.jpg)
កីឡាករ លឹម ផល្លា ទទួលបានចំណាត់ថ្នាក់លេខ១ ប្រចាំមណ្ឌលខេត្តបាត់ដំបង។ ស្រេង ម៉េងស្រ៊ុន
ភ្នំពេញៈ បេសកកម្មប្រកួតជម្រុះរកជើងខ្លាំង ចំនួន ៣ ប្រចាំនៅមណ្ឌលខេត្តបាត់ដំបង ដែលមានបេក្ខជនមកពីខេត្តបាត់ដំបង ខេត្តប៉ៃលិន និងខេត្តពោធិ៍សាត់ ចូលរួមប្រកួតប្រជែងនោះ បានរកឃើញអ្នកឈ្នះហើយ ដើម្បីឡើងទៅប្រកួតជ្រើសរើសជើងឯកថ្នាក់ជាតិ ឆ្នាំ ២០១៨ ជាមួយជើងខ្លាំងចំនួន ២១ នាក់តំណាងឲ្យមណ្ឌលចំនួន ៦ ទៀត ដែលបានបញ្ចប់ការប្រកួតរួចរាល់កន្លងមក។
លោក ឈាវ បូរ៉ា អគ្គលេខាធិការសហព័ន្ធកីឡាអុកចត្រង្គកម្ពុជា បានប្រាប់ កាលពីព្រឹកថ្ងៃអង្គារនេះថា ការប្រកួតនៅមណ្ឌលខេត្តបាត់ដំបងនេះ មានបេក្ខជនដាក់ពាក្យចូលរួមប្រកួតប្រជែងចំនួន ២៥ នាក់ មកពី ៣ ខេត្ត ហើយត្រូវប្រកួតជម្រុះយកជើងខ្លាំងតែ ៣ នាក់ទេ ដើម្បីឡើងទៅប្រកួតនៅវគ្គបន្ត។
តាមរយៈការប្រកួតប្រជែង ដែលត្រូវបានធ្វើឡើងត្រឹម ១ ថ្ងៃ គឺកាលពីថ្ងៃអាទិត្យ កន្លងមកនេះ កីឡាករ លឹម ផល្លា របស់ខេត្តប៉ៃលិន ដែលធ្លាប់បង្កើតភាពភ្ញាក់ផ្អើល ក្នុងការប្រកួតថ្នាក់ជាតិ កាលពីឆ្នាំ ២០១៧ បានទទួលចំណាត់ថ្នាក់លេខ ១ ហើយលេខ ២ បានទៅកីឡាករ ឃុត ប្រិមប្រិយ៍ មកពីខេត្តប៉ៃលិនដែរ និងលេខ ៣ បានទៅកីឡាករ កាំង ហេង មកពីខេត្តបាត់ដំបង។
ជាមួយនឹងជ័យជម្នះនេះ បានធ្វើឲ្យគេនឹកឃើញទៅដល់ភាពខ្លាំងរបស់កីឡាករ លឹមផល្លា និង កាំង ហេង ព្រោះអ្នកទាំង ២ នេះ សុទ្ធតែទទួលបានលទ្ធផលល្អ ក្នុងការប្រកួតជ្រើសរើសជើងឯកថ្នាក់ជាតិ កាលពីឆ្នាំ ២០១៧ ដើម្បីក្លាយជាបេក្ខភាព ៨ នាក់ចុងក្រោយ ត្រូវឡើងទៅប្រកួតយកតំណែងស្តេចអុក នៅអង្គរសង្រ្កាន្ត ប៉ុន្តែអ្នកទាំង ២ នេះ មិនទទួលបានជយលាភីនោះទេ។
លោក គ្រួច ចន្ថារិទ្ធ ហៅ ត្រេន គណៈកម្មការរៀបចំអុកចត្រង្គកម្ពុជា បានប្រាប់ថា ការប្រកួតជម្រុះតាមមណ្ឌលចំនួន ៧ គឺនៅបាត់ដំបងនេះ ជាមណ្ឌលចុងក្រោយគេ ហើយនៅថ្ងៃអាទិត្យ ទី ៨ ខែមេសា ឆ្នាំ ២០១៨ ខាងមុខនេះ យើងនឹងបន្តរៀបចំការប្រកួតជ្រើសរើសជើងឯកថ្នាក់ជាតិ នៅទីស្នាក់ការគណៈកម្មាធិការជាតិអូឡាំពិកកម្ពុជា ដើម្បីជម្រុះយកជើងខ្លាំង ៨ នាក់ ឡើងទៅប្រកួតប្រជែងយកតំណែងស្តេចអុក ប្រចាំឆ្នាំ ២០១៨ នៅអង្គរសង្រ្កាន្ត នាថ្ងៃចូលឆ្នាំប្រពៃណីជាតិខ្មែរ ខាងមុខនេះ។
កីឡាករ ឃុត ប្រិមប្រិយ៍ (ពីឆ្វេង) លឹម ផល្លា និងកីឡាករ កាំង ហេង ពេលបំពាក់មេដាយ ក្រោយឈ្នះការប្រកួត នៅមណ្ឌលខេត្តបាត់ដំបង។ រូប សហការី
គួររំឭកថា ក្នុងចំណោមអ្នកលេងអុកចត្រង្គទាំង ២៤ នាក់ ដែលឈ្នះតាមមណ្ឌលទាំង ៧ ទូទាំងប្រទេសកម្ពុជានេះ ត្រូវបានគេកត់សម្គាល់ឃើញថា មានវត្តមានជើងខ្លាំងៗជិត ១០ នាក់ ដែលធ្លាប់ទទួលបានចំណាត់ថ្នាក់ល្អ នាពេលកន្លងមក ហើយអ្នកទាំងនោះមានដូចជា ឈាវ បូរ៉ា ម្ចាស់ជើងឯក២ជំនាន់ ឆយ វីរ៉ា ជើងឯកឆ្នាំ ២០១០ ហូយ សូណា ជើងឯកឆ្នាំ ២០១៦ ហេង សៅឌី ជើងឯកឆ្នាំ ២០១៧ ព្រមទាំង កាំង ហេង, ប៊ិន គាសេង, សុខ លឹមហេង, ប៉ោ សារិទ្ធ និង លឹម ផល្លា ជាដើម ដែលសុទ្ធតែធ្លាប់ជាប់ឈ្មោះជាជើងខ្លាំង៨នាក់ចុងក្រោយ៕
