.jpg)
កីឡាករយ៉ាម ខេមរា (ឆ្វេង) និងលិញ ភារម្យ នឹងត្រូវប៉ះជាមួយនឹងកីឡាករបរទេសរៀងៗខ្លួន។ សហការី
ភ្នំពេញ: កីឡាករប្រដាល់គុនខ្មែរជើងថ្មីលិញ ភារម្យ ដែលទើបតែផ្លាស់ចេញពីក្លិបភារម្យគុនខ្មែររបស់លោកនួន ភារម្យ និងបច្ចុប្បន្ន ស្ថិតនៅក្លិបឆ្មាសសុខសែនជ័យរបស់លោកស៊ន អេលីត ទទួលបានឱកាសឡើងប្រកួតជាមួយកីឡាករថៃ Meung Thong នៅចុងសប្តាហ៍នេះ។ ចំណែកកីឡាករយ៉ាម ខេមរា មកពីក្លិបរស្មីកុមារកំព្រា នឹងឡើងប្រកួតលក្ខណៈអន្តរជាតិជាមួយកីឡាករមកពីប្រទេសអ៊ីរ៉ង់ Vahdanirad Hanssan។
អ្នកប្រដាល់ជើងថ្មីវ័យក្មេងទាំង២ ត្រូវបានផ្គូផ្គងឲ្យប្រកួតគ្នានៅយប់ថ្ងៃសៅរ៍ ទី ៥ ខែមករា ឆ្នាំ ២០១៩ នៅសង្វៀនប្រដាល់អាស៊ីអាគ្នេយ៍។ លិញ ភារម្យ ធ្លាប់ដណ្តើមបានចំណាត់ថ្នាក់លេខ ៤ នៃពានរង្វាន់ទីហ្វី ប៉ុស្តិ៍ លេខ ៥ និងធ្លាប់ប៉ះប្រកួតជាមួយកីឡាករថៃចំនួន ៣ លើកប៉ុណ្ណោះ ដោយលទ្ធផលមិនធ្លាប់ឈ្នះនៅឡើយទេ។
រូបគេមានបទពិសោធឡើងសង្វៀនទើបតែបានចំនួន ៤៩ លើក ឈ្នះ ៣០ លើក ចាញ់ ១៧ លើក និងស្មើចំនួន ២ លើក។ ចំណែកដៃគូជាកីឡាករថៃ Meung Thong មានប្រវត្តិប្រកួតបានចំនួន ៥១ លើក ឈ្នះ ៤០ លើក ចាញ់ ១០ លើក និងស្មើ ១ លើក ហើយរូបគេមានកម្ពស់ ១,៦៦ ម៉ែត្រ ខណៈដែលលិញ ភារម្យ មានកម្ពស់ ១,៦៨ ម៉ែត្រ និងទម្ងន់ ៦០ គីឡូក្រាមដូចគ្នា។
លោកស៊ន អេលីត គ្រូបង្វឹកប្រចាំក្លិបឆ្មាសសុខសែនជ័យ បានឲ្យដឹងថា៖ «សមត្ថភាពក្បាច់គុន និងទឹកចិត្តប្រយុទ្ធរបស់លិញ ភារម្យ ធានាថា នឹងប្រកួតល្អអស់ពីសមត្ថភាព ប៉ុន្តែ រូបគេមិនធ្លាប់ឈ្នះកីឡាករបរទេសឡើយ»។
ដោយឡែក កីឡាករយ៉ាម ខេមរា ដែលឡើងទម្ងន់រហូតដល់ ៦៩ គីឡូក្រាម នឹងត្រូវបានដាក់ឲ្យប្រកួតជាមួយកីឡាករមកពីប្រទេសអ៊ីរ៉ង់ Vahdani-rad Hanssan។
ខេមរា មានបទពិសោធប្រកួតទើបតែបានចំនួន ៣៤ លើក ឈ្នះ ២៣ លើក ចាញ់ ១១ លើកប៉ុណ្ណោះ និងធ្លាប់ប្រកួតជាមួយកីឡាករបរទេសតែ ១ លើកគត់ កាលពីសប្តាហ៍មុន ដោយទទួលបានលទ្ធផលឈ្នះ។
កីឡាករអ៊ីរ៉ង់រូបនេះ មានបទពិសោធប្រកួតបានចំនួន ១៨ លើក ឈ្នះ ១៥ លើក និងចាញ់ ៣ លើក ហើយរូបគេមានកម្ពស់ ១,៧៥ ម៉ែត្រ ខណៈខេមរា មានកម្ពស់ ១,៧៣ ម៉ែត្រ៕
