ភ្នំពេញ៖ អ្នកប្រដាល់ដ៏មានប្រជាប្រិយ និងល្បីល្បាញ រឿង សោភ័ណ្ឌ ដែលធ្លាប់តែមិនតក់ស្លុត ឬខ្លាចដៃគូប្រកួតនោះ ហាក់មិនហ៊ានរំពឹងឈ្នះខ្ពស់ ក្នុងការប្រកួតសងសឹកជាមួយជើងខ្លាំងជំនាន់ក្រោយ ជំនាញក្បាច់ជង្គង់ ធឿន ធារ៉ា នៅលើសង្វៀន CNC នារសៀលថ្ងៃអាទិត្យ ហើយគេបានព្រលយថា មុខរបស់ ធារ៉ា រឹង វ៉ៃមិនសន្លប់ទេ ចំណែក ឡុង សំណាង ក៏ត្រូវជួប គង់ សំបូរ ក្នុងថ្ងៃជាមួយគ្នានោះដែរ។
តាមប្រវត្តិ និងបទពិសោធប្រកួតលើសង្វៀន រឿង សោភ័ណ្ឌ ប្រកួតបានច្រើនជាង ធឿន ធារ៉ា ជាង ១០០ លើកឯណោះ ប៉ុន្តែប្រវត្តិជួបប្រកួតគ្នាចំនួន ២ លើកកន្លងមក រឿង សោភ័ណ្ឌ មិនទាន់ស្គាល់រសជាតិឈ្នះនោះទេ ដោយក្នុងនោះ សោភ័ណ្ឌ ធ្លាប់បានចាញ់ពិន្ទុ ធឿន ធារ៉ា ក្នុងការប្រកួតជម្រើសជាតិជើងឯកថ្នាក់ជាតិ ឆ្នាំ ២០១៧ ក្នុងវគ្គ ១/២ ផ្តាច់ព្រ័ត្រ។
ចំណែកជំនួបលើកទី២ កាលពីថ្ងៃទី ៣០ ខែ ឧសភា ឆ្នាំ ២០២០ នៅសង្វៀន CNC រឿង សោភ័ណ្ឌ បានស្មើនឹង ធឿន ធារ៉ា ប៉ុន្តែជំនួបលើកនេះគឺស្ថិតនៅលើការតាមដាន ខណៈលទ្ធផលត្រូវបានគេសង្ស័យពីភាពមិនប្រក្រតី ដោយមានការលើកឡើងថា គ្រាន់តែជាសិល្បៈនៃការរៀបចំឲ្យប្រកួតត្រឹមកម្តៅសាច់ដុំ ឯលទ្ធផលត្រូវបានគិតទុកជាមុនទៅហើយ។
ការមានភាពមន្ទិលសង្ស័យនេះ ក៏ព្រោះតែកន្លងមក គេបានកត់សម្គាល់ឃើញថា រឿង សោភ័ណ្ឌ ជាតារាតួឯកប្រដាល់ មានប្រិយភាពខ្លាំង ដែលសង្វៀន CNC ផ្តល់ឱកាសជាកីឡាករសំណព្វចិត្ត ក្នុងក្រសែភ្នែកប្រចាំសង្វៀន ដោយសារបានទាក់ទាញមហាជនច្រើនជាងគេ។ ទោះជាយ៉ាងណា ការរិះគន់ពីមហាជនទៅលើ រឿង សោភ័ណ្ឌ គឺវ៉ៃពេលខ្លះធ្វើពុត ពេលខ្លះចាញ់ប្រៀបគេ គឺតែងតែរកលេសផ្សេងៗដូចជា ត្រូវចំប្រដាប់ការពារ, បែរខ្នងក្នុងបំណងសុំពន្យារពេលសម្រួល ឬដើម្បីចង់ស៊ីឡាកជាដើម។
