.jpg)
រិន ដាវីដ បានទាត់ទៅលើកីឡាករជើងចាស់ អេលីត ប៊ុនសិទ្ធ ក្នុងការប្រកួត កាលពីថ្ងៃអាទិត្យ។ រូប យឺន ពន្លក
ភ្នំពេញៈ ការខិតខំប្រឹងប្រែង តស៊ូទាំងការហ្វឹកហាត់ និងការប្រកួតមាន ដែលមានលក្ខណៈស្វិតស្វាញ និងទទួលបានលទ្ធផលឈ្នះកីឡាករជារៀមច្បងជាបន្តបន្ទាប់នោះបានជួយឲ្យអ្នកប្រដាល់វ័យក្មេង រិន ដាវីដ ឈានដល់ការសម្រេចបំណងធំរបស់ខ្លួនគឺការជាប់ជាកីឡាករថ្នាលជម្រើសជាតិប្រដាល់គុនខ្មែរប្រចាំឆ្នាំ ២០១៩។
នៅក្នុងវ័យទើបតែមានអាយុ ១៧ ឆ្នាំ និងបានចូលហ្វឹកហាត់ប្រដាល់បានតែ ១ ឆ្នាំ រិន ដាវីដ របស់ក្លិបនាគរាជចតុមុខបានបង្ហាញសមត្ថភាពយ៉ាងល្អអស្ចារ្យ ធ្វើឲ្យមានការចាប់អារម្មណ៍ដោយរូបគេបានបង្ក្រាបជើងចាស់មួយចំនួន និងបានចូលក្នុងក្រុមជម្រើសជាតិដោយទទួលបានអាហារ ការស្នាក់នៅ និងប្រាក់ឧបត្ថម្ភតាមសមត្ថភាពពិតគឺគ្មានបក្ខពួក ឬសែស្រឡាយក្នុងជួរកីឡាអ្វីនោះទេ។
ចំពោះការសម្រេចបំណងធំក្នុងការក្លាយជាកីឡាករជម្រើសជាតិនេះ រិន ដាវីដ ដែលទើបបានយកឈ្នះជើងខ្លាំងមានបទពិសោធចាស់វស្សា អេលីត ប៊ុនសិទ្ធ ដោយពិន្ទុដាច់នៅសង្វៀន SEATV កាលពីថ្ងៃអាទិត្យនោះបានប្រាប់ភ្នំពេញ ប៉ុស្តិ៍ ក្រោយការប្រកួតថា៖ «ក្តីបំណងរបស់ខ្ញុំពេលនេះបានសម្រេចហើយគឺខ្ញុំត្រូវបានសហព័ន្ធកីឡាប្រដាល់គុនខ្មែរជ្រើសរើសឲ្យជាប់ជាជម្រើសជាតិកម្រិតថ្នាលក្នុងប្រភេទ ៥១ គីឡូក្រាមឆ្នាំ ២០១៩ នេះ»។
កីឡាករ រិន ដាវីដ គ្មានឈាមជ័រជាអ្នកកីឡាបន្តពីឪពុកម្តាយនោះទេ ប៉ុន្តែក្មេងប្រុសដែលជាកូនទី ២ ក្នុងគ្រួសារក្រីក្រមានបងប្អូន ៤ នាក់រូបនេះ មានចិត្តចង់ឡើងប្រដាល់តែម្តងដោយគេបានឈប់រៀន ព្រោះស្ថានភាពជីវភាពគ្រួសារក្រីក្រ ដ្បិតអីម្តាយរបស់គេជាកម្មការិនីកាត់ដេរ និងឪពុកជាអ្នកលេងកីឡាបាល់ទះដែលមានទីលំនៅនៅភូមិព្រែកក្តី ឃុំព្រែកតាទែន ស្រុកពញាឮ ខេត្តកណ្តាល។
កីឡាករ រិន ដាវីដ បានប្រាប់ថា៖ «ខ្ញុំសប្បាយចិត្តខ្លាំងណាស់នៅពេលទទួលបានដំណឹងថា ជាប់ជម្រើសជាតិ ហើយឪពុកម្តាយ និងគ្រួសាររបស់ខ្ញុំបានគាំទ្រទាំងអស់»។ ឆ្លងកាត់ការប្រកួត ៣៣ ដង ឈ្នះ ២៦ ចាញ់ ៥ និងស្មើ ២ ដង រិន ដាវីដ ត្រូវបានគេកត់សម្គាល់ថា ជាកីឡាករចិត្តធំណាស់ ហ៊ានចូលវាយសម្រុកគ្មានញញើត នាំឲ្យរូបគេឆាប់ល្បីល្បាញក្នុងចំណោមក្មេងជំនាន់ក្រោយ។
ប្រភពពីមន្ត្រីសហព័ន្ធកីឡាជាតិបានឲ្យដឹងថា តាមគោលនយោបាយរបស់លោក ស សុខា រដ្ឋលេខាធិការក្រសួងអប់រំ យុវជន និងកីឡាទទួលបន្ទុកកីឡាបានសម្របសម្រួលឲ្យសាលារៀនមួយចំនួនដែលមានទីតាំងនៅជិតកន្លែងប្រមូលផ្តុំក្រុមកីឡាជម្រើសជាតិដោយផ្តល់ឱកាស និងជួយបង្កលក្ខណៈបំពេញឯកសារឲ្យអត្តពលិកជម្រើសជាតិបានចូលរៀនតាមពេលវេលាដែលបានកំណត់ និងតម្រូវការ។ ជាមួយគ្នានេះដែរ អត្តពលិកជម្រើសជាតិនឹងទទួលបានមានការហូបចុកស្នាក់នៅ និងមានប្រាក់ឧបត្ថម្ភប្រចាំខែព្រមទាំងមានគ្រូពេទ្យថែទាំសុខភាពជាប្រចាំបានយ៉ាងយកចិត្តទុកដាក់ទៀតផង។
ចំណែកលោក ភារិន ជាឪពុករបស់ រិន ដាវីដ បាននិយាយថា៖ «កូនខ្ញុំមួយនេះចិត្តធំណាស់ ការប្រកួតភាគច្រើនប៉ះជាមួយជើងចាស់ តែគេហ៊ានវ៉ៃមិនញញើតទេ ហើយបើតាមកម្លាំងហ្វឹកហាត់ និងទឹកចិត្តប្រកួតវិញ ខ្ញុំមានទំនុកចិត្តអនាគតនឹងក្លាយជាអ្នកប្រដាល់ឆ្នើមទៅដណ្តើមមេដាយជូនជាតិកម្រិតអន្តរជាតិ»។
លោកបានបញ្ជាក់ថា៖ «ខ្ញុំសប្បាយចិត្តណាស់ ព្រោះកូនខ្ញុំបានជាប់ជម្រើសជាតិដោយគ្មានអស់លុយ ឬបក្ខពួកអ្វីទាំងអស់គឺដោយសារថ្នាក់ដឹកនាំសហព័ន្ធពិនិត្យវាយតម្លៃពីសមត្ថភាពរបស់កូនខ្ញុំល្អ គឺទទួលបានតែម្តង ហើយក្រោយបានចូលជម្រើសជាតិ កូនខ្ញុំនឹងទទួលបានការរៀនសូត្រទៀតដោយមិនចាំបាច់បង់ប្រាក់ដែលក្រសួងអប់រំនឹងផ្តល់ជូន»៕
