ភ្នំពេញ: រឿង សោភ័ណ្ឌ មកពីក្លិបមកុដរាជសីហ៍នៃសមាគមប្រដាល់ក្រសួងមហាផ្ទៃ ដែលកំពុងគ្រប់គ្រងខ្សែក្រវាត់ចំនួន ៨ នោះ នឹងត្រូវប្រកួតជាមួយថៃ Thut Tidath ដែលជាកីឡាករថៃចំណូលថ្មីនៅសង្វៀនអាស៊ីអាគ្នេយ៍ (SEATV) នាយប់ថ្ងៃសៅរ៍ ទី ២១ ខែកក្កដា ឆ្នាំ ២០១៨។
រឿង សោភ័ណ្ឌ បានសម្តែងការព្រួយបារម្ភចំពោះការប្រកួតលក្ខណៈមិត្តភាពអន្តរជាតិនេះ ស្របពេលដែលបានទទួលដំណឹងថា ប្រវត្តិប្រកួតរបស់កីឡាករថៃរូបនេះមានបទពិសោធប្រកួតបានតិច ដែលជាអាចជាការលាក់ប្រវត្តិ។ រយៈពេល ២ ឆ្នាំចុងក្រោយនេះ រឿង សោភ័ណ្ឌ ប្រកួតកម្រចាញ់ណាស់ពោលគឺប្រហែល ៨០ ភាគរយឈ្នះដោយផ្តួលដៃគូឲ្យសន្លប់ ពិសេសរយៈជាង ២ ឆ្នាំចុងក្រោយនៅសង្វៀន CNC ប្រហែលជាង ៣០ ប្រកួត រូបគេមិនដែលចាញ់ទាល់តែសោះ។
ជាមួយគ្នានេះ គណៈកម្មការផ្គូផ្គងប្រចាំសង្វៀន CNC កំពុងសហការជាមួយអ្នកផ្គូផ្គងរបស់ថៃ ដើម្បីស្វែងរកជើងខ្លាំងថៃដើម្បីដាក់ឲ្យប្រកួត និងមានប្រៀបឈ្នះរឿង សោភ័ណ្ឌ វិញម្តង។
រឿង សោភ័ណ្ឌ នឹងត្រូវប្រកួតជាមួយថៃ Thut Tidath នៅថ្ងៃសៅរ៍ លើសង្វៀន SEATV ខណៈដែលប្រវត្តិប្រកួតរបស់កីឡាករថៃរូបនេះ ត្រូវបានគេផ្តល់ដំណឹងមកថា ប្រកួតតិចជាងរឿង សោភ័ណ្ឌ រហូតដល់ ១០៥ លើក ហាក់ដូចជាមិនមែនជាព័ត៌មានពិត។ រឿង សោភ័ណ្ឌ បានឆ្លងកាត់ការប្រកួតបានចំនួន ១៦០ លើក ឈ្នះ ១៤៥ លើកចាញ់ ១២ លើក និងស្មើ ៣ លើក ក្នុងនោះផ្តួលដៃគូឲ្យសន្លប់បានចំនួនជាង ៥០ លើក ហើយរយៈពេល ២ ឆ្នាំចុងក្រោយ រូបគេប្រកួតមិនដែលចាញ់សោះសរុបឈ្នះខ្សែក្រវាត់ចំនួន ៨ និងពានចំនួន ២ ដែលជាអ្នកប្រដាល់ឈ្នះខ្សែក្រវាត់ច្រើនជាងគេនៅកម្ពុជា និងតាមពីក្រោយដោយកីឡាករឡុង សុភី ដែលមានខ្សែក្រវាត់ចំនួន ៧ ស្ថាប័ន។
ដៃគូប្រដាល់សប្តាហ៍នេះជាមួយរឿង សោភ័ណ្ឌ គឺកីឡាករថៃ Thut Tidath ហើយតាមប្រភពពីគណៈកម្មការផ្គូផ្គងសង្វៀនអាស៊ីអាគ្នេយ៍ កីឡាករថៃរូបនេះប្រកួតបានចំនួនតែ ៥៥ លើក ឈ្នះ ៤៥ លើក ចាញ់ ១០ លើក និងមានកម្ពស់ ១,៧០ ម៉ែត្រ។
រឿង សោភ័ណ្ឌ បាននិយាយថា៖ «ការប្រកួតនេះ ខ្ញុំមិនទាន់ហ៊ានធានាឈ្នះ ១០០ ភាគរយបានឡើយ ពីព្រោះស្ថិតិចំនួនប្រកួតរបស់ថៃនេះទំនងដូចជាលាក់ប្រវត្តិ និងអាចជាចំនួនមិនពិតគឺបន្ថយ ពីព្រោះតាមរយៈវីដេអូយូធូបខ្ញុំឃើញ Thut Tidath វ៉ៃល្អ មានស្នៀតជង្គង់ល្អ ព្រមទាំងមានកម្ពស់ខ្ពស់ អាចនិយាយបានថា ជាកំពូលអ្នកខ្លាំងមួយរូបនៅសង្វៀនប៉ុស្តិ៍លេខ ៨ ថៃ»។
សោភ័ណ្ឌ បានបន្ថែមថា៖ «តាមការឲ្យដឹងពីប្រវត្តិនោះ រូបគេក៏ធ្លាប់ឈ្នះខ្សែក្រវាត់នៅថៃផងដែរ។ ទោះជាសមត្ថភាពកម្រិតណាក៏ត្រូវតែប្រុងប្រយ័ត្ន និងការពារជ័យជម្នះឲ្យបាន ១០០ ភាគរយ ប៉ុន្តែបញ្ហាដែលបារម្ភគឺគេខ្ពស់ជាង លំបាកវាយប៉ុណ្ណោះ និងមិនដឹងច្បាស់ថា គេខ្លាំងកម្រិតណានោះឡើយ»។
លោកញាន សុធី នាយកគ្រប់គ្រងកម្មវិធីប្រចាំសង្វៀនប្រដាល់ SEATV ប្រាប់ភ្នំពេញ ប៉ុស្តិ៍ ថា៖ «កីឡាករថៃ Thut Tidath នេះមិនធ្លាប់មកប្រកួតនៅស្រុកខ្មែរទេ ប៉ុន្តែតាមការផ្គូផ្គងពីប្រតិភូថៃបង្ហើបឲ្យដឹងថា គេមានសមត្ថភាពល្អថ្នាក់មធ្យម មិនមែនជើងខ្លាំងស៊េរី A នៅប្រទេសថៃទេ ប៉ុន្តែមានកម្ពស់ខ្ពស់ជាងរឿង សោភ័ណ្ឌ ហើយជាទូទៅ ក្បាច់ប្រកួតរបស់កីឡាករថៃភាគច្រើនគឺជំនាញប្រើក្បាច់ជង្គង់នេះតែម្តង»។
លោកញាន សុធី បានបន្ថែមថា៖ «យើងមិនអាចវាយតម្លៃមុនប្រកួតបានទេ ក្នុងការប្រកួតទម្ងន់ធ្ងន់បែបនេះ ប៉ុន្តែការឈ្នះចាញ់ វាជារឿងតឹងតែងមិនខាន ហើយមួយរយៈកន្លងមកនេះ កីឡាករថៃដែលជ្រើសរើសខ្លាំងៗមកប៉ះជាមួយរឿង សោភ័ណ្ឌ ដែលបរាជ័យក្រោមដៃរបស់គេ»៕