.jpg)
លោក សុខ អាង (ពាក់វ៉ែនតា) ថតជាមួយមិត្តរួមវគ្គទី ៣ នៅ USA។ សហការី
ភ្នំពេញៈ លោក សុខ អាង អគ្គលេខាធិការសហព័ន្ធកីឡាគុនដាវកម្ពុជា ដែលជាអ្នកជំនាញច្បាប់កីឡា និងមានបទពិសោធផ្នែកកីឡានោះបានទទួលអាហារូបករណ៍កីឡាពីគណៈកម្មាធិការអូឡាំពិកអន្តរជាតិ (IOC) ដើម្បីសិក្សាផ្នែកកីឡាជំនាញជាន់ខ្ពស់ ដែលជាកម្មវិធីបណ្តុះបណ្តាលមួយរបស់អង្គការសាមគ្គីអូឡាំពិក (SO)។
វគ្គបណ្ដុះបណ្ដាល International Coaching Enrichment Certificate Program នេះជាវគ្គបណ្ដុះបណ្ដាលពង្រឹងសមត្ថភាពគ្រូបង្វឹកកម្រិតអន្ដរជាតិដែលមានរយៈពេល ១ ឆ្នាំ និងធ្វើឡើងនៅទីក្រុង Lausanne ប្រទេសស្វីស ហើយលោក សុខ អាង នឹងចេញទៅស្វីសនៅថ្ងៃព្រហស្បតិ៍នេះ ខណៈសមាជិករបស់ IOC ២៨ ប្រទេសទៀតក៏ចូលរួមវគ្គនេះដែរ។
លោក សុខ អាង បានប្រាប់ថា៖ «វគ្គនេះ គេបែងចែកជា ៤ ដំណាក់កាល ហើយកន្លងមកខ្ញុំធ្លាប់ចូលរួមសិក្សាពីដំណាក់កាលទី ១ ដល់ទី ៣ នៅមជ្ឈមណ្ឌលហ្វឹកហ្វឺនអូឡាំពិក រដ្ឋកូឡូរ៉ាដូនៃសហរដ្ឋអាមេរិកនាឆ្នាំ ២០១៨។ ចំណែកដំណាក់កាលទី ៤ នេះគឺត្រូវយកគម្រោងដែលសិក្ខាកាមបានរៀបចំ និងអនុវត្តទៅបង្ហាញ និងការពារជាមួយគណៈកម្មការវាយតម្លៃដោយចាប់ផ្តើមពីថ្ងៃទី ២៨ ខែមេសាដល់ថ្ងៃទី ៣ ខែឧសភា ឆ្នាំ ២០១៩ ហើយអាហារូបករណ៍នេះស្នើសុំតាមរយៈគណៈកម្មាធិការអូឡាំពិកកម្ពុជា (NOCC) ។
លោក វ៉ាត់ ចំរើន អគ្គលេខាធិការ NOCC បានប្រាប់ថា៖ «លោក សុខ អាង ជាបេក្ខជនទី ៣ ដែលទទួលបានអាហារូបករណ៍ថ្នាក់ជំនាញជាន់ខ្ពស់នេះ បន្ទាប់ពីលោក ហែម គីរី ទទួលបាននៅឆ្នាំ ២០១១ ដែលបច្ចុប្បន្នជាអគ្គលេខាធិការរបស់សហព័ន្ធខ្មែរកីឡាហែលទឹក និងកញ្ញា កាង នុចបវរ បានទៅរៀននៅឆ្នាំ ២០១៤ ដែលបច្ចុប្បន្នជាគ្រូបង្វឹកកីឡាចំបាប់»។
លោក សុខ អាង បានចាប់ផ្ដើមហាត់កីឡាគុនដាវកាលឆ្នាំ ២០០៦ ហើយបានទទួលមេដាយប្រាក់ក្នុងការប្រកួតសាកល្បងកម្រិតជាតិក្នុងឆ្នាំដដែល។ លោកក៏បានចាប់ផ្ដើមធ្វើការនៅសហព័ន្ធកីឡាគុនដាវកម្ពុជាពីឆ្នាំ ២០០៧ និងបម្រើការនៅ NOCC ជាផ្លូវការនៅឆ្នាំ ២០០៨ បន្ទាប់ពីធ្វើការស្ម័គ្រចិត្តតាំងពីឆ្នាំ ២០០៦ មក។
ជាមួយគ្នានេះលោកធ្លាប់កាន់តំណែងជាអនុប្រធាននាយកដ្ឋានទំនាក់ទំនងអន្តរជាតិរបស់ NOCC, ជានាយកបេសកកម្មកីឡាយុទ្ធសិល្ប៍នៅថៃ ឆ្នាំ ២០០៩ និងជានាយកបេសកកម្មរងក្នុងកីឡាអាស៊ីហ្គេមនៅក្វាងចូវ ប្រទេសចិន ក្នុងឆ្នាំ ២០១០។ ឆ្នាំ ២០១៨ លោកបានទៅបំពេញវគ្គកម្រិតទី ៣ របស់ IOC នៅសហរដ្ឋអាមេរិក។
ក្រៅពីសិក្សា និងអប់រំតាមប្រព័ន្ធអនឡាញលោក សុខ អាង នៅតែភ្ជាប់ខ្លួនហ្វឹកហាត់ក្នុងវគ្គគ្រូបង្វឹកកីឡាគុនដាវអន្ដរជាតិតាំងពីឆ្នាំ ២០០៨ ដល់បច្ចុប្បន្ន។ លោកធ្លាប់បានដឹកនាំក្រុមកីឡាគុនដាវ និងបន្ដបង្ហាត់ និងផ្សព្វផ្សាយកីឡានេះរហូតមកដល់ពេលបច្ចុប្បន្ន ហើយលោកចេះភាសាអង់គ្លេស និងចិន យ៉ាងស្ទាត់ជំនាញ។
លោក អាង បន្ថែមថា៖ «ក្រោយបញ្ចប់វគ្គនេះ គឺទទួលបានសារៈសំខាន់លើការរៀបចំផែនការកីឡារយៈពេលវែងមានជំនាញក្នុងការបញ្ជ្រាបកីឡាជំនាញទៅកីឡាមហាជនពីថ្នាក់ជាតិដល់មូលដ្ឋាន ការរៀបចំ និងដឹកនាំអត្តពលិក ចូលរួមប្រកួតជាលក្ខណៈអន្ដរជាតិនានា ជាពិសេសវគ្គនេះបានបញ្ចូលកម្មវិធីបណ្ដុះបណ្ដាលជំនាញទន់ (Soft Skill) និងការធ្វើការជាក្រុមផងដែរ»។
លោកថា លក្ខណពិសេសនៃវគ្គកម្រិតទី ៤ នេះគឺត្រូវឆ្លងកាត់វគ្គដំណាក់កាលទី ១ ដល់ទី ៣ ក្នុងនោះគ្រូបង្វឹកទាំងអស់ត្រូវរៀបចំផែនការ និងអនុវត្តជាក់ស្ដែង ដែលមានសាស្ដ្រាចារ្យមានបទពិសោធក្នុងកីឡាជាអ្នកដឹកនាំ និងផ្ដល់យោបល់។ ការអនុវត្តនោះនឹងធ្វើពី ៤ ទៅ ៥ ខែមុននឹងយករបាយការណ៍ទៅបង្ហាញនៅទីស្នាក់ការកណ្ដាលរបស់ IOC៕
