.jpg)
នាយករដ្ឋមន្រ្តីអង់គ្លេស Boris Johnson ចូលរួមកម្មវិធីឆ្លើយសំណួរប្រចាំសប្ដាហ៍របស់នាយករដ្ឋមន្រ្ទី នៅឯរដ្ឋសភាក្នុងក្រុងឡុងដ៍ នាពេលកន្លងមក។
ក្រុងឡុងដ៍: នាយករដ្ឋមន្រ្តីអង់គ្លេស លោក Boris Johnson បានគាំទ្រការរួមគ្នាដេញថ្លៃនាពេលខាងមុខ ពីប្រទេសអង់គ្លេស ស្កុតឡេន វេលស៍ អៀរឡង់ខាងជើង និងសាធារណរដ្ឋអៀរឡង់ ដើម្បីសុំសិទ្ធិធ្វើជាម្ចាស់ផ្ទះរៀបចំការប្រកួតបាល់ទាត់ពិភពលោក ឆ្នាំ ២០៣០ (World Cup 2030)។
ដំណើរការដេញថ្លៃជាផ្លូវការ ដើម្បីដណ្ដើមសិទ្ធិរៀបចំព្រឹត្តិការណ៍ដ៏ធំនេះ នឹងធ្វើឡើង នៅឆ្នាំក្រោយ ដោយ FIFA ដែលជាស្ថាប័នគ្រប់គ្រងបាល់ទាត់ពិភពលោក។ ការសិក្សាអំពីលទ្ធភាពនានា កំពុងប្រព្រឹត្តទៅ ខណៈសហព័ន្ធបាល់ទាត់របស់ចក្រភពអង់គ្លេស (FA) និងអៀរឡង់ កំពុងពិនិត្យនូវរាល់ជម្រើសផ្សេងៗ សម្រាប់ការដេញថ្លៃរួមគ្នានេះ។
ក្នុងកិច្ចសម្ភាសន៍មួយជាមួយកាសែត The Sun លោក Johnson បានថ្លែងថា៖ «យើងពិតជាចង់ខ្លាំងណាស់ ក្នុងនាំយកការប្រកួតប្រជែងបាល់ទាត់មកប្រទេសរបស់យើង ក្នុងឆ្នាំ ២០៣០។ ខ្ញុំពិតជាមានជំនឿយ៉ាងមុតមាំថា វាជាកន្លែងដ៏ស័ក្ដិសមបំផុត។ វាជាទឹកដីកំណើតរបស់បាល់ទាត់ ពោលគឺវាជាពេលវេលាសមរម្យ។ វានឹងកា្លយជារឿងដ៏អស្ចារ្យយ៉ាងខ្លាំងសម្រាប់ប្រទេស»។
FA បានឱ្យដឹង នៅលើបណ្តាញសង្គម Twitter ថា ខ្លួនស្វាគមន៍ចំពោះការសន្យារបស់រដ្ឋាភិបាល ក្នុងផ្ដល់នូវទឹកប្រាក់ចំនួន ២,៨ លានផោន (ជិត ៤ លានដុល្លារ) ពាក់ព័ន្ធនឹងដំណើរការដេញថ្លៃដែលអាចកើតមាន សម្រាប់រៀបចំព្រឹត្តិការណ៍ World Cup 2030។
ក្នុងសេចក្ដីថ្លែងការណ៍រួម ដែលចេញដោយ FA និងសហព័ន្ធបាល់ទាត់របស់ប្រទេសស្កុតឡេន វេលស៍ អៀរឡង់ខាងជើង និងសាធារណរដ្ឋអៀរឡង់ កាលពីថ្ងៃចន្ទ បានឱ្យដឹងថា៖ «សហព័ន្ធបាល់ទាត់ និងដៃគូរដ្ឋាភិបាលរបស់ចក្រភពអង់គ្លេស និងអៀរឡង់ មានក្ដីសោមន្សរីករាយ ដែលរដ្ឋាភិបាលចក្រភពអង់គ្លេស បានប្ដេជ្ញាគាំទ្រការរួមគ្នាដេញថ្លៃ ៥ សហព័ន្ធ នាពេលខាងមុខ ដើម្បីសុំរៀបចំព្រឹត្តិការណ៍ FIFA World Cup 2030»។
សេចក្ដីប្រកាសរួមនោះបានបន្តថា៖ «យើងនឹងបន្តការងារ ដែលអាចធ្វើទៅបាន ដើម្បីវាយតម្លៃពីលទ្ធភាពនៃការដេញថ្លៃ មុនពេល FIFA បើកដំណើរការប្រជែងជាផ្លូវការ នៅឆ្នាំ ២០២២។ ការបានរៀបចំ FIFA World Cup នឹងផ្តល់នូវឱកាសយ៉ាងធំ ក្នុងការផ្តល់នូវអត្ថប្រយោជន៍ជាក់ស្តែង សម្រាប់ប្រជាជាតិរបស់យើង»។
«ប្រសិនបើការសម្រេច ត្រូវបានធ្វើឡើង ដើម្បីដេញថ្លៃសុំសិទ្ធរៀបចំព្រឹត្តិការណ៍នេះ យើងមានគម្រោងផែនការ ក្នុងការធ្វើការបង្ហាញពីសំណើធ្វើម្ចាស់ផ្ទះរបស់យើងដល់ FIFA និងសហគមន៍បាល់ទាត់ពិភពលោកដ៏ទូលំទូលាយនេះ»។ នេះជាអ្វី ដែលសេចក្ដីប្រកាសរួមនោះ បានឱ្យដឹងបន្ថែម។
ប្រទេសអង់គ្លេស មិនធ្លាប់ធ្វើជាម្ចាស់ផ្ទះ World Cup ឡើយ គិតតាំងពីដណ្ដើមបានសិទ្ធិនេះ ម្ដងគត់ក្នុងឆ្នាំ ១៩៦៦ ដែលពេលនោះក្រុមតោកំណាចស្គាល់រសជាតិលើកពាន ក្នុងព្រឹត្តិការណ៍ដ៏ធំនេះ លើកដំបូង ហើយក៏ជាលើកចុងក្រោយផងដែរ។
World Cup 2022 នឹងកើតឡើង នៅប្រទេសកាតា ខណៈឆ្នាំ ២០២៦ ត្រូវរៀបចំ ក្នុងប្រទេស ៣ រួមគ្នា មានសហរដ្ឋអាមេរិក កាណាដា និងម៉ិកស៊ិក៕ AFP/VN
