.jpg)
លាភ រដ្ឋា ត្រូវបានអាជ្ញាកណ្តាលលើកដៃឲ្យឈ្នះ បន្ទាប់ពីរូបគេបានទាត់ឲ្យថៃ Yorth Vandy ខូចជើង ហើយលទ្ធផលនេះបានជួយឲ្យ រដ្ឋា ឡើងទៅវគ្គផ្តាច់ព្រ័ត្រ។ យឺន ពន្លក
ភ្នំពេញៈ ការប្រកួតជម្រុះខ្សែក្រវាត់ខារ៉ាបាវទម្ងន់ ៦០ គីឡូក្រាមក្រោមការចាប់អារម្មណ៍ និងតាមដានពីមហាជននោះត្រូវបានប្រកួតបញ្ចប់កាលពីល្ងាចថ្ងៃសៅរ៍នៅលើសង្វៀន SEATV ហើយភាពមន្ទិលមិនច្បាស់លាស់រវាងកីឡាករកម្ពុជា វ៉ាន់ វឿន មកពីក្លិបឃ្លាំងមឿង និង លាភ រដ្ឋា មកពីខេត្តបន្ទាយមានជ័យដោយមាន ១២ ពិន្ទុស្មើគ្នានោះ គឺត្រូវបានគណៈកម្មការវិនិច្ឆ័យសម្រេចឲ្យ លាភ រដ្ឋា បានឡើងទៅប៉ះកីឡាករថៃ Dek Ken ក្នុងវគ្គផ្តាច់ព្រ័ត្រ។
ការផ្តួលថៃ Yorth Vandy ឲ្យសន្លប់នៅទឹកទី ៥ របស់ លាភ រដ្ឋា កាលពីថ្ងៃសៅរ៍នោះបានធ្វើឲ្យ វ៉ាន់ វឿន ត្រូវធ្លាក់ចេញទាំងឈឺចុកចាប់ស្របពេលដែលមហាជន និងអ្នកតាមដានការប្រកួតមួយចំនួនធំនៅស្រពេចស្រពិលព្រោះទិន្នន័យប្រកួតរបស់អ្នកប្រដាល់ទាំង ២ គឺមានពិន្ទុស្មើគ្នា ហើយ វ៉ាន់ វឿន ផ្តួលគូប្រកួតចំនួន ៤ លើកលឿនជាង និងមាននាទីខ្លីជាង តែបែរជាធ្លាក់គួរឲ្យឆ្ងល់។
នៅក្រោយការប្រកួតចប់ភ្លាមលោក រាជ សុផែន អគ្គលេខាធិការរងសហព័ន្ធកីឡាប្រដាល់គុនខ្មែរក្នុងនាមជាប្រធានស្នងការប្រកួតបានឡើងពន្យល់ ដោយមានផ្សាយផ្ទាល់ផងថា វ៉ាន់ វឿន ឈ្នះដោយផ្ទួលដៃគូឲ្យសន្លប់ចំនួន ៤ លើកគឺឈ្នះក្នុងទឹកទី ១ ចំនួន ២ លើក ឈ្នះទឹកទី ៣ ចំនួន ២ លើក និងមាន ១២ ពិន្ទុ ប៉ុន្តែគណៈកម្មការគិតត្រឹមតែសន្លប់ ៣ ប្រកួតប៉ុណ្ណោះដោយសារមួយប្រកួតទៀតគិតក្នុងប្រកួតមិត្តភាពឈ្នះដោយស្វ័យប្រវត្តិ ទោះបីប្រកួតជាក់ស្តែងផ្តួលដៃគូឲ្យសន្លប់ទឹក ៣ ក៏ដោយ។
លោក រាជ សុផែន បន្តថា៖ «កីឡាករ លាភ រដ្ឋា ផ្តួលដៃគូឲ្យសន្លប់ទឹកទី ១ ចំនួន ២ លើកផ្តួលឲ្យសន្លប់ទឹក ៣ ចំនួន ១ លើក និងផ្តួលថៃនៅទឹកទី ៥ ថ្ងៃនេះអ៊ីចឹងគេបានឡើងទៅវគ្គផ្តាច់ព្រ័ត្រ ដោយសារគណៈកម្មការបានគិតឲ្យសន្លប់ទាំង ៤ មាន ១២ ពិន្ទុដូចគ្នា ព្រោះការប្រកួត ៤ លើកដោយគ្មានអវត្តមាន ឬជំនួសគ្នាជាប្រកួតមិត្តភាពនោះឡើយ»។
លាភ រដ្ឋា ត្រូវបានអាជ្ញាកណ្តាលលើកដៃឲ្យឈ្នះ បន្ទាប់ពីរូបគេបានទាត់ឲ្យថៃ Yorth Vandy ខូចជើង។ យឺន ពន្លក
