.jpg)
ភ្នំពេញ៖ អ្នកលេងកណ្តាប់ដៃ លាភ រដ្ឋា និង ធន់ អៀងឡៃ សុទ្ធតែមានការជឿជាក់ខ្ពស់ក្នុងការក្លាយជាម្ចាស់ប្រាក់លានក្នុងការប្រកួតម៉ារ៉ាតុងដណ្តើមប្រាក់លាន ទម្ងន់ ៥៧ គីឡូក្រាម នៃកម្មវិធី Mas Fight Cambodia នៅលើសង្វៀនថោន នាថ្ងៃអាទិត្យនេះ គឺអ្នកទាំង ២ ហាក់មិនបានចាប់អារម្មណ៍ទៅលើសមត្ថភាពរបស់បេក្ខភាព ២ នាក់ទៀតគឺ អេលីត កែវឡុង និង លន់ សៀកឡេង នោះទេ។
យ៉ាងណាក៏ដោយ ដោយសារការប្រកួតនេះ តម្រូវឲ្យអ្នកទាំង ៤ ធ្វើការចាប់ឆ្នោតគ្នា មុនការប្រកួតវគ្គជម្រុះមានត្រឹម ៣ ទឹក ដើម្បីរកអ្នកឈ្នះទាំង ២ នាក់ ឡើងទៅប្រកួតវគ្គផ្តាច់ព្រ័ត្រ ដែលត្រូវប្រកួតគ្នា ៩ នាទីពេញ គ្មានឈប់តាមច្បាប់ Mas Fight នោះ លាភ រដ្ឋា និង ធន់ អៀងឡៃ ហាក់បារម្ភខ្លាចចាប់ឆ្នោតប៉ះគ្នានៅវគ្គជម្រុះ ព្រោះនឹងមានម្នាក់ធ្លាក់ មិនបានឡើងទៅវគ្គផ្តាច់ព្រ័ត្រ។
លាភ រដ្ឋា បានប្រាប់ថា៖ «នៅក្នុងចំណោមអ្នកទាំង ៣ នាក់នេះ ទោះខ្ញុំចាប់ឆ្នោតប៉ះ ១ ណា ក៏ធានាយកឈ្នះបានដែរ ប៉ុន្តែបើប៉ះ ធន់ អៀងឡៃ វាលំបាកឈ្នះបន្តិច ព្រោះគេល្អដែរ។ ទោះយ៉ាងណាខ្ញុំនឹងប៉ះ ធន់ អៀងឡៃ នៅវគ្គណាមួយជាមិនខាន ប៉ុន្តែតាមរយៈការហ្វឹកហាត់បានល្អ និងតាំងចិត្តវ៉ៃយកលុយធំ ខ្ញុំសង្ឃឹមឈ្នះ ៩០ ភាគរយ តែការប្រកួតមានរយៈពេល ៩ នាទី មិនគិតពីពិន្ទុនោះ វាអាចជាបញ្ហាមួយ ដែលមិនអាចសម្រេចបំណង បើខ្ញុំមិនអាចផ្តួលដៃគូឲ្យសន្លប់បានទេនោះ»។
លាភ រដ្ឋា ជាកីឡាករលំដាប់ជំនាញប្រើកណ្តាប់ដៃ និងស្នៀតទាត់ដ៏អស្ចារ្យ ហើយក្នុងទម្ងន់ ៥៧ គីឡូក្រាមនេះ រដ្ឋា ធ្លាប់ចាញ់តែ ម៉ន សាម៉េត និង វ៉ាន់ វឿន ប៉ុណ្ណោះ។ ចំណែក ធន់ អៀងឡៃ ក៏មានសមត្ថភាពខ្ពស់ក្នុងទម្ងន់នេះដែរ ដោយធ្លាប់ចាញ់ ម៉ន សាម៉េត ដែរ ប៉ុន្តែទឹកចិត្តប្រកួតធំ និងមានមហិច្ឆតាក្លាហានចង់ឈ្នះខ្លាំង។ ធន់ អៀងឡៃ និយាយថា មិនធ្លាប់ប្រកួតគ្នាទេ ប៉ុន្តែធ្លាប់ស្គាល់ក្បាច់គុន លាភ រដ្ឋា និងសង្ឃឹមឈ្នះបាន។
ចំណែកលោក ធន់ សុភា ជាគ្រូបង្វឹកបាននិយាយថា៖ «អៀងឡៃ ហ្វឹកហាត់ត្រៀមបានល្អណាស់ ហើយការប្រកួតនេះ មានតែ លាភ រដ្ឋា ប៉ុណ្ណោះ ជាឧបសគ្គធំ ចំណែកកីឡាករ អេលីត កែវឡុង និង លន់ សៀកឡេង អាចនិយាយថា ឈ្នះដោយស៊ីផុយ»។
លោកបានបន្តថា៖ «ក្នុងករណី ធន់ អៀងឡៃ និង លាភ រដ្ឋា ត្រូវប៉ះគ្នាវគ្គផ្តាច់ព្រ័ត្រ គឺខ្ញុំសង្ឃឹមឈ្នះ ៧០ ភាគរយ ព្រោះទាំងការហ្វឹកហាត់ គោរពវិន័យ និងការថែរក្សាសុខភាពរបស់ អៀងឡៃ ល្អណាស់ ហើយមួយរយៈនេះ មិនដែលចាញ់ទេ និងទើបឈ្នះជើងចាស់ ឯម សុធី ផងដែរ ប៉ុន្តែ ធន់ អៀងឡៃ ក៏ពិបាកផ្តួល លាភ រដ្ឋា ឲ្យសន្លប់ ត្រឹមរយៈពេល ៩ នាទីនោះដែរ ដោយសារមានកម្លាំងរឹងមាំដូចគ្នា ហេតុនេះអ្នកទាំង ២ ក៏នឹងស្មើគ្នាផងដែរ»។
ចំណែកលោក ស៊ន អេលីត គ្រូបង្វឹក អេលីត កែវឡុង បាននិយាយថា៖ «កែវឡុង កំពុងល្អ តែនៅខ្ចីវស្សាជាង ហើយការដាក់ឲ្យប្រកួតនេះ គឺមិនសង្ឃឹមឈ្នះជាចម្បងទេ គ្រាន់តែចង់ឲ្យប៉ះជើងខ្លាំងចាស់វស្សា ដើម្បីយកបទពិសោធ។ ទោះជាយ៉ាងនេះក្តី មិនមែនឡើងទៅឲ្យគេវ៉ៃនោះទេ គឺឡើងទៅវ៉ៃគេ អស់ពីសមត្ថភាព ប៉ុន្តែបើប៉ះ លាភ រដ្ឋា ឬ ធន់ អៀឡៃ នៅវគ្គជម្រុះ គឺមិនអាចឈ្នះបានទេ»៕
