ភ្នំពេញ៖ កីឡាករជើងខ្លាំង រិន ដាវីត បានសម្រេចបំណងក្នុងការឈ្នះប្រាក់លាន ពីការប្រកួតម៉ារ៉ាតុងដណ្តើមប្រាក់លានជាលើកទី២ នៅលើសង្វៀនថោនកាលពីថ្ងៃអាទិត្យ បន្ទាប់ពីរូបគេបានយកឈ្នះ សុខ រិទ្ធ ដែលឡើងប្រកួតជំនួស ភួន ឡាំងកូស៊ីន នៅវគ្គជម្រុះ ៣ ទឹក រួចបានបន្តទៅទាត់ឱ្យ ហ៊ឹម គឹមរៀង ខូចជើងខាងឆ្វេង ត្រឹមទឹកទី១ នៅក្នុងការប្រកួតផ្តាច់ព្រ័ត្រនោះ។
ជាមួយជ័យជម្នះនេះ នាំឱ្យ រិន ដាវីត សន្សំបានកេរ្តិ៍ឈ្មោះកាន់តែល្បីល្បាញជាមួយទឹកប្រាក់ចំនួន ៣,៤ លានរៀល ដើម្បីផ្សំទិញម៉ូតូជិះមកបំពេញកាត្វកិច្ចជាកីឡាករជម្រើសជាតិនៃប្រដាល់គុនខ្មែរ ខណៈម៉ូតូរបស់គេ ដែលសន្សំលុយទម្រាំទិញបានត្រូវចោរលួចបាត់កាលពីថ្ងៃចន្ទ សប្តាហ៍មុន។
ប៉ុន្តែ រិន ដាវីត ប្រាប់ថា រូបគេមានអារម្មណ៍ច្របូកច្របល់ខ្លាំងនៅក្នុងការប្រកួតនេះ។ «មុនប្រកួតចាប់ផ្តើម ខ្ញុំមានអារម្មណ៍ថា ការប្រកួតនេះពិតជាជួបឧបសគ្គធំណាស់ ព្រោះបេក្ខភាព ភួន ឡាំងកូស៊ីន ត្រូវបានផ្លាស់ប្តូរ និងជំនួសដោយ សុខ រិទ្ធ ដែលខ្ញុំមិនធ្លាប់ជួប ហើយគាត់ជាអ្នកប្រដាល់ល្បីល្បាញលើអន្តរជាតិទៀតផង»។
«មួយវិញទៀត ការចាប់ឆ្នោតប៉ះប្រកួតគ្នារវាង ហ៊ឹម គឹមរៀង និង ជី ឆៃលី នោះ គឺ គឹមរៀង ចំណាយពេលតែ ២ ទឹក ផ្តួលឱ្យសន្លប់ ដើម្បីឈរចាំ នៅវគ្គផ្តាច់ព្រ័ត្រមុន អ៊ីចឹងនៅពេលនោះ ខ្ញុំមានអារម្មណ៍ច្របូកច្របល់ ដោយគិតថា បើមានឱកាសឈ្នះ សុខ រិទ្ធ ក្នុងវគ្គជម្រុះ ច្បាស់ជាកម្លាំងខ្ញុំធ្លាក់ចុះច្រើន ដែលអាចនឹងពិបាកទប់ទល់ជាមួយ ហ៊ឹម គឹមរៀង នៅវគ្គផ្តាច់ព្រ័ត្រ ហេតុនេះក្តីរំពឹងកាន់តែធ្លាក់ចុះ»។
ដាវីត បន្ថែមថា៖ «ទោះបីជាយ៉ាងណា ខ្ញុំបានប្តូរយុទ្ធសាស្ត្រប្រកួត ដោយមិនចំណាយកម្លាំងឱ្យអស់ ពេលជួប សុខ រិទ្ធ ពោលគឺព្យាយាមវ៉ៃសន្សំកម្លាំងយកឈ្នះត្រឹមពិន្ទុ ដើម្បីមានឱកាសបានឡើងទៅប៉ះ ហ៊ឹម គឹមរៀង ទើបវ៉ៃផ្តាច់តែម្តង ហើយការគិតរបស់ខ្ញុំ គឺទទួលបានលទ្ធផលដូចបំណង ដោយខ្ញុំបានឈ្នះ សុខ រិទ្ធ ដោយពិន្ទុជាឯកច្ឆន្ទ ៥-០ និងឈានទៅវគ្គផ្តាច់ព្រ័ត្រ ដោយបានទាត់ ហ៊ឹម គឹមរៀង ឱ្យខូចជើងតែម្តង»។
