ភ្នំពេញ៖ កីឡាករជាម្ចាស់ជើងឯកទម្ងន់ ៥៧ គីឡូក្រាម លាភ រដ្ឋា បានដំឡើងទម្ងន់ឡើងមកប្រកួតក្នុងទម្ងន់ ៦០ គ.ក្រ ជាមួយជើងខ្លាំងថៃ Kamlay Yuok ដែលធ្លាប់បង្ក្រាបកីឡាករខ្មែរច្រើននាក់មកហើយ ហើយអ្នកទាំង ២ ត្រូវដាក់ឲ្យប្រកួតគ្នានៅសង្វៀន SEATV នារសៀលថ្ងៃសៅរ៍នេះ គឺជាគូដែលមានសមត្ថភាពភាពវ៉ៃសម្រុក ដោយក្បាច់ចម្រុះ មិនដកថយដូចគ្នា ដែលសមគ្នាបំផុត។
សិស្សគណក្លិបដីឡូត៍មានរិទ្ធខេត្តបន្ទាយមានជ័យ លាភ រដ្ឋា ធ្លាប់ឈ្នះជើងឯកនៅសង្វៀន TV5 និងធ្លាប់ឈ្នះជើងឯករងនៅសង្វៀន SEATV នោះ មានប្រវត្តិប្រកួត ៦៨ ដងឈ្នះ ៥៣ ចាញ់ ១៣ និងស្មើ ២ ដង។ ចំណែក Kamlay Yuok ធ្លាប់ប្រកួតបាន ៩៥ ដង ឈ្នះ ៧៧ ដង ចាញ់ ១៧ និងស្មើ ១ ដង ប៉ុន្តែទឹកចិត្តប្រកួត និងកម្លាំងដៃ លាភ រដ្ឋា មានប្រៀបជាង តែ ចំណែក KamlayYuok ក៏មានប្រៀបផ្នែកទាត់ និងជង្គង់ ព្រមទាំងទេពកោសល្យផ្លាស់ទី និងចេញចូលបានលឿនល្អជាងផងដែរ។
ជំនួបរវាងអ្នកទាំង ២ រូបនេះ គឺជាការកម្រ ដែលគេជឿថា នឹងវ៉ៃគ្នា ៥ ទឹក មិនងាយសន្លប់ឡើយ ហើយក៏អាចចាត់ទុកថា ជាគូដែលជក់ចិត្ត និងមានប្រជាប្រិយបំផុត ស្របពេលដែលក្បាច់ប្រកួតរបស់ពួកគេ គឺវាយសម្រុកមិនចេះដកថយ។
លោក ញាន សុធី នាយកគ្រប់គ្រងកម្មវិធីប្រចាំសង្វៀន SEATV បាននិយាយថា៖ «គូនេះដាក់ឲ្យប្រកួតគ្នាក្នុងលក្ខណៈសមបំផុត ព្រោះសមត្ថភាពវាយលុក ដូចគ្នា កម្ពស់ស្មើគ្នា និងទឹកចិត្តក្លាហានដូចគ្នា។ ទោះជាយ៉ាងណា ការចាញ់ ឬឈ្នះរបស់អ្នកទាំង ២ ពិតជាតឹងតែង និងលំបាកទស្សន៍ទាយណាស់ ដោយសារជំនាញបច្ចេកទេស រដ្ឋា ល្អដៃ ហើយ Kamlay Yuok ល្អជើង»។
ជាមួយគ្នានេះកីឡាករ ពុយ វណ្ណៈ របស់ក្លិបឃ្លាំងមឿងកីឡា ត្រូវបានដាក់ឲ្យប្រកួតជាមួយអ្នកប្រដាល់ថៃ Pek Thieng ក្នុងប្រភេទទម្ងន់ ៦៣,៥ គីឡូក្រាម។ គូនេះ ត្រូវបានគេវាយតម្លៃថា សមត្ថភាពរបស់ ពុយ វណ្ណៈ មិនអាចទៅរួចជាមួយ Pek Thieng បាននោះទេ ព្រោះក្នុងទម្ងន់នេះ កីឡាករខ្មែរច្រើនណាស់ បានចាញ់ក្រោមជង្គង់របស់ Pek Thieng ។
ពុយ វណ្ណៈ មានប្រវត្តិប្រកួតចំនួន ៧១ ដង ឈ្នះ ៥៣ ចាញ់ ១៦ និងស្មើ ២ ដង។ ចំណែក Pek Thieng វិញធ្លាប់ប្រកួតបាន ៧០ ដង ឈ្នះ ៥៨ ដង និងចាញ់ ១២ ដង ហើយជំនួបរវាងអ្នកប្រដាល់ទាំង ២ នាក់នេះ បើគ្មានអាថ៌កំបាំង ឬរឿងរ៉ាវអ្វីនៅពីក្រោយទេ ពុយ វណ្ណៈ គ្មានសមត្ថភាពអ្វីយកឈ្នះ Pek Thieng នោះឡើយ។
អ្នកគ្រូ សុខា ជាអ្នកគ្រប់គ្រងកីឡាករ ពុយ វណ្ណៈ បានប្រាប់ថា៖ «ស្នៀត ឬក្បាច់ប្រយុទ្ធ និងសមត្ថភាពរបស់ ពុយ វណ្ណៈ មិនល្អលើសថៃទេ ប៉ុន្តែគេជាកីឡាករគោរពវិន័យល្អ ហ្វឹកហាត់ល្អ តស៊ូក្នុងពេលប្រកួត។ ហេតុនេះ ពុយ វណ្ណៈ មានកម្លាំងប្រកួតធានាបានល្អ ហើយសង្ឃឹមឈ្នះ ៦០ ភាគរយ»៕