ភ្នំពេញ: ការប្រកួតជម្រុះដណ្តើមខ្សែក្រវាត់ Wurkz ទម្ងន់ ៦០ គីឡូក្រាមនៅសង្វៀន SEATV រាល់ៗល្ងាចថ្ងៃអាទិត្យបានរកឃើញអ្នកប្រដាល់ដែលមានឈ្មោះឡើងទៅប្រកួតនៅវគ្គផ្តាច់ព្រ័ត្រហើយ ទោះបីជានៅសល់វគ្គជម្រុះ ១ សប្តាហ៍ទៀតក៏ដោយ ព្រោះការប្រកួតនៅសល់នោះគ្រាន់តែជាការប្រកួតបង្គ្រប់កិច្ចតាមរូបមន្តតែប៉ុណ្ណោះ។
តាមរយៈការប្រកួតចំនួន ៨ សប្តាហ៍កន្លងមក និងការប្រកួតបញ្ចប់វគ្គចម្រុះកាលពីថ្ងៃអាទិត្យ គណៈកម្មការបានបូកសរុបឃើញថានៅពូល A មានកីឡាករ លន បញ្ញា មកពីសមាគមប្រដាល់ក្រសួងការពារជាតិ និងកីឡាករថៃ Supper Man បានឡើងទៅវគ្គផ្តាច់ព្រ័ត្រនៅចុងខែមីនាដើម្បីដណ្តើមយកខ្សែក្រវាត់ និងទឹកប្រាក់អមចំនួន ៥០០០ ដុល្លារអាមេរិក។
កីឡាករ លន បញ្ញា ដែលឆ្លងកាត់ការប្រកួតបាន ៤ លើកជាមួយថៃគឺបានឈ្នះ ៣ និងចាញ់ ១ ដងមាន ១០ ពិន្ទុដើម្បីទទួលបានចំណាត់ថ្នាក់លេខ ១ ប្រចាំពូលកម្ពុជា រីឯកីឡាករកម្ពុជា ៣ នាក់ទៀតមាន សារឿន ច័ន្ទ មកពីក្លិបតាព្រហ្មមានជ័យ ហេង វាសនា របស់ក្លិបព្រៃទទឹងខេត្តបាត់ដំបង និង ធឿន ធី មកពីខេត្តសៀមរាបសុទ្ធតែធ្លាក់ចេញទាំងអស់។
ដោយឡែកអ្នកប្រដាល់ថៃ Supper Man ទោះបីនៅសល់មួយប្រកួតទៀតក៏ដោយ ក៏ទទួលបានឱកាសឡើងទៅវគ្គផ្តាច់ព្រ័ត្រតំណាងឲ្យពូលថៃផងដែរ ព្រោះ ៣ ប្រកួតកន្លងមកគេបានឈ្នះទាំង ៣ មាន ៩ ពិន្ទុ។ ហេតុនេះ បើទោះបីជា Super Man ចាញ់នាការប្រកួតចុងក្រោយក៏នៅតែមានឱកាសឡើងដដែល។
សម្រាប់ការប្រកួតកាលពីល្ងាចថ្ងៃអាទិត្យ លន បញ្ញា បានយកឈ្នះលើថៃ YorthKatangyou ក្នុងពិន្ទុ ៥ ទល់ ០ ប៉ុន្តែក្នុងលក្ខណៈតឹងតែងបំផុតដែលតស៊ូរហូត ៥ ទឹកពេញ។ នៅ ៣ ទឹកដំបូង លន បញ្ញា មានប្រៀបពិន្ទុនាំមុខដោយក្បាច់ជង្គង់ និងវាយចេញបានល្អ ហើយ ២ ទឹកចុងក្រោយមានប្រៀបបន្តិចបន្តួចដោយទទួលរងស្នៀតទាត់យ៉ាងច្រើនពី Yorth Katangyou។
ចំណែកកីឡាករ ធឿន ធី បានទប់ទល់ជាមួយថៃ Chhav V-allit ត្រឹមទឹកទី ៣ ប៉ុណ្ណោះ។ លទ្ធផលនេះបានធ្វើឲ្យការប្រកួតរបស់ ធឿន ធី ចំនួន ៤ លើកក្នុងអំឡុងវគ្គជម្រុះដណ្តើមខ្សែក្រវាត់នេះគឺបានចាញ់អ្នកប្រដាល់ថៃទាំងអស់ ប៉ុន្តែការប្រកួតរបស់ ធឿន ធី គឺប្រឹងប្រែងអស់ពីសមត្ថភាព។
លោក ញាន សុធី នាយកគ្រប់គ្រងការប្រកួតប្រចាំសង្វៀន SEATV បានប្រាប់ថា៖ «សមាសភាពឡើងទៅវគ្គផ្តាច់ព្រ័ត្រលើកនេះគឺល្អ ហើយសមត្ថភាពរបស់អ្នកប្រដាល់ទាំង ២ សុទ្ធតែខ្លាំងដូចគ្នាហើយកម្មវិធីវគ្គផ្តាច់ព្រ័ត្រនេះយើងទុកពេលចំនួន ២ សប្តាហ៍ដើម្បីឲ្យកីឡាករហ្វឹកហាត់បានល្អនឹងត្រៀមការប្រកួត ដែលត្រូវធ្វើនៅថ្ងៃអាទិត្យទី ៣១ ខែមីនា ឆ្នាំ ២០១៩»។
ចំណែកលោក ធន់ សុភា គ្រូបង្វឹករបស់កីឡាករ លន បញ្ញា បាននិយាយថា៖ «ការប្រកួតវគ្គផ្តាច់ព្រ័ត្រជាមួយ Supper Man ដើម្បីដណ្តើមខ្សែក្រវាត់ និងប្រាក់ចំនួន ៥០០០ ដុល្លារនេះគឺជាការប្រកួតមួយដ៏តឹងតែងបំផុត ប៉ុន្តែយើងសល់ពេល ២ សប្តាហ៍ក្នុងការបង្វឹកឲ្យ លន បញ្ញា មានកម្លាំងថែទាំសុខភាព ព្រមទាំងបង្កើនក្បាច់គុន និងស្នៀតប្រយុទ្ធឲ្យបានល្អ»។
គួររំឭកថាកីឡាករ លន បញ្ញា ធ្លាប់បានចាញ់ជើងខ្លាំងរបស់ថៃ Supper Man យ៉ាងគ្រាំគ្រាម្តងហើយសម្រាប់ការជួបគ្នាក្នុងវគ្គជម្រុះសន្សំពិន្ទុ៕