.jpg)
ពិធីរាប់ថយក្រោយ ដើម្បីឆ្ពោះទៅធ្វើជាម្ចាស់ផ្ទះ ស៊ីហ្គេម ឆ្នាំ ២០២៣ ដែល CAMSOC បានរៀបចំឡើង កន្លងមក។
ភ្នំពេញ៖ មន្ត្រីបច្ចេកទេសរបស់គណៈកម្មាធិការជាតិរៀបចំការប្រកួតកីឡា អាស៊ីអាគ្នេយ៍ លើកទី ៣២ ឆ្នាំ ២០២៣ (CAMSOC) លោក វ៉ាត់ ចំរើន បានបញ្ចេញសារមួយ ដើម្បីបញ្ជាក់ដល់អ្នកពាក់ព័ន្ធបានដឹងពីខួបនៃការរាប់ថយក្រោយ ឆ្ពោះទៅធ្វើជាម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ ដែលគិតត្រឹមថ្ងៃទី ៥ ខែឧសភា នេះ នៅសល់ពេលត្រឹម ២ ឆ្នាំទៀតប៉ុណ្ណោះ។
អគ្គលេខាធិការ CAMSOC លោក វ៉ាត់ ចំរើន បានបញ្ចេញសាសព្ទយ៉ាងដូច្នេះថា៖ «ថ្ងៃទី ៥ ឧសភា ២០២១ ដល់ថ្ងៃទី ៥ ឧសភា ២០២៣ គឺជាខួបរាប់ថយក្រោយ ២ ឆ្នាំពេញនៃព្រឹត្តិការណ៍កីឡា SEA GAMES-ASEAN PARA GAMES 2023 ។ ២ ឆ្នាំជាពេលវេលាសេសសល់សម្រាប់ CAMSOC រួមចិត្ត រួមគិត រួមធ្វើ រួមទទួលខុសត្រូវ»។
លោកបានបន្តថា៖ «ថ្ងៃទី ៥ ឧសភា នេះ កាលពីឆ្នាំទៅ យើងបានធ្វើម្តងហើយឆ្នាំនេះ ជាសារមួយអាចរំឭក និងនាំគ្នាចងចាំ ព្រមទាំងដាស់ស្មារតីឱ្យមានការប្រុងជើងការជាបណ្តើរៗ និងព្យាយាម ហើយសារនេះក៏គោរពផ្ញើជូនថ្នាក់ដឹកនាំរាជរដ្ឋាភិបាល ក្រសួងស្ថាប័នពាក់ព័ន្ធ ក្រុមអត្តពលិកក្នុងគោលបំណងដូចទៅនឹងគោលដៅរបស់រាជរដ្ឋាភិបាលកម្ពុជា គឺប្រជាពលរដ្ឋម្នាក់ គប្បីលេងកីឡាបាន ១ ប្រភេទ ដើម្បីត្រៀមខ្លួនធ្វើជាម្ចាស់ផ្ទះឆ្ពោះស៊ីហ្គេម ២០២៣ ដែលនឹងបើកជាប្រវត្តិសាស្ត្រនៅថ្ងៃទី ៥ ខែឧសភា ឆ្នាំ ២០២៣»។
លោក វ៉ាត់ ចំរើន ពេលថ្លែងទៅកាន់អង្គប្រជុំ ដែល CAMSOC បានរៀបចំកន្លងមក។
ជាមួយគ្នានេះ លោក វ៉ាត់ ចំរើន បានជំរុញឱ្យអ្នកពាក់ព័ន្ធត្រូវរួមសាមគ្គីគ្នា ដើម្បីជម្នះឧបសគ្គទាំងឡាយ។ «នៅក្នុងដំណាក់កាលនេះជាពេលដែលយើង ត្រូវរៀបចំហ្គេម អ៊ីចឹងស្នើសុំឱ្យក្រុមការងារបច្ចេកទេស ក្រុមការងារជំនាញទាំងអស់ ត្រូវសាមគ្គីភាពគ្នា ឱ្យបានរឹងមាំ ដើម្បីជម្នះនូវឧបសគ្គទាំងឡាយ ព្រោះរយៈពេល ២ ឆ្នាំនេះ ជាពេលវេលា យើងត្រូវធ្វើសុក្រឹតភាព ត្រូវធ្វើវិធានការនៃការហ្វឹកហាត់ពិសេស»។
អ្នកជំនាញកីឡារូបនេះបានបន្ថែមថា៖ «២ ឆ្នាំនេះ ជារយៈពេលដ៏ខ្លី សម្រាប់កសាងគុណភាពនៃគុណផលកីឡា អ៊ីចឹងសូមឱ្យទទួលបាននូវស្មារតីថ្មី ធ្វើឱ្យវិបត្តិកូវីដ១៩ ក្លាយទៅជាអាវុធដ៏មុតស្រួចរបស់ក្រុមអត្តពលិក ដោយប្រែក្លាយពីគ្រោះឱ្យទៅជាឱកាស ឆ្ពោះទៅមុខយ៉ាងស្វាហាប់ ដើម្បីឱ្យព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមក្លាយជាព្រឹត្តិការណ៍កំណត់ត្រាប្រវត្តិសាស្ដ្រដ៏អស្ចារ្យ និងជាកិត្តិយសជាតិដ៏មហាសាលសម្រាប់តកូនចៅតរៀងទៅ»។
ជាមួយគ្នានេះ លោក វ៉ាត់ ចំរើន បានកោតសរសើរ ដល់ស្ថាប័នមួយចំនួនរួមមានអគ្គនាយកដ្ឋានកីឡា មជ្ឈមណ្ឌលជាតិហ្វឹកហ្វឺនកីឡា សហព័ន្ធកីឡាជាតិ មជ្ឈមណ្ឌលកីឡាកងយោធពលខេមរភូមិន្ទ អង្គភាពកីឡាក្រសួងមហាផ្ទៃសមាគមកីឡានានា ក្រុមអត្តពលិក គ្រូបង្វឹក ព្រមទាំងមន្ត្រីបច្ចេទេស និងថ្នាក់ដឹកនាំគ្រប់ជាន់ថ្នាក់ ដែលបានសហការល្អ និងរួបរួមគ្នាតែមួយ ដើម្បីជាតិតែមួយនៅក្នុងបេសកកម្មឆ្ពោះទៅធ្វើជាម្ចាស់ផ្ទះស៊ីហ្គេមនេះ ដែលមានគុណប្រយោជន៍ មិនសំដៅតែលើកីឡាមួយមុខនោះទេ។
លោក វ៉ាត់ ចំរើន បានបញ្ជាក់ថា៖ «ការធ្វើជាម្ចាស់ផ្ទះនេះ គឺប្រទេសនីមួយៗ មិនមែនសំដៅទៅរកសកម្មភាពកីឡាតែមួយមុខប៉ុណ្ណោះទេ ពោលជាឱកាស ដែលប្រទេសជាតិបានបង្ហាញពិភពលោកឱ្យស្គាល់ពីភូមិសាស្ត្រនយោបាយ វប្បធម៌ ទំនៀមទម្លាប់ ប្រពៃណី សេដ្ឋកិច្ចជាតិ និងចក្ខុវិស័យទេសចរណ៍របស់ជាតិសាសន៍យើង ហើយបន្ទាប់ពីប្រារព្ធរួច និងសល់សក្តានុពលគ្រប់យ៉ាងដែលជាមរតកសម្រាប់ជាតិ និងប្រជាជន»៕
