.jpg)
លោកស្រី ស៊ុំ សុខា ពេលឡើងបំពាក់មេដាយ ដល់ក្រុមជយលាភី ក្នុងការប្រកួតកីឡាជាតិកន្លងមក។ ឈន ណន
ភ្នំពេញ៖ លោកស្រីឧត្តមសេនីយ៍ទោ ស៊ុំ សុខា បានទម្លាយឱ្យដឹងថា ខ្សែជីវិតរបស់គាត់ ដែលទទួលបានជោគជ័យរហូតដល់បច្ចុប្បន្ននេះ គឺកើតចេញពីកីឡា ហើយគិតមកដល់ពេលនេះ លោកស្រីបានប្រឡូកក្នុងកីឡា ៤០ ឆ្នាំមកហើយ ដោយបានវិវឌ្ឍខ្លួនពីអ្នកលេងកីឡាច្រើនប្រភេទ តាំងពីកុមារភាព រហូតក្លាយជាអ្នកដឹកនាំកីឡាម្នាក់នៅក្នុងមជ្ឈមណ្ឌលកីឡាកងយោធពលខេមរភូមិន្ទនៃក្រសួងការពារជាតិ ព្រមទាំងជាអនុប្រធានសហព័ន្ធកីឡាបាញ់កាំភ្លើង និងសហព័ន្ធវាយកូនបាល់កម្ពុជា។
ការវិវឌ្ឍខ្លួនរបស់លោកស្រីផ្កាយ ២ ស៊ុំ សុខា គឺកើតចេញពីបទពិសោធ និងលទ្ធផលជាអ្នកលេងកីឡាអត្តពលកម្មបាល់បោះបាល់ទះ និងបាល់ទាត់តាំងពីកុមារភាព ខណៈដែលលោកស្រីមានឈ្មោះក្នុងទស្សនាវដ្តីជា «រតននារី» ហើយក្នុងនោះ នៅក្នុងកំណត់ត្រារបស់ក្រសួងអប់រំ យុវជន និងកីឡា គឺលោកស្រីធ្លាប់ឈ្នះបានមេដាយសំរឹទ្ធចំនួន ២ ក្នុងព្រឹត្តិការណ៍ស៊ីហ្គេមលើកទី ១៩ ឆ្នាំ ១៩៩៧ នៅប្រទេសឥណ្ឌូនេស៊ី។
ដោយមានស្រុកកំណើតនៅឃុំស្វាយរលំ ស្រុកស្អាង ខេត្តកណ្តាល លោកស្រី ស៊ុំ សុខា ដែលបានកើតនៅថ្ងៃទី ៦ ខែ មេសា ឆ្នាំ ១៩៧០ នោះ គឺបានចូលហ្វឹកហាត់ និងលេងកីឡាអត្តពលកម្ម បាល់ទះ បាល់ទាត់ តាំងពីឆ្នាំ ១៩៨០ នៅក្នុងសាលាបឋមសិក្សា អនុវិទ្យាល័យ និងវិទ្យាល័យ ដោយទទួលបានលទ្ធផលល្អឆ្នើមដាច់គេ និងឈ្នះជយលាភីជានិច្ច ពិសេសនៅអនុវិទ្យាល័យចតុមុខ និងវិទ្យាល័យព្រះស៊ីសុវត្ថិរាជធានីភ្នំពេញ មុននឹងលោកស្រីបានប្រឡងជាប់បាក់ឌុប នៅឆ្នាំ ១៩៨៧។
ក្រោយជាប់បាក់ឌុប លោកស្រី សុខា បានដាក់ពាក្យចូលបម្រើការងារកីឡាក្នុងកងទ័ព នៃក្រសួងការពារជាតិ ដោយក្នុងនោះគាត់លេងកីឡាច្រើនប្រភេទមានដូចជាកីឡាបាល់ទះ បាល់ទាត់ អត្តពលកម្ម និងក្រោយមកចាប់យកជំនាញកីឡាបាញ់កាំភ្លើង ដោយជាប់ជាក្រុមជម្រើសជាតិ តាំងពីឆ្នាំ ១៩៩៧ រហូតដល់ឆ្នាំ ២០០០ ទើបសម្រាក។
