ភ្នំពេញ: ប្រធានសហព័ន្ធកីឡាបាល់ទាត់កម្ពុជា (FFC) លោក សៅ សុខា បានបង្ហាញពីទំនុកចិត្តយ៉ាងមុតមាំ ជុំវិញការជំរុញការអភិវឌ្ឍវិស័យបាល់ទាត់នៅកម្ពុជា ដើម្បីឆ្ពោះទៅធ្វើជាម្ចាស់ផ្ទះការប្រកួតកីឡាស៊ីហ្គេមលើកទី ៣២ ឆ្នាំ២០២៣ ដោយលោកបានរំលេចចេញនៅវោហារស័ព្ទបែបទាក់ទាញមួយថា កម្ពុជាដឹងតែបានលើកពានហើយ។
លោក សៅ សុខា បានថ្លែងថា៖ «គោលដៅរបស់យើងនៅស៊ីហ្គេមឆ្នាំ ២០២៣ គឺដើម្បីលើកពានព្រោះអង្គមហាសន្និបាតបានពិភាក្សា និងឯកភាពគ្នាហើយថា កីឡាករដែលត្រូវប្រកួតនៅឆ្នាំ ២០២៣ សម្រាប់បាល់ទាត់គឺអាយុក្រោម ២២ ឆ្នាំអ៊ីចឹងមានន័យថា កីឡាករបណ្តាប្រទេសផ្សេងដែលមកប្រកួតនឹងកម្ពុជាគឺមានអាយុប្រហែលគ្នាដែលត្រូវកើតនៅឆ្នាំ ២០០១ ឬ ឆ្នាំ ២០០២ ហេតុនេះបើយើងចាប់ផ្តើមអភិវឌ្ឍថ្ងៃហ្នឹង គេក៏អភិវឌ្ឍក្នុងពេលដូចយើងដែរ គឺមនុស្សដូចតែគ្នា អត់បញ្ហានោះទេ»។
លោកបានបន្ថែមថា៖ «បញ្ហាពាននេះឲ្យតែយើងមានការរួមទាំងអស់គ្នាទៅ ដឹងតែសង្ឃឹម និងយកបានហើយ គឺពានមួយនេះគ្មានទៅណារួចពីដៃយើងទេ យើងត្រូវតែយកពានហ្នឹង ដើម្បីឲ្យស័ក្តិសមនឹងការដឹកនាំស្របពេលប្រទេសជាតិមានសុខសន្តិភាពផងគឺរាជរដ្ឋាភិបាល និងសម្តេចតេជោខិតខំប្រឹងប្រែងណាស់ អ៊ីចឹងយើងត្រូវតែខិតខំទាំងអស់គ្នាដើម្បីជាតិយើងបានរុងរឿង»។
លោក សៅ សុខា បានប្រាប់ប្រព័ន្ធផ្សព្វផ្សាយបែបនេះបន្ទាប់ពីលោកបានចូលរួមដឹកនាំមហាសន្និបាតសហព័ន្ធកីឡាបាល់ទាត់កម្ពុជាលើកទី ១៣ ឆ្នាំ ២០១៩ កាលពីព្រឹកថ្ងៃចន្ទម្សិលមិញ។ ប៉ុន្តែការឈានទៅសម្រេចគោលដៅឈ្នះពាននៅស៊ីហ្គេមឆ្នាំ ២០២៣ នោះក៏វាអាស្រ័យទៅលើការរៀបចំឲ្យបានទាន់ពេលវេលាលើផែនការបង្កើតសាលាតម្រង់ទិសបាល់ទាត់ទាំង ២៥ ខេត្ត-ក្រុងផងដែរ។
ជុំវិញការងារនេះលោក សៅ សុខា បានប្រាប់ឲ្យដឹងថា៖ «គិតមកដល់ពេលនេះសាលាតម្រង់ទិសនៅខេត្តចំនួន ៤ យើងបានធ្វើរួចរាល់ហើយ ឯ ៦ ទៀតកំពុងដំណើរការ និង ៥ ទៀតយើងកំពុងចុះកិច្ចសន្យា និងបំពេញនីតិវិធីដើម្បីបង្គ្រប់ឲ្យបាន ១៥ សាលា ហើយនៅសល់ ១០ សាលាទៀត វាអាស្រ័យទៅលើក្រុមហ៊ុនសាងសង់ ប៉ុន្តែគម្រោងរបស់យើងគឺយើងចង់ធ្វើឲ្យហើយនៅឆ្នាំ ២០១៩ នេះព្រោះពេលវេលាពីពេលនេះទៅឆ្នាំ ២០២៣ នៅកៀកណាស់ ហេតុនេះបើឆ្នាំនេះយើងអូសបន្លាយពេលវេលាគឺនៅឆ្នាំ ២០២៣ យើងនឹងប្រឈមបញ្ហាច្រើនទៅលើលទ្ធផលប្រកួតរបស់យើង»។
បើទោះបីជាសាលាតម្រង់ទិសបាល់ទាត់នៅទូទាំង ២៥ ខេត្ត-ក្រុងនៅមិនទាន់បានសាងសង់រួចរាល់ ប៉ុន្តែគិតមកដល់ពេលនេះ FFC បានបង្កើតឲ្យមានក្រុមយុវជនទាំងក្រុមអាយុក្រោម ១៥ ឆ្នាំ និងក្រុមអាយុក្រោម ១៧ ឆ្នាំតំណាងឲ្យសាលាតម្រង់ទិសទាំង ២៥ រួចហើយ ហើយបច្ចុប្បន្នក្រុមទាំងនេះ បាននិងកំពុងធ្វើការប្រកួតប្រជែងគ្នាយ៉ាងស្វិតស្វាញបំផុតទៅតាមក្របខ័ណ្ឌអាយុ ដើម្បីប្រជែងគ្នាលើកពានប្រចាំឆ្នាំ ២០១៩ នេះ។
