.jpg)
លោក វី តារា បានបង្ហាញពីបច្ចេកទេសលោតវាយទៅលើគូប្រកួត ពេលសម្តែងនៅបុណ្យសមុទ្រ។ ភ្នំពេញប៉ុស្តិ៍
ភ្នំពេញៈ ជាក្មេងកំព្រាឪពុក តាំងពីអាយុ ៥ ឆ្នាំលោក វី តារា បានចាប់យកការហាត់កីឡាគុនល្បុក្កតោ រហូតក្លាយជាអ្នកជំនាញ និងជាគ្រូបង្វឹកជម្រើសជាតិដែលមានសមត្ថភាពក្នុងការបង្វឹក និងរកប្រាក់ចំណូលមកផ្គត់ផ្គង់ជីវភាពបានសមរម្យ ហើយបានបញ្ចប់ការសិក្សានៅមហាវិទ្យាល័យ និងមានក្លិបល្បុក្កតោ គ្រប់គ្រងផ្ទាល់ខ្លួនចំនួន ៣ ផងដែរ។
ដោយសារការព្យាយាម និងការយកចិត្តទុកដាក់ស្រឡាញ់វិជ្ជាគុនល្បុក្កតោខ្លាំងនោះលោក វី តារា ត្រូវបានគេឃើញសម្តែងជាភាពយន្តមួយចំនួនដែលទាក់ទង ទៅនឹងឆាកប្រយុទ្ធ ឬឈុតវ៉ៃគ្នាជាដើម។ ជាមួយនឹងការតស៊ូប្រឹងប្រែងទាំងនេះហើយបានរុញច្រានយុវជន វី តារា ឲ្យមានប្រាក់បង់ថ្លៃចូលរៀននៅសាកលវិទ្យាល័យ ដោយទទួលបានបរិញ្ញាបត្រផ្នែកទេសចរណ៍ និងបដិសណ្ឋារកិច្ចនៅក្នុងឆ្នាំ ២០១៧។
យុវជនដែលមានមាឌមាំកម្ពស់ខ្ពស់ ១,៧៥ ម៉ែត្រ និងមានសុខភាពល្អទម្ងន់ ៨៥ គីឡូក្រាម រាងសង្ហាដូចខ្មែរអង្គរ លោក វី តារា បានប្រាប់ថា លោកជាកូនកំព្រាឪពុកតាំងពីអាយុ ៥ ឆ្នាំដោយរស់នៅជាមួយប្អូនស្រីម្នាក់ និងជាមួយម្តាយដែលមានមុខរបរជាមេចុងភៅចម្អិនម្អូបឲ្យចិន។ លោកបានស្រឡាញ់កីឡាក្បាច់គុនល្បុក្កតោ តាំងពីក្មេងដោយសារឃើញគេហាត់។
លោក វី តារា បាននិយាយថា៖ «ខ្ញុំបានចូលហ្វឹកហាត់ល្បុក្កតោលើកដំបូង ជាមួយលោកគ្រូក្រមាមាស សាន គឹមស៊ាន ក្នុងក្លិបអង្គររាជល្បុក្កតោ នៅឆ្នាំ ២០០៩ ហើយដោយការព្យាយាមហាត់បានមួយរយៈ និងគោរពវិន័យបានល្អ លោកគ្រូបានអនុគ្រោះឲ្យខ្ញុំបង់លុយតែពាក់កណ្តាល។ បន្ទាប់មកលោកគ្រូ ស្រឡាញ់រាប់អានខ្ញុំដូចជាកូនចៅ និងបានអនុញ្ញាតឲ្យហ្វឹកហាត់មិនបង់លុយទេ ដោយកាលនោះក្លិបស្ថិតនៅម្តុំអូរឫស្សី មុនប្តូរទៅចាក់អង្រែ រាជធានីភ្នំពេញ»។
តារា បានបន្ថែមថា៖ «ខ្ញុំនៅជួយការងារហ្វឹកហាត់ ជាពិសេសជួយមើលសិស្សថ្មីៗ ហើយជាបន្តបន្ទាប់ ខ្ញុំបានប្រឡងជាប់ក្រមាខ្មៅ ១ ជាន់។ ខ្ញុំបានភ្ជាប់ខ្លួនជាមួយកីឡាល្បុក្កតោមករហូតក្នុងនោះលោកគ្រូបង្ហាត់ឲ្យចេះសម្តែងក្បាច់គុន ជាឯកត្តជនជាក្រុម និងចេះបង្ហាញសូ (សម្តែង) ក្នុងកម្មវិធីផ្សេងៗ និងទទួលបានប្រាក់ឧបត្ថម្ភពីសប្បុរសជនជាបន្តបន្ទាប់»។
