.jpg)
ភ្នំពេញ៖ កីឡាករវ័យក្មេងកំពុងលេចធ្លោមានបទពិសោធល្អ ២ នាក់ គឺ រិន ដេវីដ និង ពេជ្រ ប៊ុនសិទ្ធ អាចនឹងត្រូវប៉ះគ្នាក្នុងវគ្គណាមួយនៃការប្រកួតម៉ារ៉ាតុងដណ្តើមប្រាក់លាន ទម្ងន់ ៥៧ គីឡូក្រាម នៅលើសង្វៀនថោន នាល្ងាចថ្ងៃអាទិត្យ ហើយការវាយតម្លៃបែបនេះ ក៏ព្រោះតែអ្នកទាំង ២ នេះ មានបច្ចេកទេសប្រកួតល្អបំផុត និងមានប្រៀបជាងបេក្ខភាពជាជើងថ្មី ២ ធន់ ផានិត និង ឃន គឹមហេង។
យ៉ាងណាក៏ដោយ ដោយសារការប្រកួតនេះ តម្រូវឲ្យចាប់ឆ្នោតភ្លាមៗមុនប្រកួតបែបនេះ រិន ដេវីដ និង ពេជ្រ ប៊ុនសិទ្ធ ក៏អាចជួបគ្នាក្នុងវគ្គជម្រុះ ៣ ទឹកដំបូងផងដែរ ប៉ុន្តែក្នុងករណីពួកគេចាប់ឆ្នោតមិនជួបគ្នាវគ្គជម្រុះ គឺលទ្ធផលគេអាចព្យាករបានថា ដេវីដ និង ប៊ុនសិទ្ធ មានលទ្ធភាពឈ្នះដៃគូរៀងៗខ្លួន ដើម្បីឈានទៅប្រកួតគ្នាក្នុងវគ្គផ្តាច់ព្រ័ត្រមាន ៣ ទឹកជាមិនខាន។
តាមកំណត់ត្រាប្រកួតដ៏ស្វិតស្វាញរបស់ ពេជ្រ ប៊ុនសិទ្ធ ជាមួយ រិន ដេវីដ ច្រើនលើកកន្លងមក ប៊ុនសិទ្ធ មិនទាន់ស្គាល់រសជាតិឈ្នះម្តងឡើយ។ លោក ពេជ្រ សុផាន់ គ្រូបង្វឹក ពេជ្រ ប៊ុនសិទ្ធ និយាយថា៖ «ប៊ុនសិទ្ធ នឹងប៉ះ រិន ដេវីដ នៅថោនថ្ងៃអាទិត្យ ដើម្បីដណ្តើមប្រាក់លាន ហើយនៅខែតុលា ខាងមុខ ពួកគេនឹងប្រកួតគ្នាម្តងទៀត យកកៅអីវគ្គ ៣ ពានរង្វាន់នៅប៉ុស្តិ៍លេខ ៥។
លោកបានបន្ថែមថា៖ «ទោះជា ប៊ុនសិទ្ធ ធ្លាប់ចាញ់មែនពិត ប៉ុន្តែត្រឹមពិន្ទុប៉ុណ្ណោះ និយាយទៅយើងនៅខ្ចីជាងបន្តិច។ រីឯលើកនេះ ខ្ញុំប្តូរយុទ្ធសាស្ត្រប្រកួតតែសុំមិនទាន់និយាយមុនទេ ដោយសង្ឃឹមឈ្នះវិញ ព្រោះយើងសិក្សាពីក្បាច់ប្រកួត គឺចាញ់ប្រៀបតែជង្គង់ប៉ុណ្ណោះ»។
ចំណែក រិន ដេវីដ ដែលកំពុងហ្វឹកហាត់នៅក្រុមជម្រើសជាតិ គឺជាក្មេងចេញពីស្ថានភាពគ្រួសារក្រីក្រនៅព្រែកតាទែន ស្រុកពញាឮ ខេត្តកណ្តាល។ ដេវីដ ព្យាយាមហ្វឹកហាត់ និងគោរពវិន័យបានល្អ ព្រមទាំងឡើងប្រកួតជួយជីវភាពគ្រួសារផងដែរ។
រិន ដេវីដ និយាយថា៖ «ខ្ញុំនឹងព្យាយាមការពារជ័យជម្នះនេះឲ្យបានបន្តទៀត ក្នុងទំនុកចិត្ត ៨០ ភាគរយ ប៉ុន្តែក្នុងចំណោមបេក្ខភាព ៣ នាក់ ដែលត្រូវចាប់ឆ្នោតប្រកួតជាមួយខ្ញុំនេះ គឺ ប៊ុនសិទ្ធ ពិតជាខ្លាំងមិនមែនយកឈ្នះដោយស្រួលនោះឡើយ»។
ចំណែកជើងខ្លាំងថ្មីវ័យក្មេង ធន់ ផានិត និង ឃន គឹមហេង ដែលហ៊ានចូលខ្លួនមកប្រកួតដណ្តើមប្រាក់លាននេះ សុទ្ធតែមានចំណុចពិសេសរៀងៗខ្លួន។ លោក ជួប វុត្ថា អ្នកគ្រប់គ្រងសមាសភាពកីឡាករប្រកួតនៅសង្វៀនថោន និយាយថា៖ «ធន់ ផានិត មានបទពិសោធខ្ចីមែន តែស្ថិតិប្រកួតល្អបំផុត និងមានប្រវត្តិឈ្នះជើងចាស់ផងដែរ ហើយថ្មីៗនេះ គេបានផ្តួលជើងខ្លាំងជម្រើសជាតិ យិប ឌុក ឲ្យសន្លប់ អ៊ីចឹងហើយទើបយើងសម្រេចដាក់ឲ្យប្រកួតក្នុងកម្មវិធីដណ្តើមប្រាក់លានលើកនេះ»។
ចំណែក លោក ធន់ សុភា គ្រូបង្វឹក ធន់ ផានិត ប្រាប់ថា៖ «ប្រវត្តិប្រកួតរបស់ ផានិត ល្អណាស់ គឺប្រកួត ១២ លើក ផ្តួលដៃគូឲ្យសន្លប់ ១១ លើក គឺធ្លាប់ចាញ់តែម្តងគត់ជាមួយ កែវ មនោរម្យ កាលពីប្រកួតលើកដំបូង ហើយក្រៅពីនេះឈ្នះ រាប់ទាំងជើងចាស់ខ្លាំងមួយចំនួនទៀតផង»។
ដោយឡែក ឃន គឹមហេង ត្រូវបានគណៈកម្មការផ្គូផ្គងប្រាប់ថា កំពុងមានបច្ចេកទេសប្រកួតល្អណាស់។ នាយកគ្រប់គ្រងកម្មវិធីប្រកួតប្រចាំសង្វៀនថោន លោក គឹម ស្រ៊ុនកុសល បានប្រាប់ថា៖ «យើងផ្គូផ្គងទៅតាមបច្ចេកទេសនៃសមត្ថភាព ព្រោះមានជើងថ្មីខ្លះ ប្រកួតល្អ និងកំពុងតែឡើងជើង ហេតុនេះយើងផ្តល់ឱកាសឲ្យគេចូលរួមប្រកួតជាមួយជើងចាស់។ កន្លងមកយើងពិនិត្យសមត្ថភាពកីឡាករ ទៅតាមភាពជាក់ស្តែង ហើយការប្រកួតយើងទទួលបានលទ្ធផលល្អ និងគាំទ្រពីមហាជនក៏ដូចខាងស្ពនស័រ ដែលជួយកម្មវិធី»៕
