The Phnom Penh Post Search

Search form

រដ្ឋបាល​កីឡា ផ្តល់នូវ​វគ្គ​បំប៉ន​ជូន​មន្ត្រី​ពាក់ព័ន្ធ​ជិត ១០០ នាក់

Content image - Phnom Penh Post
លោក​វ៉ាត់ ចំរើន (កណ្តាល) និង​លោក Ken Gadaffi (ស្តាំ) ក្នុង​វគ្គ​បណ្តុះ​បណ្តាល​ នៅ​គណៈកម្មាធិការ​ជាតិ​អូឡាំ​ពិក​កម្ពុជា​។ ស្រេង ម៉េងស្រ៊ុន

រដ្ឋបាល​កីឡា ផ្តល់នូវ​វគ្គ​បំប៉ន​ជូន​មន្ត្រី​ពាក់ព័ន្ធ​ជិត ១០០ នាក់

ភ្នំពេញ: គណៈកម្មាធិការ​ជាតិ​អូឡាំពិក​កម្ពុជា (NOCC) និង​អង្គការ​សាមគ្គី​អូឡាំពិក (OS) បាន​បើក​សិក្ខាសាលា​ផ្តល់​ជូន​មន្ត្រី​ពាក់ព័ន្ធ​ទៅ​នឹង​សកម្មភាព​កីឡា​ជិត ១០០ នាក់​មក​ពី ២១ សហព័ន្ធ​ជាតិ និង​ស្ថាប័ន​កីឡា ក៏ដូចជា​អ្នក​យក​ព័ត៌មាន​ផ្នែក​កីឡា​ចំនួន ៤១ នាក់​ផងដែរ។

សិក្ខាសាលា​នេះ​ធ្វើ​ឡើង​នៅ​ទីស្នាក់ការ​គណៈកម្មាធិការ​ជាតិ​អូឡាំពិក​កម្ពុជា ចាប់​ពី​ថ្ងៃ ១១ ដល់​ទី ១៤ ខែ​តុលា ឆ្នាំ ២០១៧ ដោយ​មាន​វាគ្មិន​ជំនាញ​សំខាន់ៗ​ដូចជា​លោក​វ៉ាត់ ចំរើន អគ្គលេខាធិការ NOCC លោក Ken Gadaffi ទីប្រឹក្សា​អម NOCC លោក​ជា ច័ន្ទ​បរិបូណ៍ រដ្ឋលេខាធិការ​ក្រសួង​ព័ត៌មាន វេជ្ជបណ្ឌិត​ស្តើង ជា អនុគណៈកម្មការ​សុខាភិបាល​អម NOCC លោក​ច័ន្ទ សំណព្វ អ្នកជំនាញ​អក្សរសាស្ត្រ​មកពី​ទីស្តីការ​គណៈរដ្ឋមន្ត្រី​ដើម្បី​ធ្វើបទ​បង្ហាញជូន​សិក្ខាកាម។

លោក​វ៉ាត់ ចំរើន មាន​ប្រសាសន៍​ថា៖ «វគ្គ​សិក្ខាសាលា​នេះ​ជា​កម្មវិធី​ប្រចាំ​ឆ្នាំ​មួយ​របស់​គណៈកម្មាធិការ​ជាតិ​អូឡាំពិក​កម្ពុជា ហើយ​កម្មវិធី​នេះជា​គំនិត​ផ្តួចផ្តើម​របស់​ឯកឧត្តម​ថោង ខុន ប្រធាន NOCC ព្រមទាំង​មានការ​គាំទ្រ​ពី​ក្រសួង​អប់រំ យុវជន និង​កីឡា និង​អ្នកជំនាញ​ជាច្រើន ដែល​នឹង​ផ្តល់​ជូន​ដល់​សិក្ខាកាម​នូវ​សារៈ​សំខាន់ៗ ដើម្បី​អភិវឌ្ឍ​ក្នុង​វិស័យ​កីឡា ក្នុង​នោះ​មាន​បញ្ហា​ពាក់ព័ន្ធ​ទៅ​នឹង​បច្ចេកទេស សុខភាព តម្លាភាព ការគ្រប់គ្រង​សហព័ន្ធ​កីឡា​ជាតិ ភាព​ជាអ្នក​ដឹកនាំ ព្រមទាំង​ប្រភព​ចំណូល និង​ចំណាយ​ឲ្យ​មាន​តម្លាភាព​ដល់​ម្ចាស់​ជំនួយ»។

