ភ្នំពេញៈ កីឡាករកម្ពុជា រឿង សារ័ត្ន មកពីក្លិបកងទ័ពឆត្រយោង ៩១១ បានយកឈ្នះជើងខ្លាំងរបស់ថៃ Phat Ka ដោយពិន្ទុ ក្នុងការប្រកួតមិត្តភាពអន្តរជាតិ នៅសង្វៀន SEATV កាលពីល្ងាចថ្ងៃសៅរ៍ ប៉ុន្តែកីឡាករ ឌុម កែវដា របស់ក្លិបមកុដរាជសីហ៍នៃក្រសួងមហាផ្ទៃ បានបន្តចាញ់ថៃ Pet Thieng ដោយពិន្ទុទាំងប្រផិតប្រផើយ ក្នុងជំនួបប្រកួតចំនួន ៥ ទឹក យ៉ាងជក់ចិត្ត។
តាមរយៈការប្រកួតកាលពីថ្ងៃសៅរ៍នោះ ឌុម កែវដា បានប្រឹងប្រែងប្រកួតអស់ពីសមត្ថភាព ប៉ុន្តែលទ្ធផលនៅតែចាញ់កីឡាករថៃជើងថ្មី Pet Thieng ហើយលទ្ធផលនេះ បានធ្វើឲ្យការប្រកួតចំនួន ៤ លើកចុងក្រោយនេះរបស់ កែវដា គឺមិនទាន់ទទួលបានលទ្ធផលឈ្នះនៅឡើយ។
ឌុម កែវដា បាននិយាយក្រោយប្រកួតថា៖ «ខ្ញុំប្រឹងវ៉ៃអស់ពីសមត្ថភាពហើយ ហើយសង្ឃឹមថាឈ្នះ ប៉ុន្តែលទ្ធផល គឺចាញ់ទៀត ពិតជាសោកស្តាយណាស់។ ទោះយ៉ាងណា ខ្ញុំមិនបាក់ទឹកចិត្តទេ គឺខ្ញុំត្រូវបន្តហ្វឹកហាត់បន្ថែមទៀត ព្រោះខ្ញុំត្រូវការប្រកួតឈ្នះស្តារមុខមាត់ឡើងវិញ ដើម្បីកិត្តិយស និងទីផ្សារប្រកួត»។
តាមការទស្សនាដោយផ្ទាល់នៅក្នុងជំនួបប្រកួត ៥ ទឹកនោះ កីឡាករថៃ Pet Thieng និង ឌុម កែវដា មានភាពប្រហាក់ប្រហែលគ្នា ហើយបើតាមអ្នកទស្សនាភាគច្រើនលាន់មាត់ថា សង្វៀនប្រដាល់អាស៊ីអាគ្នេយ៍ បើកីឡាករខ្មែរវ៉ៃថៃមិនឈ្នះដាច់ ឬផ្តួលឲ្យសន្លប់ទេ កុំសង្ឃឹមចៅក្រមផ្តល់ពិន្ទុឲ្យឈ្នះថៃនោះ។
ចំណែកគូ រឿង សារ័ត្ន វិញមានការប្រកួតតឹងតែងណាស់ ប៉ុន្តែ រឿង សារ័ត្ន វ៉ៃបានល្អផ្នែកកែងរូស និងជង្គង់ គឺចំគោលដៅបានល្អ ព្រមទាំងចេញបានច្រើនជាងទៀតផង។ នៅក្នុងជំនួបប្រកួតចំនួន ៥ ទឹកពេញ រឿង សារ័ត្ន មានប្រៀបតែបន្តិចបន្តួចនៅទឹកទី ២ ទី ៣ និងទី ៤ ហើយក្រៅពីនេះចាញ់ប្រៀបកម្លាំងគេដែរ។ លទ្ធផលចុងក្រោយចៅក្រម និងគណៈកម្មការបានផ្តល់ពិន្ទុឲ្យ រឿង សារ័ត្ន ឈ្នះទាំងប្រផិតប្រផើយ។
ចំណែកលទ្ធផលការប្រកួតពេលយប់ នៅសង្វៀន SEATV នោះដែរ ឈិន ក្វាន់ង៉ុយ របស់ក្លិបមកុដរាជសីហ៍ឈ្នះកីឡាករបារាំង Abdul នៅទឹកទី ១ គួរឲ្យអស់សំណើច ខណៈដែលកីឡាករបារាំងនោះដាល់ចូលមុខ ក្វាន់ង៉ុយ ប៉ុន្តែបែរជាឈឺដៃខ្លួនឯង និងសុំចុះចាញ់តែម្តង។
សម្រាប់ការប្រកួត កាលពីយប់ថ្ងៃសៅរ៍នោះដែរ មាស ច័ន្ទមាន បានឈ្នះកីឡាករថៃ Sen Khum ក្នុងទឹកទី ៤ ដោយថៃ ធ្វើពុតសន្លប់ចង់ស៊ីឡាក់ស្របពេលដែល ច័ន្ទមាន ទាត់ថែមមួយជើងខុសសោះនោះ៕