នៅក្នុងមហាសន្និបាតកាលពីថ្ងៃចន្ទនោះ FFC ក៏បានធ្វើការបោះឆ្នោតជ្រើសរើសសមាជិកគណៈកម្មាធិការប្រតិបត្តិ ២ រូបសម្រាប់បំពេញបន្ថែមជំនួសលោក អ៊ុក សិទ្ធិជាតិ និងលោក ខៀវ ចិន្តាវ័ន្ត ដែលបានផុតអាណត្តិ (អស់សុពលភាព) ត្រឹមឆ្នាំ ២០១៩ នេះផងដែរ។
ជាមួយការបោះឆ្នោតជ្រើសរើសសមាជិកបំពេញបន្ថែម ២ នាក់វិញនោះគឺមានបេក្ខភាពឈរឈ្មោះ ៦ នាក់ហើយលោក សិទ្ធិជាតិ និងលោក ចិន្តាវ័ន្ត ដែលទើបអស់សុពលភាពក៏បានឈរឈ្មោះជាថ្មីឲ្យតំណាងក្លិបទាំង ៣៧ ជាសមាជិករបស់ FFC នៅទូទាំងប្រទេសកម្ពុជាធ្វើការបោះឆ្នោតវិញផងដែរ។
ជាលទ្ធផលលោក អ៊ុក សិទ្ធិជាតិ និងអ្នកស្រី ពុធ ធីតា ប្រធានក្លិបបឹងកេត បានជាប់នៅក្នុងការបោះឆ្នោតនោះដោយលោក សិទ្ធិជាតិ ទទួលការគាំទ្រ ៣២ សំឡេងក្នុងសំឡេងសរុប ៣៧ ហើយអ្នកស្រី ពុធ ធីតា បានការគាំទ្រ ២៩ សំឡេង។ ប៉ុន្តែលោក ហុក សុចិត្រា អ្នកចាត់ការទូទៅក្លិបវិសាខាលោក អៀង សាក់នីដា អគ្គលេខាធិការក្លិបបាល់ទាត់សូលទីឡូអង្គរ លោក ខៀវ ចិន្តាវ័ន្ត និងលោក ចាប សុខម៉េង មិនទទួលបានសំឡេងគាំទ្រច្រើនទេគឺចន្លោះពី ៦ សំឡេងទៅសូន្យសំឡេង។
សហព័ន្ធបាល់ទាត់រកបានចំណូលជាង ៦ លានដុល្លារកាលឆ្នាំ ២០១៨ បន្ថែមលើនេះសហព័ន្ធកីឡាបាល់ទាត់កម្ពុជាក៏បានបង្ហាញពីរបាយការណ៍ចំណូល និងចំណាយសម្រាប់ឆ្នាំ ២០១៨ កន្លងមកឲ្យអង្គមហាសន្និបាតបានដឹងផងដែរ ហើយតាមរបាយការណ៍នោះបង្ហាញថា FFC រកបានចំណូលសរុបចំនួន ៦០២៥៤២៨.៤៨ ដុល្លារ ប៉ុន្តែបានចំណាយទៅលើសកម្មភាពផ្សេងៗវិញអស់ចំនួន ៤៤៨៨៣៧០. ៤១ ដុល្លារ និងនៅសល់ថវិកាសរុប ១៥៣៧០៥៨.០៧ ដុល្លារគឺច្រើនជាងកាលឆ្នាំ ២០១៧ ដែលនៅសល់ថវិកា ១៤៧៧៣២៧.៨៤ ដុល្លារ។
តាមរបាយការណ៍ដដែលនោះបង្ហាញថា FFC បានទទួលចំណូលច្រើនពីសហព័ន្ធកីឡាបាល់ទាត់អន្តរជាតិដែលមានចំនួន ១៧៧២៩៨៥ ដុល្លារបានពីសហព័ន្ធកីឡាបាល់ទាត់អាស៊ីចំនួន ៣១៥៨៧៣ ដុល្លារបានពីសហព័ន្ធកីឡាបាល់ទាត់អាស៊ានមានចំនួន ១៩៩០៣៣.៩៧ ដុល្លារ បានពីសហព័ន្ធកីឡាបាល់ទាត់ជប៉ុន ២០០០០ ដុល្លារបានពីការឧបត្ថម្ភក្រុមហ៊ុនក្នុងស្រុក និងសកម្មភាពរបស់ ប.ស.ក ចំនួន ៦៨៦៩០០ ដុល្លារបានពីការឧបត្ថម្ភរដ្ឋចំនួន ២៩៥៤៤៦.៤៥ ដុល្លារព្រមទាំងចំណូលពីសប្បុរសធម៌ និងចំណូលក្រៅផែនការមួយចំនួនទៀត។
ចំពោះការចំណាយវិញ FFC បានចំណាយច្រើនទៅលើរដ្ឋបាល ព្រឹត្តិការណ៍ និងសង្គមអស់ ១៣៦០១៤៧.៩៤ ដុល្លារលើការចូលរួមប្រកួត និងអភិវឌ្ឍន៍ក្រុមជម្រើសជាតិអស់ ៩៤៣៩៤៧.៦៥ ដុល្លារលើប្រាក់ខែបុគ្គលិក និងគ្រូ អស់ ៦៧៥០១២.៧១ ដុល្លារ និងចំណាយលើគម្រោងអភិវឌ្ឍន៍បាល់ទាត់ថ្នាល និងយុវជនអស់ ៦៦៤៧៩៦.៥៥ ដុល្លារ៕