.jpg)
ព្រឹត្តិការណ៍រត់ប្រណាំង និងថ្មើរជើង ដែលត្រូវបានរៀបចំនៅកម្ពុជា កន្លងមក។ ណន
ភ្នំពេញ៖ បន្ទាប់ពីពន្យារពេលជាច្រើនលើកច្រើនសារួចមក ក្នុងគម្រោងរៀបចំផ្ដួចផ្ដើមព្រឹត្តិការណ៍កីឡារត់ និងថ្មើរជើង ដែលក្រសួងបរិស្ថានសហការជាមួយក្រុមហ៊ុន Green-G8 នោះ គឺពេលនេះ បានកំណត់ពេលវេលាជាថ្មី ដោយបង្កើតព្រឹត្តិការណ៍រត់ប្រណាំង និងថ្មើរជើងលើភ្នំគូលែន នៅខេត្តសៀមរាប ដែលគេឲ្យឈ្មោះថា Kulen Mountain Trek-Run ហើយកម្មវិធីថ្មីនេះគ្រោងនឹងធ្វើនៅថ្ងៃទី ១៤ ខែ វិច្ឆិកា ឆ្នាំ ២០២០។
តាមសន្និសីទសារព័ត៌មានមួយកាលពីចុងសប្តាហ៍បានឲ្យដឹងថា ព្រឹត្តិការណ៍កីឡាមួយនេះ នឹងប្រារព្ធធ្វើឡើងនៅតំបន់ប្រវត្តិសាស្ដ្រភ្នំគូលែន ខេត្តសៀមរាប ជាលើកដំបូងសម្រាប់ក្រសួងបរិស្ថាន ដែលផ្តោតចាប់យកកីឡា ដើម្បីសហការក្នុងកិច្ចការងាររបស់ខ្លួន។
លោក សៅ សុភាព រដ្ឋលេខាធិការក្រសួងបរិស្ថានបានថ្លែងថា៖ «កម្មវិធីនេះ រៀបចំឡើងក្នុងគោលបំណងលើកកម្ពស់សម្រស់ធម្មជាតិ និងបរិស្ថាន ក៏ដូចជាផ្សព្វផ្សាយនូវតំបន់វប្បធម៌ប្រវត្តិសាស្រ្តនៃឧទ្យានជាតិព្រះជ័យវរ្ម័ននរោត្តម ភ្នំគូលែនដែរ។ នេះជាព្រឹត្តិការណ៍កីឡាលើកដំបូងរបស់ក្រសួងបរិស្ថាន ដើម្បីលើកកម្ពស់ធម្មជាតិ និងវប្បធម៌ ដែលក្រសួងបរិស្ថានបានផ្ដួចផ្ដើម និងសហការជាមួយក្រុមហ៊ុន Green-G8»។
លោក សៅ សុភាព បានបន្ថែមថា៖ «ដើមឡើយកម្មវិធីកីឡានេះ គ្រោងរៀបចំនៅខែកក្កដា ប៉ុន្តែដោយសារស្ថានភាពជំងឺកូវីដ ១៩ គណៈកម្មការរៀបចំក៏សម្រេចលើក ទៅខែតុលា ហើយដោយសារខែតុលា ទំនងដូចជាមិនសមស្រប គឺគណៈកម្មការរៀបចំសម្រេចជាចុងក្រោយលើព្រឹត្តិការណ៍នេះ ទៅធ្វើនៅថ្ងៃទី ១៤ ខែ វិច្ឆិកា ឆ្នាំ ២០២០។ ជាមួយគ្នានេះ ដោយបញ្ហាកូវីដ ១៩ ធ្វើឲ្យការចុះឈ្មោះចូលរួមរបស់យើងទើបតែទទួលបានអ្នកចុះជំហានដំបូង ត្រឹម ៣០០ នាក់ប៉ុណ្ណោះ ទាំងខ្មែរ និងបរទេស ខណៈជនបរទេសខកខានច្រើន។
ទាក់ទងទៅនឹងវិញ្ញាសា ដែលដាក់ឲ្យប្រកួតវិញ លោករដ្ឋលេខាធិការក្រសួងបរិស្ថានដដែលនេះ បានបន្ដថា ការរៀបចំលើកដំបូងនេះ គឺមាន ២ វិញ្ញាសា រួមមានរត់ចម្ងាយ ១៨ គីឡូម៉ែត្រ និង ៨ គីឡូម៉ែត្រ ព្រមទាំងដើរថ្មើរជើងលក្ខណៈកម្សាន្តផងដែរ ហើយបើសិនការរៀបចំលើកទី១នេះ ទទួលបានជោគជ័យក្រសួងបរិស្ថាននឹងបន្ដរៀបចំជារៀងរាល់ឆ្នាំ ព្រមទាំងគ្រោងផ្លាស់ប្ដូរផ្លូវរត់ និងពង្រីកវិញ្ញាសារត់កាន់តែឆ្ងាយទៀតផង ដើម្បីកៀងគរផលប្រយោជន៍ជូនជាតិផង និងប្រជាពលរដ្ឋ ប្រកបរបរក្នុងមូលដ្ឋានផង អាចទទួលបានពីផលនេះដែរ។
ចំណែកលោក Jessie Atienza សហស្ថាបនិកក្រុមហ៊ុន Green-G8 ដែលទទួលបន្ទុករៀបចំព្រឹត្តិការណ៍នេះបានបញ្ជាក់ថា ជុំវិញការចុះឈ្មោះចូលរួមរត់ក្នុងព្រឹត្តិការណ៍កីឡានេះ គឺតម្រូវឲ្យបង់លុយ ប៉ុន្តែប្រជាពលរដ្ឋខ្មែរ ការចុះឈ្មោះចូលរួមមានតម្លៃទាបជាងជនបរទេស ហើយថវិកាបានមក គឺសម្រាប់ឲ្យគណៈកម្មការរៀបចំសម្ភារ និងមធ្យោបាយធ្វើដំណើរជូនដល់អ្នកចូលរួមទាំងអស់វិញប៉ុណ្ណោះ៕
