.jpg)
កីឡដ្ឋានជាតិមរតកតេជោ ដែលស្ថិតក្នុងការសាងសង់។ រូបថត ហ្វេសប៊ុក
ភ្នំពេញ៖ លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានដឹកនាំក្រុមគណៈកម្មាធិការត្រួតពិនិត្យចុះទៅសួរសុខទុក្ខដល់ក្រុមហ៊ុនចិនដែលកំពុងសាងសង់ពហុកីឡដ្ឋានជាតិមរតកតេជោ និងឆ្លៀតសួរសុខទុក្ខ នាអំឡុងពេលចូលឆ្នាំថ្មីប្រពៃណីជាតិខ្មែរ។
ជាមួយគ្នានេះ តំណាងក្រុមហ៊ុនពាណិជ្ជកម្មសាងសង់លោក Zhou Wali បានថ្លែងអំណរគុណ និងរាយការណ៍ពីលទ្ធផលសាងសង់ និងការគ្រប់គ្រងក្រុមកម្មករ និងអ្នកបច្ចេកទេសសរុប ៤០០ នាក់ ដែលស្ថិតនៅក្នុងការត្រួតពិនិត្យតឹងតែងមិនឲ្យចេញចូល ដើម្បីចៀសវាងការឆ្លងរាលដាលជំងឺកូវីដ ១៩។
លោក ថោង ខុន ដែលជាប្រធានគណៈកម្មការអន្តរក្រសួង ត្រួតពិនិត្យបច្ចេកទេសលើការសាងសង់ពហុកីឡដ្ឋានជាតិមរតកតេជោផងនោះ បានថ្លែងក្នុងការចុះសួរសុខទុក្ខកន្លងមកនេះថា៖ «ខ្ញុំសូមសម្តែងនូវសេចក្តីសប្បាយរីករាយ ដោយពិនិត្យឃើញអ្នកទាំងអស់គ្នាក្នុងការដ្ឋានសាងសង់ មានសុខភាពល្អ គ្មានអ្នកប៉ះពាល់ជម្ងឺឆ្លង ហើយខ្ញុំក៏សូមកោតសរសើរដល់វិធានការគ្រប់គ្រងល្អហ្មត់ចត់ ច្បាស់លាស់ ក្នុងការរក្សាបាននូវការគ្រប់គ្រងល្អរបស់ថ្នាក់ដឹកនាំសាងសង់ ខណៈការសាងសង់ទៅលើសំណង់រឹងបានរួចរាល់ ១០០ ភាគរយ គឺនៅសល់តែការបំពាក់គ្រឿងលម្អរចនាប្លង់ និងការតុបតែង ដែលគ្រោងឲ្យចប់សព្វគ្រប់ នៅថ្ងៃទី ៣១ ខែ ធ្នូ ឆ្នាំ ២០២០»។
ចំណែកលោក Zhou Wali តំណាងក្រុមហ៊ុនពាណិជ្ជកម្មនៃប្រទេស ចិន ដែលជាអ្នកគ្រប់គ្រងដឹកនាំក្រុមហ៊ុនផ្ទាល់បានរាយការណ៍សង្ខេបពីវឌ្ឍនភាពការងារសាងសង់ថា៖ «បច្ចុប្បន្នសំណង់រឹង និងគ្រឿងផ្គុំបេតុងទាំងអស់ ត្រូវបានចប់សព្វគ្រប់ ដោយនៅសេសសល់តែការបំពាក់ឧបករណ៍សម្ភារដំឡើងដំបូល បំពាក់កៅអី លាបពណ៌រចនាជាដើម»។
លោកបន្ថែមថា៖ «សំណង់ទាំងមូលសម្រេចបាន ៨០ ភាគរយ ក្នុងនោះភាគីប្រទេស ចិន បានប្តេជ្ញាខិតខំប្រឹងប្រែង ធ្វើឲ្យចប់តាមកាលកំណត់នាបំណាច់ឆ្នាំ ២០២០ នេះហើយក្នុងស្ថានភាពដ៏លំបាកនៃជំងីកូវីដ ១៩ នេះ ខាងរដ្ឋាភិបាលចិនបានយកចិត្តទុកដាក់ណែនាំ និងផ្តល់ដំបូន្មានត្រួតពិនិត្យជាប្រចាំ ពិសេសលើការគ្រងកម្មករក្នុងការដ្ឋាន ដើម្បីចៀសពីជំងឺឆ្លងនេះ គឺអ្នកគ្រប់គ្រងមិនស្វែងរកកម្មករថ្មីបន្ថែមទេ ដោយរក្សាកម្មករធ្វើការចាស់ៗ ក្នុងដំណាក់កាលនេះ ដោយផ្តល់កន្លែងស្នាក់នៅ ហូបចុក និងហាមចេញចូលដាច់ខាត»៕
