.jpg)
ការប្រជែងគ្នាតែតបាល់ នាជំនួបរវាងក្រុមណាហ្គាវើល (ឆ្វេង) និងបឹងកេត ក្នុងការប្រកួតលីកកំពូល។សហការី
ភ្នំពេញ៖ សហព័ន្ធកីឡាបាល់ទាត់កម្ពុជា (FFC) និងគណៈកម្មការប្រកួតបាល់ទាត់ជាតិកម្ពុជា (CNCC) បានសម្រេចពន្យារពេល ឬផ្អាកការប្រកួតលីកកំពូលកម្ពុជា ចំនួន ១ ខែទៀត បើទោះបីជាក្រសួងអប់រំ យុវជន និងកីឡា បានអនុញ្ញាតឲ្យធ្វើសកម្មភាពឡើងវិញជាជំហានៗក៏ដោយ។
ការមិនបើកការប្រកួតលីកកំពូលកម្ពុជា រួមទាំងការប្រកួតពានរង្វាន់សម្តេច ហ៊ុន សែន តាមពេលវេលា ដែលក្រសួងអប់រំ យុវជន និងកីឡា បានអនុញ្ញាតឲ្យធ្វើជាបណ្តើរៗ ចាប់ពីខែមិថុនា តទៅនេះ គឺត្រូវបានធ្វើឡើង មុនសេចក្តីប្រកាសរបស់ក្រសួងអប់រំ ១ ថ្ងៃ ពោលគឺនៅក្នុងកិច្ចប្រជុំរវាង CNCC និងតំណាងក្លិបនីមួយៗ កាលពីថ្ងៃទី ២៥ ខែឧសភា ព្រោះ CNCC ចង់ទុកពេលឲ្យកីឡាករនៅតាមក្លិបទាំង ១៣ មានពេលគ្រប់គ្រាន់ក្នុងការហ្វឹកហាត់ស្តារកម្លាំង និងបច្ចេកទេសឡើងវិញ មុនពេលពួកគេចាប់ផ្តើមប្រកួតប្រជែងគ្នាឡើងវិញនៅលើទីលាន។
ជុំវិញការងារនេះ លោក កែវ សារ៉េត អគ្គលេខាធិការ FFC បានប្រាប់ប្រព័ន្ធផ្សព្វផ្សាយក្នុងស្រុកថា៖ «CNCC គេបានត្រៀមរួចហើយ ប៉ុន្តែបើមើលទៅលើពេលវេលាហ្វឹកហាត់របស់កីឡាករតាមក្លិបនីមួយៗ ហាក់ដូចជាដាច់ មិនសូវបានហាត់ ដូច្នេះការចូលលេងវិញលឿនពេក វាក៏មិនសូវល្អដែរ ហេតុនេះនៅក្នុងការប្រជុំពីថ្ងៃចន្ទ CNCC បានប្រាប់ទៅក្លិបទាំងអស់រួចហើយថា លីកកំពូលកម្ពុជានឹងលេងនៅដើមខែកក្កដា»។
យ៉ាងណាក៏ដោយ លោក ឈី កុលបុត្រា លេខាធិការដ្ឋាន CNCC បានបង្ហើបថា ពេលវេលាបើកលីកកំពូលឡើងវិញនេះ អាចនឹងប្រែប្រួលទៀត។ លោកបានប្រាប់ភ្នំពេញប៉ុស្តិ៍ កាលពីថ្ងៃពុធថា៖ «យើងបានផ្តល់ព័ត៌មានទៅតំណាងក្លិបនីមួយៗរួចហើយមែន ប៉ុន្តែយើងនៅមានការងារបច្ចេកទេសផ្សេងៗទៀត កំពុងតែធ្វើ ទាក់ទងទៅនឹងការត្រៀមបើកការប្រកួតលីកឡើងវិញនេះ»។
