The Phnom Penh Post Search

Search form




Logo of Phnom Penh Post newspaper Phnom Penh Post - រិន​ ដេវីដ ​ប្តេជ្ញា​យក​ឈ្នះ ​រឿន ​សុខលី​ ក្នុង​វគ្គ​ជម្រុះ​ជុំ​ទី​១




រិន​ ដេវីដ ​ប្តេជ្ញា​យក​ឈ្នះ ​រឿន ​សុខលី​ ក្នុង​វគ្គ​ជម្រុះ​ជុំ​ទី​១

Content image - Phnom Penh Post
រិន ដេវីដ (ឆ្វេង) សង្ឃឹមអាច​យក​ឈ្នះ រឿន សុខលី សម្រាប់ការ​ប្រកួតជម្រុះ នៅសង្វៀន​ TV5។ រូបសហ​ការី

រិន​ ដេវីដ ​ប្តេជ្ញា​យក​ឈ្នះ ​រឿន ​សុខលី​ ក្នុង​វគ្គ​ជម្រុះ​ជុំ​ទី​១

ភ្នំពេញ៖ ​អ្នក​ប្រដាល់​ជើង​ខ្លាំង​មាន​សមត្ថភាព​ប្រកួត​គួរ​ឲ្យ​ចាប់​អារម្មណ៍​​ រិន ​ដេវីដ ​មក​ពី​ក្លិប​នាគ​រាជ​ចតុមុខ​ ដែល​កំពុង​ជាប់​ជា​កីឡាករ​ជម្រើស​ជាតិ​ប្រដាល់​គុន​ខ្មែរ​នឹង​ត្រូវ​​ប្រកួត​ជាមួយ​​កីឡាករ​មាន​បទពិសោធ​ល្អ​ ​រឿន ​សុខលី របស់​​ក្លិប​យុវជន​ពន្លក​ថ្មី​ព្រែក​ឯង នៅ​ថ្ងៃសៅរ៍​ ខាង​មុខ​នេះ ដើម្បី​រក​អ្នក​ឈ្នះ​នៅ​ក្នុង​វគ្គ​ជម្រុះ​នៃ​ការ​ប្រកួត​ពាន​រង្វាន់ TV5 Boxing ​Knock Out Series Cellcard Champion។​

សម្រាប់​​ការ​ប្រកួត​ក្នុង​ទម្ងន់ ​៥៤ គ.ក្រ ​ដែល​មាន​តែ ​៣ ​ទឹក​នេះ​ គេ​មិន​ទាន់​ដឹង​ថា​ នរណា​ជា​អ្នក​មាន​លទ្ធភាព​យក​ឈ្នះ​​បាន​ឡើង​ទៅ​វគ្គ​បន្ត​នោះ​ឡើយ​ ព្រោះ​សមត្ថភាព​កីឡាករ​ រិន ដេរីដ និង រឿន សុខលី ​សុទ្ធ​តែ​​ល្អ​ដូច​គ្នា ​និង​​ត្រូវ​ការ​ឈ្នះ​ដូចគ្នា ​ដើម្បី​ឆ្លង​ទៅ​វគ្គ ​៨ នាក់​ចុង​ក្រោយ ​​ប៉ុន្តែ​ រិន​ ដេវីដ ​ប្តេជ្ញា​យក​ឈ្នះ​ឲ្យ​បាន​។

រិន ​ដេវីដ ​ជា​អ្នក​ប្រដាល់​ស្រករ​ក្រោយ ​រឿន ​សុខលី ​បន្តិច ​តែ​ក្បាច់​​គុន ​និង​ទឹក​ចិត្ត​ប្រកួត ​គឺ​មោះមុត​ដូច​គ្នា​ ពិសេស​ការ​ឈាន​ចូល​មក​ក្រុម​ជម្រើស​ជាតិ ​ដោយ​ប្រើ​​សមត្ថភាព​ខ្លាំង​ពិតៗ​ ហើយ​ជើង​ចាស់​មួយ​ចំនួន​បាន​ចាញ់​ជា​បន្ត​បន្ទាប់​។ ​អាវុធ​សំខាន់​របស់ ​រិន ​ដេវីដ មាន​កែង​ ជង្គង់​ល្អ​ និង​វ៉ៃ​បាន​គ្រប់​ស្ថានភាព​ ខណៈ​កីឡាករ​រូប​នេះ ធ្លាប់​ប្រកួត ​៥៧​ ​ឈ្នះ ​៤៣ ​​ចាញ់ ១២ ​និង​ស្មើ​ពិន្ទុ ​២ ​ដង​។​

