ភ្នំពេញ៖ កីឡាករ រឿម វណ្ណៈ បានជួបនៅសំណាងដ៏ល្អមួយ គឺរូបគេត្រូវបានគណៈកម្មការសម្រេចឲ្យឈ្នះដោយមិនចាំបាច់ប្រកួត ខណៈដៃគូប្រជែង សារឿន ច័ន្ទ មានជំងឺមិនអាចមកប្រកួតបាននោះ ប៉ុន្តែ គង់ សំបូរ និង សោម វិឆ័យ ត្រូវប្រកួតគ្នា រកអ្នកឈ្នះ ឡើងទៅវគ្គ ៣ នៃពាន TV5 Boxing Knock Out Serie នៅសង្វៀនប៉ុស្តិ៍លេខ ៥ នាយប់ថ្ងៃសៅរ៍នេះ ហើយ ឡុង សុភី ត្រូវដាក់ឲ្យប្រកួតមិត្តភាពជាមួយថៃ Ka Khunsoek ក្នុងថ្ងៃនោះដែរ។
តាមរយៈការឈ្នះ សារឿន ច័ន្ទ ដោយស្វ័យប្រវត្តិនេះ បានជួយឲ្យ រឿម វណ្ណៈ ឡើងទៅដល់វគ្គ ៣ យ៉ាងស្រួល ប៉ុន្តែ រឿម វណ្ណៈ ក៏ត្រូវដាក់ឲ្យប្រកួតជាមួយជើងខ្លាំងជំនាន់ក្រោយ ថៃ រ៉េត កំដរឆាកបង្គ្រប់កិច្ចផងដែរ ហើយតាមកម្រិតក្បាច់គុន និងកម្លាំងទឹកចិត្តប្រយុទ្ធ រឿម វណ្ណៈ អាចលំបាកយកឈ្នះ ថៃ រ៉េត ណាស់ ខណៈប្រភពពីគណៈកម្មការបានទម្លាយថា បើ រឿម វណ្ណៈ វ៉ៃមិនអស់ពីសមត្ថភាព ឬលំៗកៅអីវគ្គ ៣ ត្រូវដកយកវិញ។
ចំណែកការជួបគ្នារវាងជើងចាស់វស្សាដូចគ្នា គឺ សោម វិឆ័យ និង គង់ អាចនឹងមានភាពតានតឹង។ គង់ សំបូរ ទើបតែផ្តួលកីឡាករមកពីប្រទេស ម៉ារ៉ុក ឲ្យសន្លប់ នៅលើសង្វៀម Mas Fight Cambodia ប៉ុន្តែ សោម វិឆ័យ ទើបតែចាញ់ ថៃ រ៉េត ដោយពិន្ទុកាលពីសប្តាហ៍មុន។ ទោះបីយ៉ាងណា គង់ សំបូរ និង សោម វិឆ័យ មានសមត្ថភាពប្រហាក់ប្រហែលគ្នា ហើយធ្លាប់ចាញ់ឈ្នះគ្នាទៅវិញទៅមក ប៉ុន្តែមួយរយៈចុងក្រោយនេះ សោម វិឆ័យ ធ្លាក់ចុះជាងមុន ដែលគេហ៊ានវាយតម្លៃថា គង់ សំបូរ មានភាគរយឈ្នះច្រើនជាង តែការចាញ់ ឬឈ្នះ សុទ្ធតែឈឺខ្លួនដូចគ្នាមិនមែនស៊ីផុយនោះឡើយ។
ការវិលមកជួបគ្នារបស់ គង់ សំបូង និង សោម វិឆ័យ ត្រូវបានគេគិតថា នឹងប្រជែងតឹងតែង។ លោក ជា រិទ្ធិ គ្រូបង្វឹក គង់ សំបូរ និយាយថា គង់ សំបូរ នឹងបន្តឈ្នះឡើងទៅកាន់វគ្គទី ៣ ក្នុងភាគរយខ្ពស់ គឺ ៨០ ភាគរយ។ ចំណែកលោក ឡុង វិបុល គ្រូបង្វឹក សោម វិឆ័យ អះអាងថា នឹងវ៉ៃក្បាច់កែង និងជង្គង់ ដើម្បីយកឈ្នះ ដោយលោកមានទំនុកចិត្តឈ្នះ ៦០ ភាគរយ ប៉ុន្តែប្រភពក្រៅផ្លូវការមួយចំនួន គេមានជំនឿថា គង់ សំបូរ មានប្រៀបឈ្នះខ្ពស់ជាង។
ដោយឡែកអ្នកលេងស្នៀតជង្គង់ ឡុង សុភី នឹងត្រូវប្រកួតជាមួយថៃ Ka Khunsoek ជំនួស រឿង សោភ័ណ្ឌ ដែលត្រូវបានដោះដូរ ដោយសារបញ្ហាសុខភាព។ Ka Khunsoek ត្រូវបានគេកត់សម្គាល់ឃើញថា ចិត្តធំល្អ ប៉ុន្តែល្បិចវាយក្បាច់ជង្គង់អាចចាញ់ប្រៀប ឡុង សុភី។
ការប្រកួតរបស់ ឡុង សុភី បើព្រឹត្តិការណ៍តូច លុយតិច ប្រកួតមិនសូវល្អ តែបើលុយច្រើនវិញ គេវ៉ៃល្អណាស់ ចំណែកការប្រកួតនេះ ឡុង សុភី បាននិយាយថា មានទំនុកចិត្តឈ្នះ ៦០ ភាគរយ ប៉ុន្តែតាមរយៈសមត្ថភាពពិត ឬការហ្វឹកហាត់បានល្អវិញ ឡុង សុភី ក៏អាចវ៉ៃថៃ Ka Khunsoek ឲ្យសន្លប់ក្នុងទឹកណាមួយបានដែរ។
ចំណែកការប្រកួតរវាងអ្នកប្រដាល់រួមជាតិ ក្រៅព្រឹត្តិការណ៍ពានរង្វាន់វិញ ភួង ពិសិដ្ឋ ក្លិបតាឡីដំរីមានរិទ្ធ ត្រូវជួប សៀវ ង៉ុយ របស់ក្លិប កងពលធំអន្តរាគមន៍លេខ ២ ក្នុងទម្ងន់ ៦០ គីឡូក្រាម ហើយ ពេជ្រ វិចិត្រ ក្លិបចលនាយុវជន ១៥៧ គុនខ្មែរ ប្រកួតជាមួយ កីឡាករ សៅ មនោ ក្លិបថ្នល់ទទឹងគុនខ្មែរក្នុងប្រភេទទម្ងន់ ៥១ គីឡូក្រាម៕