ភ្នំពេញ៖ អ្នកប្រដាល់ រិន ដេវីដ ក្លិបនាគរាជចតុមុខ ដែលចេញពីប្រភពកូនអ្នកក្រីក្របំផុតនៅស្រុកពញាឮ ខេត្តកណ្តាល បានសាងស្នាដៃក្នុងអាជីពប្រដាល់គុនខ្មែរ ក្នុងរយៈពេលខ្លីបំផុត ប៉ុន្តែលទ្ធផលទទួលបានមកដល់បច្ចុប្បន្ន គឺមានភាពលេចធ្លោជាបន្តបន្ទាប់ ដោយជាប់ជាជម្រើសជាតិចំនួន ២ ឆ្នាំ ហើយកាលពីយប់ថ្ងៃអាទិត្យកន្លងមកនេះ គេបានឈ្នះប្រាក់រង្វាន់ពីកម្មវិធី Mas Fight Cambodia នៅសង្វៀនថោន ដោយក្នុងនោះ ដេរីដ បានយកឈ្នះ ពេជ្រ ប៊ុនសិទ្ធ ក្នុងវគ្គជម្រុះ និងបន្តឈ្នះជើងខ្លាំងជំនាន់ថ្មី ធន់ ផានិត វគ្គផ្តាច់ព្រ័ត្រទទួលបានប្រាក់ចំនួន ៣,៤ លានរៀល។
សម្រាប់ប្រវត្តិប្រកួតក្នុងរយៈពេលថ្មីៗចុងក្រោយនេះ រិន ដេវីដ កំពុងលេចធ្លោខ្លាំង ដោយឈ្នះជាដរាប ដែលអាចវាយបានល្អដាច់គេ ក្នុងប្រភេទទម្ងន់ ៥៤ និង ៥៧ គីឡូក្រាម តែរូបគេនៅមិនទាន់សងសឹកឈ្នះ ហ៊ឹម គឹមរៀង ម្នាក់គត់។ បន្ទាប់ពីឈ្នះប្រាក់លាននេះ រិន ដេវីដ នៅសល់ការប្រកួតដណ្តើមពាន TV5 Boxing Knock Out Series Cell Card ១ទៀត ដែលឈរចាំជាស្រេច ក្នុងវគ្គ ២ ខណៈពាននេះ មានទំហំទឹកប្រាក់ចំនួន ៤ ពាន់ដុល្លារ។
ចំពោះស្ថានភាពប្រកួតលក្ខណៈម៉ារ៉ាតុង ដណ្តើមប្រាក់លានទាំង ២ ដំណាក់កាល កាលពីថ្ងៃអាទិត្យនោះ រិន ដេវីដ ធ្វើបានល្អ ប៉ុន្តែតឹងតែងបំផុត មុននឹងឈានទៅឈ្នះបានប្រាក់រង្វាន់នេះ។ នៅក្នុងវគ្គជម្រុះ ៣ ទឹកដំបូង ដេវីដ បានយកឈ្នះ ពេជ្រ ប៊ុនសិទ្ធ ដោយមានប្រៀបឈ្នះដាច់ក្នុងទឹកទី២ និងទឹកទី៣ តាមរយៈការប្រើជង្គង់ និងកណ្តាប់ដៃបានល្អ ព្រមទាំងមានទេពកោសល្យគេចលឿនមិនឱ្យ ប៊ុនសិទ្ធ វាយចូលចំគោលដៅបាន។
ប៉ុន្តែ រិន ដេវីដ ក៏ឈឺខ្លួនណាស់ដែរ ដោយមានស្នាមបែកលើភ្នែក ក្រោមស្នាដៃ ពេជ្រ ប៊ុនសិទ្ធ។ ចំណែកការប្រកួតវគ្គផ្តាច់ព្រ័ត្រ ជាមួយសិស្សប្អូនជំនាន់ថ្មីកូនសិស្សលោកគ្រូ ធន់ សុភា គឺកីឡាករ ធន់ ផានិត ជាការប្រកួតដ៏តឹងតែងអស្ចារ្យ មុននឹងទទួលបានជ័យជម្នះដោយពិន្ទុដូចគ្នា។
រិន ដេវីដ បាននិយាយក្រោយពេលឈ្នះថា៖ «ខ្ញុំមិនអាចមើលស្រាលសមត្ថភាពដៃគូជំនាន់ក្រោយទេ គឺខ្ញុំវ៉ៃក្នុងលក្ខណៈប្រុងប្រយ័ត្ន មិនចូលរំលោភនាំឱ្យភ្លាត់ស្នៀតនោះឡើយ។ ក្នុងជំនួបប្រកួតទាំង ២ នាក់នេះ មិនងាយស្រួលទេ ខ្ញុំគិតវាយស្រង់បច្ចេកទេសជង្គង់ និងគេចចេញពីការសម្រុករបស់ដៃគូ»។
កីឡាកររូបនេះ បានប្រាប់បន្ថែមថា៖ «នៅថ្ងៃខាងមុខ ខ្ញុំរំពឹងវ៉ៃយកខ្សែក្រវាត់ពិសេសនៅសង្វៀនលេខ ៥ ខែក្រោយ ដោយខ្ញុំនឹងប្រឹងយកឈ្នះឱ្យបានបន្ថែមទៀត។ បន្ថែមលើនេះ ខ្ញុំមានបំណងចង់ចូលរួមក្នុងព្រឹត្តិការណ៍ស៊ីហ្គេម និងការប្រកួតអន្តរជាតិនៅពេលក្រោយ តាមការរៀបចំរបស់មេៗ»។
លោកគ្រូបង្វឹកវ័យក្មេង លោក ធន់ សុភា និង លោក ពេជ្រ សុផាន់ ដែលមានកូនសិស្សប្រកួតចាញ់កីឡាករ រិន ដេវីដ នោះ បានកោតសរសើរចំពោះ រិន ដេវីដ ថា កំពុងឡើងជើង និងមានរបៀបប្រកួតឆ្លាត។ ជាមួយគ្នានេះការឈ្នះរបស់គេភាគច្រើន វាយប្រើបច្ចេកទេស មិនហ៊ានទប់ទល់ដោយកម្លាំងនោះឡើយ ដែលនេះជាទេពកោសល្យ និងភាពខ្លាំងរបស់ ដេវីដ មកដល់ពេលនេះ៕