យោងតាម​កម្មវិធីសិក្សា​នូវ​មេរៀន​សំខាន់ៗ​ចំនួន ៣ ថ្ងៃ​ដែល​ភ្នំពេញ ប៉ុស្តិ៍ ទទួល​បាន​នោះ គឺ​នៅ​ថ្ងៃទី ១ លោក វ៉ាត់ ចំរើន ឡើង​ធ្វើ​វាគ្មិន​ស្តីពី​ផែនការ​យុទ្ធសាស្ត្រ​សហព័ន្ធ​កីឡា​ជាតិ និង​បទដ្ឋាន​កីឡា​ផ្សេងៗ ព្រមទាំង​ភាពជា​អ្នកដឹកនាំ។

លោក Ken Gadaffi ឡើង​ធ្វើ​វាគ្មិន​ពី​រចនាសម្ព័ន្ធ​កីឡា និង​អភិបាលកិច្ច​ល្អ ហើយ​លោក ច័ន្ទ​បរិបូណ៍ ឡើង​ធ្វើ​វាគ្មិន​លើ​ក្រមសីលធម៌​វិជ្ជាជីវៈ​សារព័ត៌មាន ពិសេស​ផ្តោត​ទៅ​លើ​អ្នកព័ត៌មាន​កីឡា។

ចំណែក​ថ្ងៃទី ២ តំណាង​អគ្គនាយកដ្ឋាន​កីឡា​នៃ​ក្រសួង​អប់រំ យុវជន និង​កីឡា ឡើង​ធ្វើបទ​បង្ហាញ​ពី​នីតិវិធី និង​យន្តការ​ហិរញ្ញប្បទាន និង​យន្តការ​គ្រប់គ្រង​សាច់​ប្រាក់​ដល់​សហព័ន្ធ​កីឡា​ជាតិ។ នៅ​ថ្ងៃទី ៣ លោក​វេជ្ជបណ្ឌិត​ស្តើង ជា ឡើង​ធ្វើ​បទ​បង្ហាញ​ពីការ​ប្រើប្រាស់ និង​ការហាម​ឃាត់​នៃការ​ប្រើប្រាស់​សារធាតុ​ជំនួយ​កម្លាំង (Doping)។

នៅ​ក្នុង​ថ្ងៃ​បើក​សិក្សា​សាលា​ថ្ងៃ​ដំបូង​លោក​វ៉ាត់ ចំរើន បាន​បើក​ឲ្យ​មាន​វេទិកា​លើក​ជា​យោបល់​ពី​សិក្ខាកាម​ទាំងអស់​ដើម្បី​គ្រោង​បង្កើត​ឲ្យ​មាន​ស្ថាប័ន​សុខភាព​មួយ​ដើម្បី​ថែទាំ និង​ព្យាបាល​កីឡាករ-កីឡាការិនី​កម្រិត​ខ្ពស់ ខណៈ​ដែល​សិក្ខាកាម​ទាំងអស់​បាន​មាន​មតិ​គាំទ្រ​នូវ​គំនិត​ថ្មី​នេះ៕

អត្ថបទគួរចាប់អារម្មណ៍

  • សណ្ឋាគារ​ប្រណីត​នៅ​កោះរ៉ុង បើក​ជា​ផ្លូវការ

    ភ្នំពេញៈ សណ្ឋាគារ​ដ៏ប្រណីត Royal Sands នៅលើ​កោះរ៉ុង​របស់​លោក គិត ម៉េង បាន​បើក​ដំណើរការ​ជា​ផ្លូវការ​កាលពី​ថ្ងៃ​ម្សិលមិញ ដែល​គេ​រំពឹង​ថា​នឹង​ទាក់ទាញ​ភ្ញៀវទេសចរ​កាន់តែ​ច្រើន​។