លោកស្រីបានថ្លែងថា៖ «ខ្ញុំធ្លាប់ចេញទៅប្រកួតកីឡាបាញ់កាំភ្លើងនៅវៀតណាម ឥណ្ឌូនេស៊ី ម៉ាឡេស៊ី និងប៊្រុយណេ ក្នុងក្របខ័ណ្ឌកីឡាកងទ័ព ដោយទទួលបានមេដាយមាស ប្រាក់ និងសំរឹទ្ធ ហើយខ្ញុំធ្លាប់ទៅចូលរួមប្រកួតឈ្នះមេដាយសំរឹទ្ធជាក្រុម និងឯកត្តជន ពីការប្រកួតស៊ីហ្គេមលើកទី១៩ នៅប្រទេសឥណ្ឌូនេស៊ី ឆ្នាំ ១៩៩៧។ បន្ថែមលើនេះ នៅឆ្នាំ ២០១២ ខ្ញុំឈ្នះមេដាយមាសនៅប្រទេសប្រ៊ុយណេ ពីកីឡាបាញ់កាំភ្លើងកងទ័ព ជយលាភីជាក្រុម ហើយបន្ទាប់មកខ្ញុំឈប់លេងកីឡា ដោយទទួលការងារជាថ្នាក់ដឹកនាំកីឡាវិញម្តង ស្របទៅនឹងវ័យរបស់ខ្ញុំកាន់តែចាស់»។
លោកស្រី ស៊ុំ សុខា បានទទួលមុខងារជានាយិកាបច្ចេកទេស លើប្រភេទកីឡាចំនួន ១៦ ក្នុងកងទ័ព ហើយជាបន្តបន្ទាប់អ្នកស្រីទទួលបានឋានៈជាអនុប្រធានមជ្ឈមណ្ឌលកីឡាកងយោធពលខេមរភូមិន្ទ ព្រមទាំងត្រូវបានដំឡើងឋានន្តរស័ក្តិ ជាឧត្តមសេនីយ៍ទោនៃនាយិការង កីឡាកងយោធពលខេមរភូមិន្ទនា ឆ្នាំ ២០១៧។
អ្នកស្រីអះអាងថា៖ «តាមរយៈបទពិសោធក្នុងសកម្មភាពកីឡាតាំងពីកុមារភាព មកដល់បច្ចុប្បន្ន មានរយៈពេល ៤០ ឆ្នាំ ហើយការងារទាំងនេះ បាននាំឱ្យខ្ញុំទទួលបានភាពជោគជ័យក្នុងជីវិត ក្នុងនោះកូនរបស់ខ្ញុំចំនួន ២ នាក់ សុទ្ធតែបានបណ្តុះបណ្តាលផ្នែកកីឡា ពោលគឺកូនស្រីឈ្មោះ វង្ស សុខវីន ជាជម្រើសជាតិកីឡាបាញ់កាំភ្លើង និងកូនប្រុសឈ្មោះ វង្ស សុខានិល លេងកីឡាបាល់ទះ អត្តពលកម្ម និងបាញ់កាំភ្លើងផងដែរ»។
យ៉ាងណាក៏ដោយ នៅពេលសួរថា លទ្ធផលល្អ តាមរយៈកីឡា តើលោកស្រីធ្លាប់ជួបបញ្ហាលំបាកខ្លាំងអ្វីទេ? លោកស្រី ស៊ុំ សុខា បានឆ្លើយតបវិញថា៖ «នៅក្នុងជីវិតរបស់មនុស្សម្នាក់ៗ មុនឈានមកដល់ភាពជោគជ័យ គឺគ្មានការងារណាមួយ ដែលគ្មានការលំបាក ឬគ្មានឧបសគ្គនោះទេ ប៉ុន្តែអ្វីដែលយើងដោះស្រាយបាន និងជម្នះបាននោះ ទើបមានលទ្ធផលល្អសម្រាប់អនាគត»៕
