាងណា ក្តីប្រាថ្នារបស់ខ្ញុំ និងកូន ព្រមទាំងគ្រួសារ គឺចង់ទទួលបានជ័យជម្នះខ្លាំងណាស់»។
ជាមួយគ្នានេះ កីឡាករកម្ពុជា ៣ នាក់ទៀត ក៏ត្រូវប្រកួតក្នុងកម្មវិធី Mas Fight នៅថ្ងៃអាទិត្យនេះដែរ ក្នុងនោះ សួរ ចាន់រាជ ប៉ះម៉ាឡេស៊ី Puvan Balasubramanian ឯ ឈួន រិទ្ធី (ថៃ រីទ្ធី) ជួប Ahmed Badat មកពី Zambiam ហើយ មុត ខ្លឹមខ្មៅ ប្រកួតនឹងចិន Lyu JIE៕
