រុស្ស៊ី: ក្រុមម្ចាស់ផ្ទះរុស្ស៊ី បានឆ្ពោះជំហានយ៉ាងប្រកៀកឆ្ពោះទៅកាន់វគ្គ១៦ក្រុមចុងក្រោយនៃព្រឹត្តិការណ៍ World Cup ក្រោយពីបានកត់ត្រាជ័យជម្នះក្នុងលទ្ធផល ៣-១ លើក្រុមជម្រើសជាតិអេហ្ស៊ីប បើទោះបីខ្សែប្រយុទ្ធដ៏មានឥទ្ធិពល Mohamed Salah បានចូលលេងក៏ដោយ។
ក្រោយពីការប្រកួតក្នុងតង់ទី១ដ៏តានតឹង ក្រោមដំណក់ទឹកភ្លៀង ប្រធានក្រុមនៃក្រុមជម្រើសជាតិអេហ្ស៊ីប Ahmed Fathi បានធ្វើឲ្យបាល់ចូលទីខ្លួនឯង នៅមុនគ្រាប់បាល់ស៊ុតបញ្ចូលទីពីសំណាក់កីឡាករ Denis Cheryshev និង Artem Dzyuba បានបំពេញជ័យជម្នះ ដែលបានលុបចោលការព្រួយបារម្ភផ្សេងៗមុនយុទ្ធនាការ World Cup ក្នុងប្រទេសរុស្ស៊ី ថា ក្រុមម្ចាស់ផ្ទះនឹងជួបភាពត្រដាបត្រដួសក្នុងការឆ្លងឲ្យផុតត្រឹមវគ្គចែកពូល។
Salah បានរកគ្រាប់បាល់ជាលើកទី១របស់ក្រុមជម្រើសជាតិអេហ្ស៊ីប នាយុទ្ធនាការ World Cup បើគិតចាប់តាំងពីឆ្នាំ១៩៩០ ដោយការស៊ុតបាល់ប៉េណាល់ទី ក្រោយពីរូបគេត្រូវបានទាញឲ្យដួលក្នុងរយៈពេល១៧នាទីចុងក្រោយ ប៉ុន្តែវាបានយឺតពេលបន្តិចទៅហើយក្នុងការស្រោចស្រង សម្រាប់ក្រុមជម្រើសជាតិអេហ្ស៊ីប។
ក្រុមជម្រើសជាតិរុស្ស៊ី នឹងត្រូវឈ្នះកៅអីទៅលេងក្នុងវគ្គ១៦ក្រុមចុងក្រោយ ហើយក្រុមជម្រើសជាតិអេហ្ស៊ីប នឹងត្រូវកាត់ចេញ ប្រសិនបើក្រុមជម្រើសជាតិអារ៉ាប៊ីសាអ៊ូឌីត មិនអាចផ្តួលក្រុមជម្រើសជាតិអ៊ុយរូហ្គាយ នៅថ្ងៃពុធនេះទេនោះ។
នៅពេលដែលត្រូវបានចោទសួរថា ថ្ងៃនេះគឺជាថ្ងៃដ៏រីករាយបំផុតនៃជីវិតរបស់លោក ឬយ៉ាងណា លោក Stanislav Cherchesov គ្រូបង្វឹកនៃក្រុមជម្រើសជាតិរុស្ស៊ី បានឲ្យដឹងថា៖ «ខ្ញុំសង្ឃឹមថា ភាពរីករាយនឹងកើតឡើងជាច្រើនបន្ថែមទៀត»៕ IS