ចំណែក ​រឿន​ សុខលី​ ​ធ្លាប់​ឆ្លង​កាត់​ការ​ប្រកួត​ជាមួយ​អ្នក​ប្រដាល់​ជើង​ចាស់​ច្រើន​ និង​មាន​សមត្ថភាព​ល្អ​ ប៉ុន្តែ​មាន​ឱកាស​ឡើង​សង្វៀន​មិន​ទៀង​ទាត់ គឺ​​យូរៗ​ឃើញ​ម្តង​។ ​សុខលី​ ជា​អ្នក​​ប្រដាល់​ ដែល​មាន​កល​ល្បិច​ខ្ពស់​ ព្រម​ទាំង​មាន​ទេពកោសល្យ​ប្រើ​ជង្គង់​ ​និង​កែង​បាន​រហ័ស​ ស៊ូ​បំផុត​ ហើយ​ក្នុង​ការ​ប្រកួត​​ ​៤០ ដង សុខលី ​ឈ្នះ ៣០ ​ដង ​ចាញ់ ៩ និង​ស្មើ​ពិន្ទុ ១ ដង​។​

ការ​វិល​មក​ជួបគ្នា​រវាង រឿន​ សុខលី​ និង ​រិន ​ដេវីដ ​នេះ​លំបាក​ទស្សន៍​ទាយ​ ប៉ុន្តែ​ រិន​ ដេវីដ​កំពុង​តែ​មាន​កម្លាំង​ល្អ​ណាស់​ក្នុង​ការ​ប្រកួត ​៣ ​ទឹក ​គឺ​អាច​មាន​ប្រៀប​ជាង​ ​ព្រោះ​កម្លាំង​របស់​គេ​មិន​ងាយ​ស្រុត​ចុះ​ទេ​ ហើយ​ក្នុង​ទម្ងន់ ​៥៤ ​គីឡូក្រាម​​នេះ រិន ដេវីដ ​ល្អ​ដាច់​គេ គឺ​​សូម្បី​តែ​ ពេជ្រ​ ប៊ុនសិដ្ឋ​ ដែល​ទើប​ឡើង​ជើង ក៏​សុំ​ខ្លាច​ រិន​ ដេវីដ​ ព្រោះ​ការ​ប្រកួត ​៣ ​លើក​ ចាញ់​ទាំង ​៣ ​លើក​។

រិន ​ដេវីដ បាន​​និយាយ​ថា​៖ «​គេ​ជើង​ចាស់​ជាង​ខ្ញុំ ​ប៉ុន្តែ​ក្នុង​ការ​ប្រកួត ​៣ ​ទឹក ​ខ្ញុំ​មាន​កម្លាំង​គ្រប់គ្រាន់​ ដើម្បី​យក​ឈ្នះ​ឲ្យ​បាន​។​ អ្វី​ដែល​ខ្ញុំ​មិន​បារម្ភ ​គឺ​ខ្ញុំ​ហាត់​ជា​ប្រចាំ​ត្រៀម​បាន​គ្រប់គ្រាន់​ ដោយ​​សង្ឃឹម​ឈ្នះ ​៧០ ​ភាគរយ​»។​

ចំណែក​លោក ​ម៉ាង ​ម៉ន ​គ្រូ​បង្វឹក​ សុខលី ​និយាយ​ថា​៖ ​«គូ​នេះ​លំបាក​ទស្សន៍​ទាយ​ណាស់​ ​ព្រោះ​ស្នៀត​ប្រយុទ្ធ ​គឺ​មាន​អាវុធ​ចេញ​ល្អ​ដូច​គ្នា ​ប៉ុន្តែ​វា​ស៊ីសង​លើ​ការ​ប្រកួត​ជាក់​ស្តែង​ក្នុង​ការ​ផ្លាស់​ប្តូរ​ល្បិច​ប្រកួត ​ឬ​ចាប់​ចំណុច​ខ្សោយ​ពី​ដៃគូ​។​ ទោះ​​យ៉ាង​ណា​ ក៏​មិន​អាច​ឈ្នះ​ក្នុង​លក្ខណៈ​ស៊ី​ស្រួល​ដែរ​ ​ព្រោះ​ សុខលី ​​ហាត់​បាន​ល្អ​ដែរ ​នឹង​​ត្រូវ​ការ​ឈ្នះ​ដូច​គ្នា ​គឺ​មិន​បន្ធូរ​ដៃ​នោះ​ទេ»​។

