.jpg)
លន បញ្ញា បានទាត់សន្ធាប់ទៅលើអ្នកប្រដាល់ជើងចាស់របស់ថៃ Re Da នៅក្នុងការប្រកួតមិត្តភាពអន្តរជាតិពីថ្ងៃសៅរ៍។ រូប ពន្លក
ភ្នំពេញៈ អ្នកប្រដាល់គុនខ្មែរ លន បញ្ញា មកពីសមាគមកីឡាប្រដាល់ក្រសួងការពារជាតិដែលទើបតែឈ្នះបានខ្សែក្រវាត់ WURKZ ក្នុងទម្ងន់ ៦០ គីឡូក្រាមថ្មីៗកន្លងមកនេះបានឡើងប្រកួតជាមួយកីឡាករជើងចាស់ថៃ Re Da ហើយរក្សាជ័យជម្នះរបស់ខ្លួនបានយ៉ាងល្អ ប៉ុន្តែក៏ឈឺខ្លួនបន្តិចដែរ ចំណែកអ្នកលេងកណ្តាប់ដៃធ្ងន់ យុគ យក្សផ្លែ មកពីក្លិបបូរីរាជសីហ៍មានរិទ្ធ បានផ្តួលកីឡាករថៃ Yout Chhai ឲ្យសន្លប់ត្រឹមទឹកទី ៣ ដើម្បីស្តារមុខមាត់ឡើងវិញក្នុងទម្ងន់ ៥៧ គីឡូក្រាម ហើយការប្រកួតនេះបានធ្វើឲ្យកក្រើកសង្វៀនអាស៊ីអាគ្នេយ៍កាលពីល្ងាចថ្ងៃសៅរ៍។
លន បញ្ញា ដែលទើបតែឈ្នះដណ្តើមបានខ្សែក្រវាត់ពីជើងខ្លាំងរបស់ថៃ Supper Man ទាំងចម្រូងចម្រាសកន្លងមកនេះបានការពារកិត្តិយសល្អប្រសើរ ទោះបីជាការប្រកួតនេះមានលក្ខណៈតឹងតែងក្នុងពេលប៉ះជាមួយជើងចាស់ថៃ Re Da ក៏ដោយ។ ក្នុងស្ថានភាពប្រកួតទាំង ៥ ទឹក Re Da បានធ្វើឲ្យ លន បញ្ញា ស្ថិតក្នុងលក្ខណៈលំបាកនៅក្នុង ២ ទឹកដំបូង ជាពិសេសនៅក្នុងទឹកទី ២ តែម្ដងដោយសារស្នៀតទាត់ល្វែងក្រោម និងកណ្តាប់ដៃស្តាំធ្ងន់ៗចូលផ្ទៃមុខ បានធ្វើឲ្យ លន បញ្ញា ពិបាកនឹងវាយតបតវិញបាន និងមានប្រៀបពិន្ទុលើ លន បញ្ញា ផងដែរ។
ប៉ុន្តែការប្រកួត ៣ ទឹកចុងក្រោយ លន បញ្ញា បានប្តូរយុទ្ធវិធីដោយបញ្ចេញក្បាច់ជង្គង់ចូលចំគោលដៅបានល្អព្រមទាំងបញ្ចេញស្នៀតទាត់សន្ធប់ជាច្រើនទៅលើ Re Da ធ្វើឲ្យគូប្រកួតខ្លួនទ្រុឌទ្រមកម្លាំងកាន់តែខ្សោយជាងមុន មិនសូវហ៊ានចូលវាយសម្រុកទៀត ហើយស្ថានភាពប្រកួតបែបនេះបានជួយឲ្យ លន បញ្ញា មានប្រៀបឈ្នះពិន្ទុដាច់តែម្តងដោយទទួលបានជ័យជម្នះសម្រាប់ការបង្ហាញខ្លួនជាថ្មីនៅសង្វៀន SEATV បន្ទាប់ពីរូបគេបានឈ្នះខ្សែក្រវាត់មកនោះគឺការពារជ័យជម្នះខ្លួនបានល្អ ប៉ុន្តែក៏ឈឺខ្លួនបន្តិចដែរទោះជាមានប្រៀបដាច់ខាងឱប និងឡើងជង្គង់ក៏ដោយ។
ដោយឡែកអ្នកលេងកណ្តាប់ដៃ យុគ យក្សផ្លែ បានស្វាគមន៍អ្នកប្រដាល់ថ្មីរបស់ថៃ Yout Chhai ដោយផ្តួលឲ្យសន្លប់ត្រឹមទឹកទី ៣។ នៅក្នុងការប្រកួត ២ ទឹកដំបូង យក្សផ្លែ មានសភាពលំបាកទប់ទល់នឹងកីឡាករថៃនេះដោយសារគូប្រកួតថ្មីរបស់ខ្លួននេះបានបោះជង្គង់ស្កាត់បានល្អ និងវាយលក្ខណៈប្រយោល មិនឲ្យ យក្សផ្លែ ចូលទៅជិតធ្វើឲ្យក្បាច់កណ្តាប់ដៃពិឃាតរបស់ យក្សផ្លែ វាយមិនត្រូវចំគោលដៅបានល្អនោះទេ។
ទោះជាយ៉ាងណាឈានចូលដល់ទឹកទី ៣ យក្សផ្លែ បានប្រើតែក្បាច់កណ្តាប់ដៃសុទ្ធដោយដើរចូលវាយសម្រុកគ្មានបន្ធូរដៃធ្វើឲ្យថៃ Yout Chhai ដួលនៅក្បែរសង្វៀន ហើយអាជ្ញាកណ្តាលលោក នួន បូរ៉ា បានរាប់ដល់ចំនួន ១០ ប៉ុន្តែកីឡាកររូបនេះនៅតែមិនអាចងើបរួចគឺសុំចុះចាញ់តែម្តង។
សម្រាប់លទ្ធផលផ្លូវការគឺ យុគ យក្សផ្លែ បានឈ្នះទទួលបានការគាំទ្រពីមហាជនយ៉ាងសប្បាយរីករាយ។ ចំណែកគូថ្នាក់ជាតិដែលប្រកួតជក់ចិត្តគឺកីឡាករ រឿន សុខលី មកពីក្លិបព្រែកឯងកីឡាបានប្រកួតឈ្នះកីឡាករជម្រើសជាតិក្នុងទម្ងន់ ៥៤ គីឡូក្រាមគឺ សូត្រ វាសនា មកពីក្លិបបក្សីស្លាបដែក ដោយពិន្ទុ៕