ទោះជាយ៉ាងណានៅតែមានមតិរិះគន់ខ្លាំងៗពីមជ្ឈដ្ឋានមួយចំនួនដែលក្នុងនោះកីឡាករថៃទាំង ៤ នាក់ក្នុងវគ្គជម្រុះបានចាញ់ទាំងអស់មិនស្គាល់ឈ្នះបានម្តងសោះ បែរជាបានឡើងទៅវគ្គផ្តាច់ព្រ័ត្រគឺអនុវត្តផ្ទុយពីសង្វៀនដទៃ ដែលសហព័ន្ធតែមួយមានស្តង់ដាផ្សេងគ្នា ប៉ុន្តែមន្ត្រីបច្ចេកទេសសហព័ន្ធនៅតែអះអាងថា «នេះជាច្បាប់ប្រកួតដែលបានចែងតាំងពីមុនប្រកួតម្ល៉េះ»។
អ្វីដែលមហាជនខ្លះមិនពេញចិត្តនោះគឺរឿងផ្ទៃក្នុងដែលគេដឹងថាមិនសូវសមទំនង ឬគ្មានតម្លាភាព ព្រោះលោក ថៃ អ៊ូ ក្នុងតួនាទីដឹកនាំគ្រប់គ្រងកីឡាករថៃផង និងជាប្រធានសមាគមប្រដាល់ខេត្តបន្ទាយមានជ័យផង ហើយ លាភ រដ្ឋា ហាត់នៅក្នុងសមាគមនេះទៀតដែលគេមើលឃើញពីភាពសង្ស័យបានរីកប៉ោងកាន់តែធំ ទោះបីជាការប្រកួតគ្មានការឃុបឃិតណាមួយក៏ដោយ។
ក្រឡេកមើលទៅលើសង្វៀនប្រកួតជាក់ស្តែង វាសមទំនងហាក់ដូចជាការចោទប្រកាន់ខ្លះដែរព្រោះថៃ Yorth Vandy ឡើងប្រកួតលើកនេះវ៉ៃបានល្អ ចេញស្នៀតជង្គង់ និងកែងចូលគោលដៅពេញៗទៅលើ លាភ រដ្ឋា និងមានប្រៀបឈ្នះដាច់ទៅហើយ ប៉ុន្តែនៅពាក់កណ្តាលទឹកទី ៥ ស្រាប់តែថៃម្នាក់នេះដួលសន្លប់ដោយទាត់ត្រូវជើង សុំចុះចាញ់តែម្តង ទោះបីជាអាជ្ញាកណ្តាលរាប់ដល់ចំនួន ១០ ក៏ដោយ។ ជ័យជម្នះនេះបានជួយឲ្យ លាភ រដ្ឋា បានឡើងទៅវគ្គផ្តាច់ព្រ័ត្រ ហើយ វ៉ាន់ វឿន ត្រូវបានធ្លាក់។ ប្រសិនបើ លាភ រដ្ឋា ឈ្នះ ឬចាញ់ថៃត្រឹមពិន្ទុនោះក៏គ្មានពេលបានឡើងនោះដែរ។
ប៉ុន្តែលោក ថៃ អ៊ូ បានប្រតិកម្មនឹងការរិះគន់ថា៖ «ខ្ញុំមិនបានធ្វើអំពើថោកទាបណាមួយ ឬឃុបឃិតគ្នានោះទេ! ការចាញ់ ឬឈ្នះជាសមត្ថភាពប្រកួតរបស់កីឡាកររៀងៗខ្លួន ព្រោះកីឡាករខ្មែរណាឈ្នះ ក៏ជារបស់ខ្មែរដែរគឺខ្ញុំអត់មានគំនិតដូចគេចោទនោះទេ»។
ចំណែកលោក ញាន សុធី នាយកគ្រប់គ្រងកម្មវិធីប្រដាល់នៅ SEATV បាននិយាយថា៖ «រូបមន្តប្រកួតនេះ យើងបានចែងតាំងពីមុនប្រកួតម្ល៉េះ គឺអនុវត្តបែបនេះហើយយើងក៏មិនអាចផ្លាស់ប្តូរនៅពាក់កណ្តាលទីបានដែរ។ ទោះបីជាកីឡាករថៃបានចាញ់ទាំងអស់ក៏យើងត្រូវយកកីឡាករថៃម្នាក់ និងខ្មែរម្នាក់ ដែលមានពិន្ទុខ្ពស់ជាងគេក្នុងពូលនីមួយៗមកប្រកួតគ្នាវគ្គផ្តាច់ព្រ័ត្រដែរ។ ប៉ុន្តែការប្រកួតលើកក្រោយ យើងអាចនឹងផ្លាស់ប្តូររូបមន្តដើម្បីសម្រួលឲ្យបានកាន់តែប្រសើរ»៕