  • ដំរី​ដែល​ចូល​ចម្ការ​អ្នក​ភូមិ​បាន​គេច​ទៅ​ភ្នំ​ដងរែក

    ឧត្តរមានជ័យៈ ក្រុម​មន្ត្រី​បាន​និយាយ​ថា​សត្វ​ដំរី​ញី​មួយ​ក្បាល​ដែល​បាន​ចូល​លុកលុយ​ក្នុង​ចម្ការ​អ្នកភូមិ​រំដួល​ចាស់ ឃុំ​អម្ពិល ស្រុក​បន្ទាយ​អម្ពិល ខេត្ត​ឧត្តរមានជ័យ​កាលពី​ព្រឹក​ថ្ងៃ​អាទិត្យ​នោះ​បាន​គេច​ខ្លួន​ចូល​ទៅ​ក្នុង​តំបន់​ជួរ​ភ្នំ​ដងរែក​វិញ​ហើយ ខណៈ​ដែល​ក្រុម​មន្ត្រី​ជំនាញ​បរិស្ថាន និង​អាជ្ញាធរ​កំពុង​បន្ត​ឃ្លាំ​មើល​ពី​ដំណើរ​របស់​វា​។

  • ព្រះមហាក្សត្រ​អំពាវនាវ​ឲ្យ​ធានា​ការពារ​យុត្តិធម៌​ និង គោរព​សិទ្ធិ​មនុស្ស

    ភ្នំពេញៈ ក្រោយពី​ឈ្នះ​អាសនៈ​ទាំង​ ៥៨ ដោយ​មិន​មាន​អតីត​បក្ស​សង្គ្រោះ​ជាតិ​ដែល​ជា​គូប្រកួត​ដ៏ស័ក្តិសម​នឹង​គ្នា​សម្រាប់​ការបោះឆ្នោត​ព្រឹទ្ធសភា​ពី​ខែ​កុម្ភៈ គណបក្ស​កាន់​អំណាច​ដែល​ទទួល​ជ័យជម្នះ​បាន​បន្ត​គ្រប់គ្រង​ស្ថាប័ន​នីតិប្បញ្ញត្តិ​ជាថ្មី​ដោយ​បើក​សម័យប្រជុំ​លើក​ដំបូង នីតិកាល​ទី​ ៤ ​នៃ​ព្រឹទ្ធសភា​ពី​ម្សិលមិញ​ក្រោម​ព្រះរាជាធិបតីភាព​ព្រះមហាក្សត្រ​ព្រះបាទ​សម្តេច​ព្រះនរោត្តម សីហមុនី ដែល​ព្រះអង្គ​អំពាវនាវ​ឲ្យ​មាន​ការធានា​ការពារ​យុត្តិធម៌ និង​គោរព​សិទ្ធិ​មនុស្ស និង​រួម​សាមគ្គី​គ្នា​ជា​ធ្លុង​មួយ​។

  • នាយក​រដ្ឋមន្ត្រី​បញ្ជា​ឲ្យ​ដកហូត​កោះ​ ៣០ ​មក​វិញ និង​ឲ្យ​ពិនិត្យ​អ្នក​នៅ​ពី​ក្រោយ​ការទន្ទ្រាន​យក​ដី

    ព្រះសីហនុៈ លោក​នាយករដ្ឋមន្ត្រី ហ៊ុន សែន បាន​បញ្ជា​ឲ្យ​ដកហូត​កោះ​ដែល​មិន​បាន​អភិវឌ្ឍ​ប្រមាណ​ ៣០ ​មក​វិញ​ ខណៈ​អត្តសញ្ញាណ​របស់​ម្ចាស់​ក្បាល​ដី​ចំនួន​ ៥៨៤ ​ដែល​មាន​ទាំង​មន្ត្រី​មាន​អំណាច​កំពុង​ត្រូវបាន​ពិនិត្យ​រឿង​នៅ​ពី​ក្រោយ​ខ្នង​ការកាប់​ទន្ទ្រាន​យក​ដី​ដ៏ក្តៅគគុក​នៅ​កោះរ៉ុង ហើយ​មន្ត្រី​ជាន់ខ្ពស់​ខ្លះ​នឹង​មិន​ត្រូវ​ឲ្យ​ចូលរួម​បង្កើត​រដ្ឋាភិបាល​ថ្មី​នៅ​​អាណត្តិ​ក្រោយ​ឡើយ​។