ភ្នំពេញ៖ ប្រធានគណៈកម្មាធិការជាតិអូឡាំពិកកម្ពុជា លោក ថោង ខុន និងជាប្រធានសហព័ន្ធកីឡាកាយសម្ព័ន្ធកម្ពុជា បានជំរុញឱ្យក្រុមអត្តពលិកវ័យក្មេងមានសក្តានុពល ព្រមទាំងគ្រូបង្វឹកនៅលើប្រភេទកីឡានេះ ត្រូវខិតខំប្រឹងប្រែងហ្វឹកហាត់ ពង្រឹងសមត្ថភាពឱ្យបានខ្លាំង គឺធ្វើយ៉ាងណាដណ្តើមមេដាយឱ្យបានច្រើននៅពេលកម្ពុជាធ្វើជាម្ចាស់ផ្ទះការប្រកួតស៊ីហ្គេមលើកទី៣២ ឆ្នាំ ២០២៣។
លោក ថោង ខុន ជាអនុប្រធានអចិន្រៃ្តយ៍គណៈកម្មាធិការជាតិរៀបចំការប្រកួតស៊ីហ្គេមលើកទី៣២ ឆ្នាំ ២០២៣ ផងនោះ បានចាត់ទុកឆ្នាំ ២០២១ នេះជាឆ្នាំ ដែលគ្រប់ប្រភេទកីឡារបស់កម្ពុជាត្រូវប្រឹងហាត់ឱ្យបានខ្លាំង ហើយផ្នែកផ្សេងៗទៀត ក៏ត្រូវរៀបចំឱ្យបានល្អ គឺយ៉ាងហោចណាស់ក៏បានពី ៧០ ទៅ ៨០ ភាគរយដែរ ខណៈដែលភាគីចិនបានឯកភាពទទួលយកគ្រូបង្វឹក និងក្រុមអត្តពលិករបស់កម្ពុជាចំនួន ១០០ នាក់ ទៅហ្វឹកហាត់រយៈពេលវែងនៅទីនោះ ក្នុងនោះក៏មានក្រុមកាយសម្ព័ន្ធ ១០ នាក់ផងដែរ។
ប្រធានសហព័ន្ធរូបនេះ បានថ្លែងថា៖ «ក្នុងនាមជាមិត្តភក្តិដ៏ល្អភាគីចិនបានត្រៀមទទួលយកគ្រូបង្វឹក និងក្រុមអត្តពលិករបស់កម្ពុជាចំនួន ១០០ នាក់ ឱ្យទៅហ្វឹកហាត់រយៈពេលវែងនៅទីនោះ ហើយក្នុងនោះក៏មានគ្រូបង្វឹក និងក្រុមអត្តពលិកកាយសម្ព័ន្ធចំនួន ១០ នាក់ផងដែរ អ៊ីចឹងពេលហាត់នៅចិននេះ ខ្ញុំសូមឱ្យលោកគ្រូ អ្នកគ្រូ ព្រមទាំងចៅៗទាំងអស់ខិតខំយកចិត្តទុកដាក់ ព្រោះកីឡាកាយសម្ព័ន្ធនេះ ទាំងផ្នែកអាទីស្ទីក និងអាអេរ៉ូប៊ិក នៅចិនគាត់ពូកែ»។
លោក ថោង ខុន បានបន្ថែមថា៖ «សម្រាប់កីឡាជាក្រុម យើងពិបាកយកមេដាយ តែកីឡាកាយសម្ព័ន្ធ ដែលលេងជាបុគ្គល និងជាក្រុមតូចៗនេះ យើងមានឱកាសយកមេដាយបានច្រើន អ៊ីចឹងសូមឱ្យលោកគ្រូ អ្នកគ្រូ និងចៅៗទាំងអស់ខិតខំ ព្រោះក្រៅពីការទៅហ្វឹកហាត់នៅចិន គឺយើងក៏បានសុំគ្រូជំនាញកម្រិតខ្ពស់ពីចិន មកជួយបង្វឹកដល់ក្រុមកាយសម្ព័ន្ធរបស់យើងផងដែរ ហេតុនេះយើងអាចចូលរួមហាត់បានច្រើននាក់ ចំណែកការប្រកួតស៊ីហ្គេម ឆ្នាំ ២០២៣ យើងធ្វើម៉េចដណ្តើមមេដាយឱ្យបានច្រើន ដើម្បីឱ្យស័ក្តិសមក្នុងនាមយើងជាម្ចាស់ផ្ទះ»។
ការថ្លែងបែបនេះ របស់លោករដ្ឋមន្រ្តីក្រសួងទេសចរណ៍ ថោង ខុន គឺបានធ្វើនៅចំពោះមុខថ្នាក់ដឹកនាំ គ្រូបង្វឹក និងក្រុមអត្តពលិកកាយសម្ព័ន្ធទាំងអស់នៅក្នុងពិធីបិទការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី៤ ឆ្នាំ ២០២០ ដែលទើបបានរៀបចំឡើង និងបញ្ចប់ដោយជោគជ័យកាលពីថ្ងៃអង្គារ។
តាមរយៈការប្រកួតចំនួន ៤ ថ្ងៃ នៅសាលដំបូលទូកនៃពហុកីឡដ្ឋានជាតិ ដោយមានអត្តពលិកចំនួន ៦៤ នាក់ ចូលរួមតំណាងឱ្យក្លិបចំនួន ៤ នោះ ក្រុមកីឡាករ កីឡាការិនីមកពីខេត្តកំពង់ឆ្នាំងបានឈរនៅលេខ ១ ដោយបានដណ្តើមមេដាយមាស ៤ ប្រាក់ ៥ សំរឹទ្ធ ៣ តាមពីក្រោយដោយក្លិបក្រសួងមហាផ្ទៃដោយឈ្នះមេដាយមាស ៤ ប្រាក់ ៤ សំរឹទ្ធ ៦ ចំណែកក្រុមខេត្តក្រចេះ បានមេដាយមាស ៤ ប្រាក់ ១ សំរឹទ្ធ ៤ ហើយក្រុមខេត្តតាកែវ បានមេដាយមាស ១ និងប្រាក់ ៣ ខណៈការប្រកួតនេះ ត្រូវបានមន្រ្តីជំនាញវាយតម្លៃថា មានភាពស្វិតស្វាញខ្លាំង។
លោក ណយ ផាណា អគ្គលេខាធិការសហព័ន្ធបាននិយាយថា៖ «ការប្រកួតនេះ ទទួលបានជោគជ័យ ហើយផ្អែកទៅលើលក្ខណៈបច្ចេកទេស យើងពិនិត្យឃើញថា កីឡាករ កីឡាការិនីរបស់យើងទាំងអស់ មានការប្រកួតប្រជែងគ្នាខ្លាំង ដោយសារយើងឈានជើងឆ្ពោះទៅរកឆ្នាំ ២០២៣ ហើយទី២ កីឡាកាយសម្ព័ន្ធអាទីស្ទីកនេះ ក៏ប្រកួតប្រជែងគ្នា ដើម្បីត្រៀមទៅហ្វឹកហាត់រយៈពេលវែងនៅចិន អ៊ីចឹងវាជាឱកាសមួយសម្រាប់ពួកគាត់ ដើម្បីឈានទៅរកភាពជោគជ័យ និងមោទនភាពសម្រាប់ខ្លួនគាត់ និងប្រទេសជាតិ»៕