ភ្នំពេញៈ កីឡាករកម្ពុជា លន បញ្ញា ហាក់មានទំនុកចិត្តខ្លាំងក្នុងការយកឈ្នះថៃ Yourt Kangyou សម្រាប់ការប្រកួតជម្រុះសន្សំពិន្ទុលើកចុងក្រោយនៅលើសង្វៀន SEATV នាថ្ងៃសៅរ៍ ដើម្បីបញ្ចប់ភាពមន្ទិលក្នុងការទទួលបានឱកាសឡើងទៅប្រកួតផ្តាច់ព្រ័ត្រដណ្តើមខ្សែក្រវាត់ Wurkz ប៉ុន្តែ ធឿន ធី អាចនឹងលំបាកពេលវិលមកជួបជើងខ្លាំងថៃ Chhav Vallith។
ការប្រកួតជម្រុះ ៣ លើកកន្លងមកនេះ លន បញ្ញា បានឈ្នះ ២ និងចាញ់ ១ ខណៈកីឡាករកម្ពុជា ៣ នាក់ទៀតឈរនៅពូលជាមួយគ្នាដូចជា ធឿន ធី ចាញ់ទាំង ៣ លើក ឯ ហេង វាសនា និង សារឿន ច័ន្ទ ឈ្នះ ១ ចាញ់ ២ ដូចគ្នា។ ហេតុនេះបើទោះបីជា លន បញ្ញា ចាញ់លើកនេះក៏នៅមានទិន្នន័យខ្ពស់ជាងក្នុងការឈរនៅលំដាប់លេខ ១ ក្នុងពូលដែរតាមរយៈការផ្តួលដៃគូឲ្យសន្លប់ប្រើពេលខ្លី និងលឿនជាងគេ។
ដោយឡែកសម្រាប់ការជួបថៃ Yourt Kangyou ដែលមានសមត្ថភាពមិនខ្លាំងគឺ ៣ ប្រកួតកន្លងមកឈ្នះ ១ និងចាញ់ ២ ប្រកួតលើកនេះ លន បញ្ញា បាននិយាយថា៖ «ខ្ញុំហ្វឹកហាត់បានល្អ ហើយធានាប្រកួតឈ្នះ Yourt Kangyou ក្នុងទំនុកចិត្ត ១០០ ភាគរយ»។
ចំណែកលោក ធន់ សុភា ជាគ្រូបង្វឹកនិយាយថាមានទំនុកចិត្តឈ្នះដោយគ្មានអ្វីជាឧបសគ្គនោះទេ។ លោកនិយាយថា៖ «ការប្រកួតវគ្គជម្រុះនេះមិនលំបាកទេ ប៉ុន្តែអ្វីដែលព្រួយបារម្ភនោះគឺពេលទៅជួបថៃ Supper Man នៅវគ្គផ្តាច់ព្រ័ត្រគឺជាការត្រូវព្រួយ»។
ចំណែកលោក ថៃ អ៊ូ អ្នកគ្រប់គ្រងកីឡាករថៃក៏ទទួលស្គាល់ថាសមត្ថភាពក្បាច់គុនរបស់កីឡាករ លន បញ្ញា មានប្រៀបជាង Yourt Kangyou ដែរ ប៉ុន្តែចាំមើលការប្រកួតជាក់ស្តែងទៅទើបច្បាស់។ លោកបន្តថា៖ « Yourt Kangyou មិនងាយចាញ់ដោយសន្លប់ទេ ហើយការវាយរបស់គេសុទ្ធតែ ៥ ទឹក និងនៅមានកម្លាំងរឹងមាំ»។
ចំណែក ធឿន ធី លំបាកយកឈ្នះជើងខ្លាំងថៃ Chhav Vallith ណាស់។ សមត្ថភាពលំដាប់ ធឿន ធី ទោះជាប្រឹងប្រែងយ៉ាងណាក៏មានភាគរយតិច អាចយកឈ្នះកីឡាករថៃដែរ ព្រោះ ធឿន ធី មានបទពិសោធនៅខ្ចីវស្សាណាស់ ខណៈ ៣ ប្រកួតកន្លងមកបានចាញ់ទាំងអស់ហើយចុងក្រោយនេះប៉ះជើងខ្លាំងទៀត។
កីឡាករ ធឿន ធី បានប្រាប់ថា៖ «ទោះបីការប្រកួតប៉ះចំគេខ្លាំង ប៉ុន្តែខ្ញុំនៅតែប្រឹងប្រកួតអស់ពីសមត្ថភាព ដើម្បីមានកេរ្តិ៍ឈ្មោះសម្រាប់ពេលក្រោយៗទៀត ហើយការប្រកួតចាញ់ក្នុងអំឡុងខ្សែក្រវាត់នេះចំនួន ៣ លើកកន្លងមកនេះគឺដោយសារតែគេខ្លាំងមានសមត្ថភាពល្អជាងខ្ញុំ»៕