យ៉ាង​នេះ​ក្តី​ការ​ទស្សន៍ទាយ​ក្រៅ​ផ្លូវ​ការ​ពី​ក្រុម​ភ្នាល់​លុយ​តាម​តូប​កាហ្វេ​ ចាប់​ផ្តើម​មាន​ហាង​ឆេង​ទីផ្សារ​ងងឹត ​គឺ​ឈ្មួញ​យក​ រិន ​ដេវីដ ត​ឲ្យ ​រឿង​ រឿន សុខ​លី​ ១០ ​ស៊ី ​៧ ​ប៉ុណ្ណោះ​។​ ក្រៅ​ពី​​ការ​ប្រកួត​ជម្រុះ​ពាន​រង្វាន់​ ក៏​មាន​គូ​ចាប់​អារម្មណ៍​ខ្លាំង​មួយ​ទៀត​ ដែល​ជា​ការ​ជួប​គ្នា​រវាង ទូច ដេវីដ​ ​និង ភួង ពិសិដ្ឋ ក្នុង​ទម្ងន់ ​៦០ គ.ក្រ។

សម្រាប់​ការ​ជួប​គ្នា​រវាង​អ្នក​ទាំង ២ ​នេះ ជា​ការ​​ប្រកួត​សង​សឹក ​ព្រោះ​ ពិសិដ្ឋ​ ធ្លាប់​ឈ្នះ​ ដេវីដ​ ដោយ​ពិន្ទុ​ទាំង​វេទនា​ភ្នែក​។ ​ក្បាច់​ប្រកួត​​របស់ ទូច​ ដេវីដ​ ជំនាញ​កណ្តាប់​ដៃ​ ឯ​ ពិសិដ្ឋ​ ជំនាញ​ជង្គង់​ ហើយ​ការ​ចាញ់ ​ឬ​ឈ្នះ ​សម្រាប់​គូ​នេះ ​សុទ្ធ​ក្នុង​លក្ខណៈ​មិន​អាច​ព្យាករ​បាន​មុន​ទេ​ ដោយ​​ពួក​គេ​ប្រកួត​សម្រុក​វ៉ៃ​តាម​បច្ចេទេស​៕​

អត្ថបទគួរចាប់អារម្មណ៍

  • ភ្នំពេញ៖ រដ្ឋមន្ត្រី​ក្រសួង​យុត្តិធម៌​លោក​ កើត ​រិទ្ធ​ បាន​ប្រាប់​ឯកអគ្គ​រាជទូត​អូស្ត្រាលី​លោក ​Pablo​ Kang ​នៅ​ក្នុង​ជំនួប​កាល​ពី​ថ្ងៃ​អង្គារ នៅ​ក្រសួង​យុត្តិធម៌​ថា​ ការ​ចាប់​ខ្លួន​បុគ្គល​ណា​មួយ​ដោយ​សមត្ថកិច្ច គឺ​ធ្វើ​ទ្បើង​ដោយ​អនុលោម​តាម​ច្បាប់​​កម្ពុជា។​

  • ភ្នំពេញ៖ ដោយ​សង្កេត​ឃើញ​ពី​ការ​ប្រឈម​របស់​​ប្រជាកសិករ​កម្ពុជា​​មួយ​ចំនួន​ ជាពិសេស​អ្នក​នៅ​ទី​ដាច់​ស្រយាល​ ដែល​បាត់បង់​ទីផ្សារ​​​​ព្រោះ​តែ​វិបត្តិ​កូវីដ យុវជន ​១ ក្រុម ​បាន​រួមគ្នា​បង្កើត​គម្រោង​ COVID Farmer Hacker ដើម្បី​ជួយ​​អ្នក​ខិតខំ​ដាំដុះ​តែ​ត្រូវ​រងគ្រោះ​ពី​ការ​រំខាន​ដល់​​​សេដ្ឋកិច្ច​​បង្ក​ដោយ​វីរុស​កូរ៉ូណា។​