«ឆ្នាំ ២០១២ ខ្ញុំបានប្រឡងជាប់បាក់ឌុប និងបានចូលរៀននៅសាកលវិទ្យាល័យផ្នែកទេសចរណ៍ និងបដិសណ្ឋារកិច្ច ហើយក្រៅពីហាត់កីឡា ខ្ញុំធ្លាប់បម្រើការខាងព័ត៌មាននៅវិទ្យុមួយបានមួយរយៈ ដែលខ្ញុំអាចប្រើប្រាស់ភាសាអង់គ្លេសបានផងដែរ។ ក្នុងឆ្នាំ ២០១៣ ដល់ឆ្នាំ ២០១៥ ខ្ញុំបានឱកាសចូលប្រកួតជើងឯកជាតិកីឡាល្បុក្កតោ ដោយបានឈ្នះមានជយលាភីមេដាយសំរឹទ្ធ ប្រាក់ និងមេដាយមាសជាបន្តបន្ទាប់»។
គ្រូបង្វឹកវ័យ ២៦ ឆ្នាំ វី តារា បានប្រាប់បន្តថា៖ «ខ្ញុំបានលេចមុខមាត់ខ្លាំង នៅឆ្នាំ ២០១៦ ក្នុងពេលសហព័ន្ធកីឡាល្បុក្កតោ អនុញ្ញាតឲ្យចេញបង្ហាត់ដល់ក្រុមកងទ័ពជាង ៣០០ នាក់ដើម្បីមកបង្ហាញក្បាច់គុនក្នុងកីឡាជាតិលើកទី ១ នៅក្នុងស្តាតអូឡាំពិក ហើយនៅឆ្នាំ ២០១៨ ខ្ញុំបានចេញទៅបង្ហាត់ផ្នែកកងទ័ពចំនួន ៦០០ នាក់តាមអង្គភាពពិសេស សម្រាប់កីឡាជាតិលើកទី ២។ បន្ទាប់មក ខ្ញុំជាប់ជាគ្រូជម្រើសជាតិក្នុងឆ្នាំ ២០១៨ និងជាប់ជាគ្រូយោធាចារ្យបង្វឹកឲ្យកងទ័ពមកដល់បច្ចុប្បន្ននេះ ដោយកាលពីដើមឆ្នាំ ២០២០ នេះខ្ញុំចេញបង្ហាត់ដល់អង្គភាពកងទ័ពមួយចំនួននៅតាមកងពល និងភូមិភាគ»។
វី តារា បញ្ជាក់ថា៖ «ខ្ញុំមិនភ្លេចគុណលោកគ្រូតាក្រមាមាស សាន គឹមស៊ាន និងឯកឧត្តម វ៉ាត់ ចំរើន នោះទេដោយលោកតែងតែជួយខ្ញុំលើកទឹកចិត្តខ្ញុំជានិច្ច ហើយធ្វើឲ្យសព្វថ្ងៃ ខ្ញុំមានជីវភាពសមរម្យបានចំណូលពីក្បាច់គុនល្បុក្កតោគួរសមគឺបានពីការធ្វើគ្រូជម្រើសជាតិចំនួន ១,៨ លានរៀល ប្រាក់ឧបត្ថម្ភពីការបង្វឹកក្បាច់គុនឲ្យក្រុមភេរវកម្ម នៅព្រលានយន្តហោះ ១ លានរៀលក្នុង ១ ខែ និងបានពីការបង្វឹកតាមក្លិប ១ ចំនួន ដូចជាក្លិបល្បុក្កតោស៊ីសុវត្ថិ ក្លិបល្បុក្កតោស នៅខេត្តរតនគិរី នាចុងសប្តាហ៍ ព្រមទាំងបានបង្វឹកការថតភាពយន្តប្រយុទ្ធ និងសម្តែងខ្លួនឯងផងដែរ អ៊ីចឹងក្នុង ១ ខែ ជាមធ្យមក៏ខ្ញុំបានខ្ទង់ ៣ លានរៀលដែរ»៕
