.jpg)
យ៉េន ឌីណា (ក្រហម) បានព្យាយាមទប់ការវាយសម្រុករបស់ លន បញ្ញា សម្រាប់ការជួបគ្នា នៅសង្វៀន PNN កន្លងមក។ រូបថត ឈន ណន
ភ្នំពេញ៖ ការវិលមកជួបគ្នារវាងកីឡាករជម្រើសជាតិគុនខ្មែរ លន បញ្ញា និង យ៉េន ឌីណា (ប៉ោ ភារិទ្ធ) នៅលើសង្វៀនបាយ័ន នាយប់ថ្ងៃសុក្រនេះ បានធ្វើឱ្យមានការចាប់អារម្មណ៍ខ្លាំងពីអ្នកទស្សនា ព្រោះអ្នកទាំង ២ នេះ សុទ្ធតែជើងខ្លាំង ហើយអ្វីដែលកាន់តែពិសេសនោះ គឺនេះជាការប្រកួតសងសឹក នៅក្នុងប្រភេទទម្ងន់៦៣,៥គីឡូក្រាម ដែលជាទម្ងន់ពិតរបស់ យ៉េន ឌីណា ផងដែរ ប៉ុន្តែភាគី លន បញ្ញា នៅតែមានការជឿជាក់ថា នឹងដណ្តើមបានជ័យជម្នះជាថ្មីម្តងទៀត។
នៅក្នុងរយៈកាលចុងក្រោយនេះ លន បញ្ញា ល្បីខ្លាំង ដោយបានផ្តួលជើងចាស់មួយចំនួនឱ្យសន្លប់ មានដូចជា មុត ខ្លឹមខ្មៅ, ផល សោភ័ណ្ឌ និង គង់ សំបូរ ជាដើម ពិសេសរូបគេ ក៏ធ្លាប់យកឈ្នះ យ៉េន ឌីណា នៅសង្វៀន PNN កាលពីចុងឆ្នាំ ២០២០ ផងដែរ។
ចំណែកខ្លាចាស់ចិត្តធ្ងន់ វ៉ៃតាមបច្ចេកទេស យ៉េន ឌីណា វ៉ៃមិនកាចទេ តែស្រង់យកពិន្ទុបានល្អ។ សិស្សរបស់លោក អេ ភូថង រូបនេះ បានឈ្នះស្ទើរគ្រប់ប្រកួតទៅហើយក្នុងពេលបច្ចុប្បន្ននេះ ជាពិសេសនៅសង្វៀន CNC ដោយរូបគេទើបតែ សូត្រ ប៊ុនធី, ឡុង ប៉េនលឿន និងឡុង សំណាង ដែលសុទ្ធតែជាជើងខ្លាំង។
ទោះយ៉ាងណា លោក ធន់ សុភា គ្រូបង្វឹក លន បញ្ញា បាននិយាយថា៖ «កម្លាំង និងការវាយលុករបស់ លន បញ្ញា នឹងយកឈ្នះ យ៉េន ឌីណា ម្តងទៀត ជាមិនខាន។ ទោះជាយ៉ាងណាមិនមែនស៊ីផុយទេ ប្រោះល្បិចរបស់ យ៉េន ឌីណា ចាំឆ្មក់ ទាត់ល្អ និងកែងល្អ គឺមានប្រសិទ្ធភាពណាស់»។
អតីតជើងខ្លាំង ធន់ សុភា បានប្រាប់បន្ថែមទៀតថា៖«ចំណុចខ្សោយរបស់ លន បញ្ញា អាចចាញ់ ដោយភ្លាត់ស្នៀតចូលកែង តែមួយស្នៀតប៉ុណ្ណោះ ប៉ុន្តែក្រៅពីនេះ មានប្រៀបផ្នែកកម្លាំងទាំងស្រុង គឺនិយាយទៅ មានភាគរយឈ្នះខ្ពស់ជាង»។
ចំណែកលោក ពេជ្រ សុផាន់ ដែលជាសិស្សច្បងរបស់ យ៉េន ឌីណា តែបានវិវឌ្ឍខ្លួនមកជាគ្រូបង្វឹកម្នាក់ទៅហើយនោះ បាននិយាយថា៖ «យ៉េន ឌីណា អាចទប់ទល់បាន ព្រោះ លន បញ្ញា អាចមានបញ្ហាលំបាកបញ្ចុះទម្ងន់ ពី ៦៧ គីឡូក្រាម មកវ៉ៃក្នុង ៦៣,៥ គីឡូក្រានេះ គឺមិនមែនចេះតែវាយសម្រុកបាននោះទេ គឺអាចគ្រោះថ្នាក់ ដោយសារការចាំស្រង់របស់ ឌីណា ក៏ថាបាន ប៉ុន្តែគូនេះ គឺនឹងជក់ចិត្តខ្លាំង ព្រោះមួយអាងកម្លាំង រីឯមួយទៀត អាងវាយឆ្មក់»។
គួរបញ្ជាក់ថា ទាំង យ៉េន ឌីណា និង លន បញ្ញា សុទ្ធតែប្រកួតដណ្តើមបានមេដាយមាស ក្នុងការប្រកួតប្រដាល់គុនខ្មែរថ្នាក់ជាតិ ប្រចាំឆ្នាំ ២០២១ នេះ ក្នុងប្រភេទទម្ងន់ខុសគ្នា។ បន្ថែមលើសពីនេះ ពួកគេសុទ្ធតែជាអ្នកប្រដាល់ ធ្លាប់ឈ្នះខ្សែក្រវាត់ពីសង្វៀនឯកជនដូចគ្នា គ្រាន់តែ យ៉េន ឌីណា ជាជើងចាស់ ឯ លន បញ្ញា ជាជើងថ្មីជាង៕
