ភ្នំពេញ: នៅទីបំផុតគណៈកម្មាធិការប្រតិបត្តិនៃសហព័ន្ធកីឡាបាល់ទាត់កម្ពុជា និងគណៈកម្មការប្រកួតបាល់ទាត់ជាតិកម្ពុជា (CNCC) បានឈានដល់ការឯកភាពគ្នាដាក់បញ្ចូលក្រុម ៣ ទៀតឲ្យចូលរួមលេងលីកកំពូលកម្ពុជាឆ្នាំ ២០១៩ ដែលនឹងចាប់ដំណើរការនៅថ្ងៃទី ១៦ ខែមីនាខាងមុខនេះ។
ក្រុមទាំង ៣ ដែលត្រូវបានសម្រេចដាក់ឲ្យចូលលេងនៅលីកកំពូលកម្ពុជាឆ្នាំ ២០១៩ នេះមានក្រុមគិរីវង់សុខសែនជ័យ ក្រុមខេត្តកំពង់ចាម និងក្រុមសាលាបាល់ទាត់ជាតិបាទីអាយុក្រោម ១៨ ឆ្នាំហើយការដាក់បញ្ចូលនេះបានធ្វើឲ្យលីកកំពូលឆ្នាំនេះកើនដល់ ១៤ ក្រុម ខណៈក្រុមចាស់មានក្រុមម្ចាស់ជើងឯកណាហ្គាវើល ក្រុមជើងឯករង បឹងកេត ក្រុមលេខ ៣ វិសាខា ក្រុមលេខ ៤ ក្រសួងការពារជាតិភ្នំពេញក្រោន ព្រះខ័នរាជស្វាយរៀង ប៉ូលិស អង្គរថាយហ្គឺរ ក្រុម សូលទីឡូអង្គរ អាស៊ីអឺរ៉ុប និងក្រុមអគ្គិសនីកម្ពុជា។
តាមលោក ឆាំង ពិសិដ្ឋ លេខាប្រតិបត្តិរបស់គណៈកម្មការប្រកួតបាល់ទាត់ជាតិកម្ពុជាបានប្រាប់ឲ្យដឹងកាលពីម្សិលមិញថា ការដំឡើងក្រុមទាំង ៣ ឲ្យឡើងមកលេងនៅលីកកំពូលនេះគឺបានធ្វើឡើងបន្ទាប់ពីកិច្ចប្រជុំរបស់គណៈកម្មាធិការប្រតិបត្តិនៃសហព័ន្ធកីឡាបាល់ទាត់កម្ពុជានាពេលថ្មីៗនេះ។
តាមអង្គប្រជុំនោះការសម្រេចដំឡើងក្រុមគីរីវង់សុខសែនជ័យ និង ខេត្តកំពង់ចាមដោយសារមិនមានការប្រកួតលីក ២ នាឆ្នាំកន្លងទៅ ប៉ុន្តែគណៈកម្មាធិការប្រតិបត្តិបានពិនិត្យឃើញថាទោះបីជាក្រុមទាំង ២ លេងនៅលីក ២ ក៏មានលទ្ធភាពអាចឡើងមកលេងលីកកំពូលបានដែរ។
ចំណែកការសម្រេចដាក់បញ្ចូលក្រុមសាលាបាល់ទាត់ជាតិអាយុក្រោម ១៨ ឆ្នាំឲ្យឡើងមកលេងនៅលីកកំពូលឆ្នាំនេះត្រូវបានលោក ឆាំង ពិសិដ្ឋ ប្រាប់ឲ្យដឹងថា គឺដើម្បីឲ្យក្រុមថ្នាលតំណាងឲ្យកម្ពុជាមួយនេះបានសុំាទៅនឹងការប្រកួតធំ និងបង្កើនសមត្ថភាពឲ្យបានខ្ពស់ក្នុងបំណងឲ្យពួកគេត្រៀមខ្លួនរួចរាល់សម្រាប់ការប្រកួតស៊ីហ្គេមឆ្នាំ ២០២៣ ពេលកម្ពុជាធ្វើជាម្ចាស់ផ្ទះ។
យ៉ាងណាក៏ដោយលោក ឆាំង ពិសិដ្ឋ បានអះអាងថាចំពោះរូបមន្តប្រកួតលីកកំពូលកម្ពុជានៅឆ្នាំនេះគ្មានការកែប្រែ ឬផ្លាស់ប្តូរអ្វីទេគឺនៅតែលេងវិលជុំ ២ ជើងរួចសម្រេចយកក្រុមមានពិន្ទុខ្ពស់ជាងគេជាអ្នកលើកពានតែម្តង។ ប៉ុន្តែចំពោះប្រាក់រង្វាន់ដែលលេខ ១ បាន ៦០ លានរៀល លេខ ២ បាន ៤៦ លានរៀល និងលេខ ៣ បាន ៣៦ លានគឺអាចនឹងនៅតែដដែល។
ចំពោះបញ្ហានេះលោក ឆាំង ពិសិដ្ឋ បាននិយាយថា៖ «ចំពោះប្រាក់រង្វាន់នេះ យើងនៅមិនទាន់មានការសម្រេចអ្វីពីថ្នាក់លើមកទេ ពីព្រោះការឧបត្ថម្ភពីខាងស្ពនស័រ គឺយើងទទួលបានចំនួនដដែល អ៊ីចឹងគិតមកដល់ពេលនេះយើងនៅមិនទាន់មានអ្វីប្រែប្រួលនៅឡើយ»៕