The Phnom Penh Post Search

Search form




Logo of Phnom Penh Post newspaper Phnom Penh Post - រិន​ ដាវីត ​រំពឹង​ឈ្នះ​ពាន ខណៈជំងឺ​គ្រុន​ឈីក​ បាន​បំផ្លាញឱកាស​​របស់ ​ធន់ ​អៀន​ឡៃ​




រិន​ ដាវីត ​រំពឹង​ឈ្នះ​ពាន ខណៈជំងឺ​គ្រុន​ឈីក​ បាន​បំផ្លាញឱកាស​​របស់ ​ធន់ ​អៀន​ឡៃ​

Content image - Phnom Penh Post
រិន ដាវីត បាន​ទាត់​ចូល​កញ្ចឹងក ស៊ឺន ថៃសាន់ សម្រាប់ការ​ប្រកួត​បង្រ្គប់កិច្ច កាល​ពី​ថ្ងៃអាទិត្យ​។ យឺន ពន្លក

រិន​ ដាវីត ​រំពឹង​ឈ្នះ​ពាន ខណៈជំងឺ​គ្រុន​ឈីក​ បាន​បំផ្លាញឱកាស​​របស់ ​ធន់ ​អៀន​ឡៃ​

ភ្នំពេញ៖ កីឡាករ​ជម្រើសជាតិ រិន ​ដាវីត របស់​​ក្លិប​នាគ​រាជ​ចតុ​មុខ​ ​បាន​បង្ហាញ​ទំនុក​ចិត្ត​ខ្ពស់ថា ពាន​រង្វាន់ ​នៃកម្មវិធី TV5 Boxing Knock Out Series ទម្ងន់​ ៥៤​ គីឡូក្រាម នៅ​លើ​សង្វៀន​ប៉ុស្តិ៍​លេខ​ ៥ ​ដោយមាន​​ប្រាក់​រង្វាន់ចំនួន​​៤០០០​ដុល្លារ នឹង​ធ្លាក់​មក​លើ​ដៃ​របស់​គេ ជា​មិន​ខាន។

ការ​បង្ហាញ​ពី​ភាព​ជឿជាក់នេះ បន្ទាប់​​ពី រិន ដាវីត បាន​ឈ្នះ​​កៅ​អី​​ឡើង​ទៅ​វគ្គ​ផ្ដាច់ព្រ័ត្រ ដោយ​ស្វ័យប្រវត្តិ ​ខណៈ​ដៃ​គូ​ប្រជែង​ដ៏​ស្រួច​ស្រាវ​របស់​ខ្លួន គឺជើងខ្លាំង ​ធន់ ​អៀន​ឡៃ បាន​​បោះ​បង់​ចោល​ការ​ប្រកួត​ កាលពី​ថ្ងៃអាទិត្យ ដោយ​បញ្ហា​សុខភាព​ គឺ​​កើត​ជំងឺ​គ្រុន​ឈីកភ្លាមៗ ដ៏​គួរ​ឲ្យសោក​ស្តាយ​បំផុត​​នោះ​។

រិន ដាវីត បាន​និយាយ​ថា៖​ «ខ្ញុំ​កំពុងតែ​ព្រួយ​បារម្ភ​ផង​ ស្រាប់​តែ​ដៃ​គូ​អវត្តមាន ​ដោយ​បញ្ហា​សុខ​ភាព ​គឺ​ជា​សំណាង​របស់​ខ្ញុំ ​ ហើយ​ខ្ញុំរំពឹង​ថា នឹង​​ឈ្នះ​ពាន​រង្វាន់​ និង​ប្រាក់​ចំនួន​៤​០០០​ដុល្លារ​នេះ​ ​ព្រោះ​ដៃ​គូ​មក​ប្រ​កួត​ជា​មួយ​ខ្ញុំ ​គឺ​មិន​ជា​ឧបសគ្គ​ធំ​នោះ​ឡើយ ​ទោះ​បីជា​កីឡាករ យ៉ន ​ពិសី ​ឬ ​ឡុង ​ខេត្ត ​ក៏​ដោយ ​ដោយ​​ខ្ញុំ​រំពឹង​​ឈ្នះ​ខ្ពស់​តែ​ម្តង​ ដោយសារ​​ជើង​ខ្លាំង​ជា​ដៃ​គូ​ បាន​ធ្លាក់​ចេញ​អស់​ហើយ»​។​

