ភ្នំពេញៈ អ្នកប្រដាល់គុនខ្មែរមានឈ្មោះល្បី រឿង សោភ័ណ្ឌ បានអះអាងថា រូបគេនឹងប្រកួតដោយប្រយ័ត្នប្រយែងបំផុត នៅពេលជួបជាមួយកីឡាករជើងខ្លាំងជំនាន់ក្រោយ វង្ស វិឆ័យ របស់ក្លិបកងទ័ពឆត្រយោង ៩១១ នៃការប្រកួតដណ្តើមប្រាក់លាន ទម្ងន់ ៧១ គីឡូក្រាម នៅលើសង្វៀន CNC នាល្ងាចថ្ងៃសៅរ៍នេះ។
នៅក្នុងទម្ងន់ធ្ងន់នេះ រឿង សោភ័ណ្ឌ ហាក់ដូចជាលំបាករកដៃគូប្រកួតឲ្យមានសមត្ថភាពប្រហាក់ប្រហែល ឬស័ក្តិសមគ្នា រវាងកីឡាករលំដាប់ខ្លាំងជួរមុខនៅក្នុងស្រុកដូចគ្នា ហើយការរក្សាបានភាពខ្លាំង និងល្បីល្បាញនេះ បានធ្វើឲ្យ សោភ័ណ្ឌ មានការប្រុងប្រយ័ត្នខ្លាំង ព្រោះរូបគេ «ខ្លាចជួបភាពអាម៉ាស់» ពេលប៉ះ វង្ស វិឆ័យ។
បើនិយាយពីបទពិសោធឡើងសង្វៀនប្រកួត ក្នុងវិស័យគុនខ្មែរនេះ រឿង សោភ័ណ្ឌ ចាស់វស្សាបំផុត ដោយបានឡើងប្រកួតច្រើនជាង វង្ស វិឆ័យ ជាង ១០០ លើកឯណោះ ពិសេស រឿង សោភ័ណ្ឌ បានស្គាល់សង្វៀនរយៈពេលជិត ២០ ឆ្នាំ ខណៈ វង្ស វិឆ័យ ទើបចាប់ផ្តើមមានសមត្ថភាពល្បីល្បាញ ត្រឹមឆ្នាំ ២០១៩ ប៉ុណ្ណោះ។
លទ្ធផលដែល រឿង សោភ័ណ្ឌ ទទួលបាន គឺគេជាម្ចាស់ជយលាភីឈរនៅលំដាប់ជួរមុខ នៅក្នុងប្រទេស ដោយធ្លាប់ឈ្នះខ្សែក្រវាត់ និងពានជាច្រើន។
រឿង សោភ័ណ្ឌ របស់ក្លិបមកុដរាជសីហ៍នៃសមាគមប្រដាល់ក្រសួងមហាផ្ទៃ ដែលធ្លាប់ប្រកួតបាន ១៧៥ ដង ឈ្នះ ១៥៥ ចាញ់ ១៥ ស្មើ ៥ ដង ហើយធ្លាប់ផ្តួលដៃគូឲ្យសន្លប់បាន ៥៥ ដងនោះ បាននិយាយថា៖ «ខ្ញុំមិនអាចមើលរំលងសមត្ថភាពរបស់ វង្ស វិឆ័យ បានទេ ព្រោះគេក្មេងមានកម្លាំងល្អ កម្ពស់ល្អ និងមានក្បាច់ជង្គង់ល្អផងដែរ»។
អ្នកលេងកណ្តាប់ដៃឆ្វេង រឿង សោភ័ណ្ឌ បន្ថែមថា៖«ជាមួយគ្នានេះ ខ្ញុំមិនធ្លាប់ប្រកួតជាមួយគ្នានោះទេ ហេតុនេះខ្ញុំរំពឹងឈ្នះត្រឹម ៦០ ភាគរយប៉ុណ្ណោះ។ តែទោះបីជាយ៉ាងណា ខ្ញុំនឹងវ៉ៃដោយប្រយ័ត្នប្រយែងបំផុត ព្រោះបើចាញ់ជើងខ្លាំងជំនាន់ក្រោយ ពិតជាអាម៉ាស់ខ្លាំងណាស់ ហើយក៏មិនអាចចាញ់បាននោះដែរ»។
លោក គង់ ចាន់ធីណា អ្នកគ្រប់គ្រងកីឡាករ រឿង សោភ័ណ្ឌ បានប្រាប់ថា៖ «សោភ័ណ្ឌ ហ្វឹកហាត់ជាប្រចាំបានល្អ ហើយបើតាមការវិភាគពីរបៀបប្រកួតវិញ គឺសុំមិននិយាយទេ កុំឲ្យដៃគូដឹងពីល្បិចរបស់យើង ប៉ុន្តែធានាបានយ៉ាងខ្ពស់ថា មិនអាចចាញ់នោះគេឡើយ គឺរកគ្រប់មធ្យោបាយ ដើម្បីឈ្នះលើអ្នកខ្លាំងវ័យក្មេងនេះ ព្រោះសមត្ថភាពនៃជំនួបអ្នកប្រដាល់ទាំង ២ នេះគឺកំពុងស្ថិតក្រោមការចង់ទស្សនារបស់មហាជន»។
កីឡាករ វង្ស វិឆ័យ មានបទពិសោធប្រកួតខ្ចីមែន បើប្រៀបធៀបជាមួយ រឿង សោភ័ណ្ឌ ប៉ុន្តែ ក្នុងរយៈពេល ២ ឆ្នាំនេះ ក្នុងចំណោមអ្នកប្រដាល់ទម្ងន់ធ្ងន់ឆ្នើមៗ គេធ្លាប់ឈ្នះ និងចាញ់ជាមួយ ឡុង សុភី និងធ្លាប់ផ្តួល ឡុង សុវណ្ណឌឿន ឲ្យសន្លប់ហើយក្រៅពីនេះ មិនទាន់មានកីឡាករខ្មែរណា ហ៊ានប្រកួតជាមួយគេនោះឡើយ។
វង្ស វិឆ័យ មានប្រវត្តិប្រកួតជាង ៥០ លើក គឺចាញ់តែ ៣ លើកប៉ុណ្ណោះ និងធ្លាប់ឈ្នះខ្សែក្រវាត់ចំនួន ២ កន្លងមក។
វង្ស វិឆ័យ បានប្រាប់ថា៖ «ខ្ញុំមិនហ៊ាននិយាយថា យ៉ាងណាទេ ព្រោះមិនធ្លាប់ប្រកួតគ្នាហើយ រឿង សោភ័ណ្ឌ គាត់ជាកីឡាករជើងចាស់ ដែលល្បីល្បាញមុន និងមានល្បិចច្រើន។ ទោះយ៉ាងណា ខ្ញុំឡើងទៅដឹងតែវ៉ៃអស់ពីសមត្ថភាព ចំណែករឿងចាញ់ឈ្នះ មិនទាន់ហ៊ាននិយាយទេ គឺចាំមើលស្ថានភាពប្រកួតជាក់ស្តែង មើលចំណុចខ្សោយ និងចំណុចខ្លាំងរបស់គាត់យ៉ាងម៉េច ដោយខ្ញុំសង្ឃឹមត្រឹម ៥០ ភាគរយប៉ុណ្ណោះ»៕