ចំពោះការប្រកួតលើកនេះ រឿង សោភ័ណ្ឌ បានប្រាប់ភ្នំពេញ ប៉ុស្តិ៍ ថា៖ «ជំនួបលើកទី ៣ នេះ រំពឹងឈ្នះតិចទេ ព្រោះលំបាកប្រកួត ដោយសារគេខ្ពស់ និងវែងជាង អ៊ីចឹងពេលយើងចូលកៀក គឺលំបាកគេចពីក្បាច់ជង្គង់ ប៉ុន្តែបើយើងវាយឆ្ងាយ គឺវាយមិនចូលដល់គោលដៅល្អ ឬធ្ងន់ ១០០ ភាគរយបានទេ ពិសេសពេលចូលឱបឡើងជង្គង់ យើងកាន់តែចាញ់ប្រៀបគេថែមទៀត។ ចំណែកមុខរបស់ ធារ៉ា រឹងវ៉ៃមិនសន្លប់ទៀត ហេតុនេះខ្ញុំរំពឹងឈ្នះត្រឹម ៦០ ភាគរយប៉ុណ្ណោះ»។
លោក ឈិន ក្វាន់ចៃ ជាគ្រូបង្វឹកនិយាយថា៖ «យុទ្ធសាស្ត្រសម្រាប់ឈ្នះបាន គឺហាត់ទាត់ឆ្ងាយ ប្តូរកណ្តាប់ដៃ និងគេចចេញពីក្បាច់ជង្គង់ គឺខ្ញុំមានទំនុកចិត្តឈ្នះច្រើន តែសំខាន់ហាត់កម្លាំងឲ្យរឹងមាំ ធានាល្អ ៥ ទឹកពេញ។ ខ្ញុំគិតថា លើកនេះ សោភ័ណ្ឌ នឹងឈ្នះ បើវ៉ៃតាមយុទ្ធសាស្ត្រប្តូរកណ្តាប់ដៃ និងទាត់ ព្រោះការចាញ់លើកមុន និងបានស្មើកាលថ្មីៗនេះ គឺមានពិន្ទុប្រផិតប្រផើយគ្នាណាស់»។
យ៉ាងណាក៏ដោយ លោក ឈិន ក្វាន់ចៃ បានទម្លាយពីការធ្លាក់ចុះផ្នែកកម្លាំងរបស់ រឿង សោភ័ណ្ឌ ដោយលោកបញ្ជាក់ថា៖ «រឿង សោភ័ណ្ឌ មួយរយៈចុងក្រោយនេះកម្លាំងធ្លាក់ចុះដែរ ប៉ុន្តែវាស្រឡាញ់កិត្តិយស ដោយប្រកួតមានចិត្តក្លាហានជានិច្ច។ ទោះសុខភាព មិនប្រសើរ ក៏ រឿង សោភ័ណ្ឌ មិនងាយទម្លាយឲ្យគេដឹងដែរ ហើយក៏មិនងាយចាញ់គេ ដោយសន្លប់នោះដែរ»។
ចំណែក លោក អេ ភូថង ជា គ្រូបង្វឹក និង ធឿន ធារ៉ា មិនអាចទំនាក់ទំនងសុំសម្ភាសបានទេ ប៉ុន្តែមួយរយៈនេះ ធឿន ធារ៉ា ឡើងប្រកួតសឹងតែរាល់សប្តាហ៍ ហើយភាគច្រើនឈ្នះ និងមានភាពរឹងមាំជាងមុន។ មិត្តភត្តិអ្នកសិទ្ធិជាមួយ ធឿន ធារ៉ា បានប្រាប់ថា៖ «ឥឡូវ ធារ៉ា ហាត់បានល្អ និងខ្លាំងជាងមុន ព្រោះកាលមុនវារវល់មើលកូន ជំនួសប្រពន្ធ ដែលធ្វើការរោងចក្រ មិនសូវបានហាត់ពេញលេញ»៕