ចំណែក លោក ​ធន់ ​សុភា ​គ្រូ​បង្វឹក ​ធន់ ​អៀន​ឡៃ​ បាន​​ប្រាប់​​ថា​៖ «​ខ្ញុំ​មាន​ការ​សោក​ស្តាយ​​ព្រោះ​ជិត​ដល់​ថ្ងៃ​ប្រ​កួត ធន់ អៀនឡៃ ​ក្តៅ​ខ្លួន ហើយ​ពេល​​ចូល​ទៅ​ឲ្យ​ពេទ្យ​ពិនិត្យ​ គឺ​កើតជំងឺ​គ្រុន​ឈីក ​តែ​ម្តង»​។​

លោក​ បន្ត​ថា៖​ «យើង​​ស្តាយ​មែន ​ប៉ុន្តែ​សុខ​ភាព​សំខាន់​ណាស់​ ហើយ​ជំងឺ​នេះ ក៏នឹងអាច​​ធ្វើ​ឲ្យ ធន់ អៀនឡៃ គ្មាន​ឱកាស បាន​​​​ប្រ​កួត​ដណ្តើម​យក​ចំណាត់​លេខ ​៣​ ​នោះដែរ មើល​ទៅ»​។​

Content image - Phnom Penh Post

យ៉ាងណា​ក៏​ដោយ លោក​ ញាន​ សុធី​ អ្នក​គ្រប់​គ្រង​ការ​ផ្គូ​ផ្គង​កីឡាករ នៅ​សង្វៀន​ប៉ុស្តិ៍​លេខ​៥ បាន​​ប្រាប់​ថា​៖​ «​តាមការ​​សហការ​ជា​មួយ​មន្ត្រីសហព័ន្ធកីឡា​​ប្រដាល់​គុន​ខ្មែរ ​គឺ​យើងធ្វើ ដោយ​​យោងទៅ​​តាម​បច្ចេក​ទេស គឺ​​អ្នក​មាន​ឈ្មោះ​ឈាន​ចូល​ដល់​វគ្គ​ពាក់​កណ្តាល​ផ្តាច់​ព្រ័ត្រ​ ទោះ​បី​ចាញ់​គ្រប់​ការ​ប្រកួត​ ​ឬ​ខក​ខាន​ការ​ប្រ​កួត ក៏​​នឹង​ទទួល​បាន​​លេខ​៤ ​ជា​ស្វ័យ​ប្រ​វត្តិ​ដែរ​ ​ព្រោះ​​យើង​ត្រៀម​ជយ​លាភី​ដល់​លេខ​៤​។​ ​ប៉ុន្តែ ធន់ ​អៀន​ឡៃ ប្រហែលជា​​ជា​សះ​ស្បើយ​ទាន់ពេល ដើម្បី​មក​ប្រ​កួត​​ដណ្តើម​យក​លេខ​​៣​ ​ព្រោះ​ការប្រកួតនេះ យ៉ាង​ហោច​ណាស់​ក៏៤​សប្តាហ៍​ទៀត​ដែរ​»។

គួរ​បញ្ជាក់ថា ការ​បោះបង់​ចោលការ​ប្រកួត​របស់ ធន់ អៀនឡៃ កាល​ពី​ថ្ងៃអាទិត្យ​នោះ គឺ​គណៈកម្មការ​រៀបចំ​ បានសម្រេច​ដាក់​ឲ្យ រិន ដាវីត ប្រកួត​មិត្ត​ភាព​ជាមួយ ស៊ឺន ថៃសាន់ ជំនួស​វិញ ហើយជា​លទ្ធ​ផល​នៃ​ការ​ប្រកួតបង្រ្គប់​កិច្ច​នោះ រិន ដាវីត បាន​យក​ឈ្នះ ស៊ឺន ថៃសាន់ ដោយ​ពិន្ទុ​ដាច់៕

អត្ថបទគួរចាប់អារម្មណ៍