  • ភ្នំពេញ៖ គ្រឹះស្ថាន​មីក្រូហិរញ្ញវត្ថុ ប្រាសាក់ ​​ដែល​ចុះ​បញ្ជី​សញ្ញាប័ណ្ណ​សាជីវកម្ម​នៅ​ផ្សារ​មូលបត្រ​កម្ពុជា ​(CSX) បាន​រាយការណ៍​អំពី​ប្រតិបត្តិការ​អាជីវកម្ម​ដ៏​ល្អ​ប្រសើរ​នៅ​ត្រីមាស​ទី​២ ​ឆ្នាំ​នេះ ទោះបី​ជា​​ខ្លួន​ទទួល​រង​នូវ​សម្ពាធ​ខ្លះៗ​ពី​ការ​រីក​រាលដាល​ជំងឺ​កូវីដ ​១៩ ​ដែល​បណ្ដាល​ឱ្យ​សេដ្ឋកិច្ច​របស់​កម្ពុជា មាន​ការ​ធ្លាក់ចុះ​ក៏​ដោយ​។​

  • ភ្នំពេញ៖ ​លោកស្រី​ ​ភឿង​ សកុណា ​រដ្ឋមន្រ្តី​ក្រសួង​វប្បធម៌​ និង​វិចិត្រ​សិល្បៈ​បាន​ចេញ​សេចក្ដី​ណែនាំ​ដល់​គ្រប់​អង្គភាព​ពាក់ព័ន្ធ​ក្រោម​ឱវាទ​ក្រសួង​វប្បធម៌ ​និង​គ្រប់​រដ្ឋបាល​ថ្នាក់​ក្រោម​ជាតិ ​អនុវត្ត​នីតិវិធី​ និង​ទម្រង់​បែបបទ​នៃ​ការ​គ្រប់គ្រង​អាជីវកម្ម​កាត់សក់​ ​អ៊ុត​សក់​ និង​លម្អ​ក្រចក

  • ភ្នំពេញ៖ ​រដ្ឋមន្រ្តី​ក្រសួង​សុខាភិបាល​លោក ​ម៉ម​ ប៊ុន​ហេង បាន​ជំរុញ​ឱ្យ​គ្រប់​ភាគី​ពាក់ព័ន្ធ​ទាំង​អស់​ ដែល​ធ្វើ​ការ​ផ្នែក​គាំពារ​មាតា​ និង​ទារក​ ត្រូវ​​បង្កើន​យុទ្ធនាការ​អប់រំ​ផ្សព្វផ្សាយ​អំពី​សារៈសំខាន់​នៃ​ការ​បំបៅ​កូន​ដោយ​ទឹក​ដោះ​ម្តាយ​ និង​ហានិភ័យ​ពី​ការ​បំបៅ​កូន​ដោយ​ទឹក​ដោះ​គោ​ម្សៅ​ផ្សំ​តាម​រូបមន្ត​ទាំង​នៅ​ថ្នាក់​ជាតិ​ និង​ថ្នាក់​ក្រោម​ជាតិ។

  • មណ្ឌលគិរី៖ សាលា​ដំបូង​ខេត្ត​មណ្ឌលគិរី ពី​ម្សិលមិញ​បាន​សម្រេច​ឃុំ​ខ្លួន​ចាងហ្វាង​សារព័ត៌មាន​អនឡាញ​ម្នាក់​នៅ​ពន្ធនាគារ​​ខេត្ត​ក្រោម​បទ​ចោទ ​«ឈូស​ឆាយ​ដី​ព្រៃ​ដោយ​គ្មាន​ការ​អនុញ្ញាត​» បន្ទាប់​ពី​សមត្ថកិច្ច​ឃាត់​ខ្លួន​កាល​ពី​​ថ្ងៃទី ២២ កញ្ញា ​តាម​ដីកា​តុលាការ​ពាក់ព័ន្ធ​ការ​ឈូស​ឆាយ​ដី​ព្រៃ ​និង​ប្រើប្រាស់​សារធាតុ​ញៀន។