លោកបានបន្ថែមថា៖ «ជាមួយគ្នានេះ កាលបរិច្ឆេទនៃការប្រកួតច្បាស់លាស់ វាអាចនឹងមានការប្រែប្រួលដែរ ព្រោះយើងមិនត្រឹមតែធ្វើការងារបច្ចេកទេស ឬរត់ការឯកសារផ្លូវការ ត្រឹមថ្នាក់ជាតិប៉ុណ្ណោះទេ ប៉ុន្តែយើងត្រូវឆ្លងទៅថ្នាក់អន្តរជាតិទៀត អ៊ីចឹងព័ត៌មានច្បាស់ការ យើងនឹងជម្រាបជូននៅពេលក្រោយ»។
ក្រសួងអប់រំ យុវជន និងកីឡា កាលពីថ្ងៃអង្គារ បានចេញសេចក្តីប្រកាសមួយ ស្តីពីការអនុញ្ញាតឲ្យធ្វើសកម្មភាពហ្វឹកហ្វឺន និងប្រកួតលីកឡើងវិញជាជំហានៗ ហើយការអនុញ្ញាតនេះ ត្រូវបានធ្វើឡើងយោងទៅតាមសេចក្តីប្រកាសព័ត៌មានរបស់គណៈកម្មការអន្តរក្រសួង ដើម្បីប្រយុទ្ធប្រឆាំងនឹងជំងឺកូវីដ ១៩ កាលពីថ្ងៃទី ២២ ខែឧសភា ស្តីពីវិធានការកែតម្រូវសម្រាប់ការដាក់ឲ្យដំណើរការឡើងវិញនូវវិស័យកីឡាជាជំហានៗ។
យ៉ាងណាក៏ដោយ ការអនុញ្ញាតឲ្យហាត់ហ្វឹកហ្វឺន និងប្រកួតលីកនេះ ត្រូវតែមានផែនការច្បាស់លាស់ និងត្រូវគោរពតាមលក្ខខណ្ឌសុវត្ថិភាពចំនួន ៩ ចំណុច។ ទី១ រាល់ការហាត់ហ្វឹកហ្វឺន និងប្រកួត ត្រូវគោរពតាមនិយាមបច្ចេកទេស ដើម្បីធានាសុវត្ថិភាព ទី២ ទីកន្លែង និងឧបករណ៍សម្ភារ ត្រូវបានបាញ់ថ្នាំសម្លាប់មេរោគ និងអនាម័យជាប្រចាំ។
ចំណែកទី៣ កីឡាករ កីឡាការិនី គ្រូបង្វឹក និងមន្រ្តីបច្ចេកទេស ត្រូវបានពិនិត្យ និងថែទាំសុខភាពត្រឹមត្រូវ និងម៉ឺងម៉ាត់ជាប្រចាំតាមការណែនាំ និងសហការជាមួយក្រសួងសុខាភិបាល។ ទី៤ ត្រូវធ្វើសេចក្ដីណែនាំទៅក្លិបលីក ដើម្បីបំពេញលក្ខខណ្ឌ និងអនុវត្តវិធានការការពារជំងឺកូវីដ ១៩ បានត្រឹមត្រូវ និងម៉ឺងម៉ាត់មុនហាត់ និងប្រកួត ហើយទី៥ ការប្រកួតលីកត្រូវបិទទ្វារ ធានាថាមិនមានទស្សនិកជន។
ចំណុចទី៦ ការប្រកួតលីកមិនត្រូវឲ្យមានចំនួនកីឡាករ និងមន្ត្រីលើសពី ១០០ នាក់ឡើយ ទី៧ ត្រូវមានវិន័យក្នុងការអនុវត្តគម្លាតសង្គម និងគម្លាតបុគ្គល (មិនត្រូវចាប់ដៃ និងឱបរឹតគ្នាពេលទាត់ចូលឡើយ) ទី៨ ត្រូវធានាថា កន្លែងហាត់ និងប្រកួតលីក មិនមែនជាកន្លែងឆ្លងជំងឺកូវីដ ១៩ រលកទី២ ឡើយ ហើយទី៩ ករណីការប្រកួតលីកអនុវត្តមិនបានត្រឹមត្រូវតាមវិធានការ និងការណែនាំបច្ចេកទេសរបស់ក្រសួងសុខាភិបាល សហព័ន្ធនឹងទទួលខុសត្រូវចំពោះមុខច្បាប់៕