ម្ចាស់ខ្សែក្រវាត់មាសទម្ងន់ ៥៤ គីឡូក្រាម នៅសង្វៀន PNN និងជាម្ចាស់ពានលេខ ១ នៅប៉ុស្តិ៍លេខ ៥ រិន ដាវីត បានបញ្ជាក់ថា៖ «ខ្ញុំបានមើលការប្រកួតរបស់ ហ៊ឹម គឹមរៀង ហើយឃើញថា គាត់ជ្រាយ និងទន់ជើងក្រោម ប៉ុន្តែឱបឡើងជង្គង់លំបាកទប់ទល់ណាស់ ដោយខ្ញុំធ្លាប់ចាញ់គាត់ ចំនួន ៣ លើកមកហើយ ហេតុនេះខ្ញុំព្យាយាមទាត់បំបែកជើងក្រោម ទើបលទ្ធផលបានជ័យជម្នះដូចបំណង»។
យ៉ាងណាក៏ដោយ កីឡាករ ហ៊ឹម គឹមរៀង បាននិយាយក្រោយការប្រកួតថា រូបគេមានបញ្ហារបួសជើង តាំងពីប្រកួតជម្រុះជាមួយ ជី ឆៃលី មកម្ល៉េះ ចំណែក សុខ រិទ្ធ បាននិយាយដែរថា ការចាញ់ រិន ដាវីត លើកនេះ គឺមិនមែនចាញ់បច្ចេកទេស ឬក្បាច់ប្រកួតនោះទេ ប៉ុន្តែចាញ់ដោយសារកម្លាំង ព្រោះរូបគេ ហ្វឹកហាត់បានត្រឹម ៣ ថ្ងៃគត់ ក្នុងការឡើងមកប្រកួតជំនួសសិស្សប្អូន ឡាំងកូស៊ីន ដែលបានឈឺនេះ។
លោក ស្វាយ សុខុន គ្រូបង្វឹក រិន ដាវីត និយាយថា៖ «ខ្ញុំសប្បាយចិត្ត ចំពោះការប្រឹងប្រែងរបស់ ដាវីត ព្រោះលទ្ធផលប្រកួតមួយរយៈចុងក្រោយនេះ គឺ ដាវីត បានជាប់ជម្រើសជាតិឈ្នះខ្សែក្រវាត់នៅសង្វៀន PNN ឈ្នះពានធំ នៅសង្វៀនប៉ុស្តិ៍លេខ ៥ និងឈ្នះប្រាក់រង្វាន់ធំ នៅសង្វៀនថោននេះចំនួន ២ លើកហើយ ដោយវាកំពុងតែល្បីខ្លាំង និងវ៉ៃបានទាំងក្នុងទម្ងន់ ៥៤ និង ៥៧ គីឡូក្រាម»។
គ្រូបង្វឹករូបនេះ បានបន្ថែមថា៖ «ទោះបីក្លិបរបស់ខ្ញុំមិនមានគោលការណ៍កាត់ប្រាក់ ឬដកភាគរយពីការប្រកួតរបស់កីឡាករ ប៉ុន្តែ រិន ដេវីត ជាសិស្សគំរូ ដោយពេលប្រកួត គេតែងតែជួយលុយថ្លៃទិញម្ហូបផងដែរ ដូចជាកាលឈ្នះខ្សែក្រវាត់នៅ PNN គេបានជួយដល់ក្លិបចំនួន ១ ០០០ ដុល្លារ ហេតុនេះខ្ញុំមានការសាទរ និងលើកទឹកចិត្តឱ្យគេខំបន្ត ដើម្បីបានប្រាក់ទិញម៉ូតូម្តងទៀត»៕