.jpg)
លាភ រដ្ឋា និង ផាន់ គ្រាន់ នឹងត្រូវប្រកួតជាមួយកីឡាករថៃនាថ្ងៃសៅរ៍ នៅសង្វៀន SEVTV។ រូបថត សហការី
ភ្នំពេញ៖ អ្នកលេងកណ្តាប់ដៃរបស់កម្ពុជាចំនួន ២ នាក់ គឺ លាភ រដ្ឋា និង ផាន់ គ្រាន់ នឹងត្រូវបង្ហាញខ្លួនរួមគ្នា នៅលើសង្វៀន SEATV នារសៀលថ្ងៃសៅរ៍ស្អែកនេះ ដោយពួកគេត្រូវជួបជាមួយកីឡាករថៃចំណូលថ្មី មិនធ្លាប់មកប្រកួតក្នុងសង្វៀននៅប្រទេស កម្ពុជា នោះទេ។
សម្រាប់កីឡាករ លាភ រដ្ឋា មហាជនធ្លាប់ស្គាល់ច្បាស់អំពីទម្ងន់កណ្ដាប់ដៃ ព្រមទាំងទឹកចិត្តប្រកួត ពិសេសប្រជាប្រិយរបស់គេ ព្រោះ រដ្ឋា មានចិត្តធំខ្លាំងណាស់ ដោយមិនងាយចុះចាញ់ដៃគូងាយៗនោះឡើយ។ ចំណែកថៃ Phat Trey ដែលជួប លាភ រដ្ឋា លើកនេះ ត្រូវបានគណៈកម្មការផ្គូផ្គងប្រាប់ថា មានប្រវត្តិឡើងសង្វៀនប្រកួតតិចជាងបន្តិចបន្ទួច គឺ Phat Trey ធ្លាប់ប្រកួត ៥៩ ដង ឈ្នះ ៤៦ ចាញ់ ១២ និងស្មើ ១ ដង ឯ លាភ រដ្ឋា ប្រកួតបាន ៧១ ដង ឈ្នះ ៥៦ ចាញ់ ១៣ និងស្មើ ២ ដង។
លោក ញាន សុធី ប្រធានផ្គូផ្គង នៅ SEATV បានប្រាប់ថា៖ «លាភ រដ្ឋា មានប្រៀបផ្នែកកណ្តាប់ដៃ កម្លាំង និងទឹកចិត្តប្រកួត ប៉ុន្តែកីឡាករថៃ Phat Trey យើងមិនទាន់ដឹងប្រាកដថាជំនាញផ្នែកអ្វីនោះឡើយ ព្រោះជាកីឡាករចំណូលថ្មី គេបញ្ជូនតែប្រវត្តិប្រកួតប៉ុណ្ណឹង តែការពិតជាក់ស្តែងមិនទាន់ឃើញនៅឡើយ»។
ចំណែក ផាន់ គ្រាន់ ត្រូវបានផ្គូផ្គងឲ្យជួបថៃ Yorth Moeung ក្នុងទម្ងន់ ៦៥ គីឡូក្រាម។ផាន់ គ្រាន់ ដែលខិតខំសម្រកទម្ងន់ពី ៦៨ មកត្រឹម ៦៥ គីឡូក្រាមនោះ គេមានប្រវត្តិប្រកួតបាន ១៣៦ ដង ឈ្នះ ១១០ ចាញ់ ២៤ និងស្មើ ២ ដង ចំណែកការប្រកួតចុងក្រោយសន្លប់ក្រោមស្នៀតជង្គង់ថៃ។ ចំពោះ Yorth Moeung វិញ ជាអ្នកប្រដាល់ចំណូលថ្មី ប៉ុន្តែមានប្រវត្តិប្រកួតបាន ៧១ ដង ឈ្នះ ៥៧ ចាញ់ ១៣ និងស្មើ ១ ដង។
លោក កៅ ឡាក់ ដែលចូលខ្លួនមកជាគ្រូបង្វឹក បន្ថែមនិយាយថា៖ «ផាន់ គ្រាន់ ទឹកចិត្តប្រកួតធំណាស់ ហ៊ានចូលវាយមិនញញើត ប៉ុន្តែការហ្វឹកហាត់មិនសូវបានល្អគ្រប់គ្នាន់ និងបញ្ចុះទម្ងន់ច្រើន គឺប្រឈមទៅនឹងការធ្លាក់កម្លាំង ពិសេសប្រឈមទៅនឹងការសន្លប់ ប្រសិនជាកីឡាករថៃរូបនេះ រឹងមាំជាងនោះ»។
ចំណែកលោក គង់ ចាន់ធីណា ប្រធានគ្រប់គ្រងកីឡារបស់ក្លិបមកុដរាជសីហ៍បាននិយាយថា៖ «ផាន់ គ្រាន់ ហ្វឹកហាត់បានតិចតួច ដោយជាប់រវល់ជួយរកស៊ីផ្គត់ផ្គង់គ្រួសារ ហេតុនេះការប្រកួតលើកនេះ មិនរំពឹងឈ្នះច្រើននោះទេ ហើយម្យ៉ាងទៀត យើងក៏មិនដឹងពីសមត្ថភាពកីឡាករថៃនោះ មានកម្រិតណាដែរ»។
ផាន់ គ្រាន់ បានទទួលស្គាល់ថា បញ្ហាសម្រកទម្ងន់ អាចប៉ះពាល់ផ្នែកកម្លាំង ហើយបន្ថែមពីលើនេះ ការជាប់រវល់ជួយលក់សាច់ជ្រូកជាមួយគ្រួសារ គឺពិតជាធ្វើឲ្យរូបគេមិនសូវបានហ្វឹកហាត់ដិតដល់មែន។ គ្រាន់ បញ្ជាក់ថា៖ «ខ្ញុំធានាវ៉ៃអស់ពីសមត្ថភាព ប៉ុន្តែបញ្ហាចាញ់ ឬឈ្នះលំបាកនិយាយមុនណាស់ ព្រោះមិនដែលឃើញការប្រកួតរបស់គេសោះ។ ទោះយ៉ាងណា ខ្ញុំមានសង្ឃឹមឈ្នះ ក្នុងការប្រកួត ៣ ទឹកដំបូង»៕
