.jpg)
សកម្មភាពប្រកួតវាយកូនឃ្លីលើតុរបស់កីឡាករជម្រើសជាតិកម្ពុជា កាលស៊ីហ្គេម ឆ្នាំ២០១៧។ រូបថត ភ្នំពេញប៉ុស្តិ៍
ភ្នំពេញ៖ វាយកូនបាល់លើតុ ជាប្រភេទកីឡាមួយ ក្នុងចំណោមកីឡា ១២ ប្រភេទ ដែលកម្ពុជា គ្រោងបញ្ជូន ទៅហ្វឹកហាត់នៅប្រទេសចិន រយៈពេល ៣ ខែ មុននឹងការប្រកួតស៊ីហ្គេម នៅវៀតណាម ប៉ុន្តែមកដល់ពេលនេះ ភាពរអាក់រអួល និងខកខាន ឬពន្យារពេល ដោយបញ្ហាកូវីដ ១៩ នៅតែជាក្តីកង្វល់ ដែលលំបាកនឹងរំពឹងពីលទ្ធផលថា អាចដណ្តើមបានជ័យលាភីល្អ បានកម្រិតណានោះ។
យ៉ាងណាក៏ដោយ បើសិនជាគម្រោងហ្វឹកហាត់នៅប្រទេសចិន អាចធ្វើទៅបាន ក្នុងរយៈពេលវែង ឬមធ្យមនោះ លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា មានជំនឿចិត្តថា សមត្ថភាពក្រុមអត្តពលិកវាយកូនឃ្លីលើតុកម្ពុជា នឹងអាចដណ្តើមបានលទ្ធផលគួរជាទីរំពឹង នៅស៊ីហ្គេមលើក៣១ ប្រទេសវៀតណាម ចុងឆ្នាំ ២០២១ នេះ ជាមិនខាន។
លោក ស៊ុន សុទ្ធារិទ្ធ បានប្រាប់ថា កីឡាវាយកូនឃ្លីលើតុកម្ពុជា ជាប្រភេទកីឡាមួយក្នុងចំណោម១២ប្រភេទ ដែលនឹងចេញទៅហ្វឹកហាត់ នៅប្រទេសចិន រយៈពេល៣ខែ ដើម្បីពង្រឹងសមត្ថភាព សម្រាប់ត្រៀម ស៊ីហ្គេម លើកទី៣១ នៅប្រទេសវៀតណាម។ ជាមួយគ្នានេះ គ្រូបង្វឹកនិងធនធានបច្ចេកទេស នៅចិន គឺមានជំនាញលើកីឡាប្រភេទនេះតែម្តង។
តាមគម្រោង សហព័ន្ធបានត្រៀមបញ្ជូនក្រុមជម្រើសជាតិ ៨ នាក់ (ស្រី ៣ នាក់) ទៅហ្វឹកហាត់ និងចូលរួមប្រកួតប្រជែង លើ ៦ វិញ្ញាសា គឺឯកត្តជន វាយគូ និងប្រកួតជាក្រុម (បុរស-នារី) ដែលតាមគម្រោង សហព័ន្ធ មានផែនការពង្រឹងលើវិញ្ញាសាជាក្រុម។
លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា។ រូបថត សហការី
លោក ស៊ុន សុទ្ធារិទ្ធ បានបញ្ជាក់ថា៖ «ការប្រកួត នៅក្រៅប្រទេសកន្លងមក យើងធ្លាប់ទទួលបានលទ្ធផលល្អ គឺវិញ្ញាសាវាយគូ ឬជាក្រុមដូចជាឆ្នាំ ២០០៩ និង ២០១៣ ជាដើម។ បច្ចុប្បន្នក្រុមកីឡាករកីឡាការិនិ កំពុងបំបែកការហ្វឹហាត់នៅតាមផ្ទះរៀងៗខ្លួន ដោយគ្រាន់តែត្រួតពិនិត្យ ការហ្វឹកហាត់តាមប្រព័ន្ធអនឡាញ ដែលយើងលំបាក និងគិតថា កម្រិតបច្ចេកទេសធ្លាក់ចុះជាងបង្ហាត់ប្រមូលផ្តុំផ្ទាល់ដៃ»។
«មានតែការហ្វឹកហាត់ នៅប្រទេសចិន នេះទេ ដែលធ្វើឱ្យយើងមានសង្ឃឹមខ្ពស់ ព្រោះការហាត់នៅចិន អាចនឹងបង្កើននូវបច្ចេកទេស កាន់តែល្អប្រសើរ ដោយសារតែការប្រកួតក្នុងស្រុក គឺក្រុមជម្រើសជាតិទាំងនេះ ភាគច្រើនសុទ្ធតែដណ្តើមបានចំណាត់ថ្នាក់លេខ ១ មេដាយមាស ប្រចាំឆ្នាំ»។
លោកអគ្គលេខាធិការរូបនេះ បានប្រាប់ទៀតថា ការប្រកួតស៊ីហ្គេម នៅវៀតណាម ប្រភេទកីឡាវាយកូនឃ្លីលើតុនេះ មានវិញ្ញាសាសរុបចំនួន ៧ ក្នុងនោះផ្នែកបុរស មានវាយឯកត្តជន,វាយគូ និងវាយជាក្រុម ចំណែកផ្នែកនារី មាន ៣ វិញ្ញាសាដែរ គឺវាយឯកត្តជន វាយគូ និងវាយជាក្រុម និងប្រកួតចម្រុះ ១ វិញ្ញាសាទៀត ហើយតាម ផែនការយុទ្ធសាស្ត្ររបស់សហព័ន្ធ ក៏ដូចជាការខិតខំហ្វឹកហាត់ គឺសហព័ន្ធអាចនឹងដាក់បាន ៦ វិញ្ញាសារ ប៉ុន្តែការខកខាន ឬពន្យារពេល ដោយសារកូវីដ ១៩ ធ្វើឱ្យយើងលំបាក ព្យាករ ឬសន្និដ្ឋានពីលទ្ធផលណាស់។
បើតាមផែនការរបស់ CAMSOC ធ្លាប់បានបញ្ជាក់ថា កម្ពុជា បានត្រៀមបញ្ជូនកីឡាករកីឡាការិនីដែលមានសក្តានុពលចំនួន ១២ ប្រភេទកីឡា ដោយមានអត្តពលិកចំនួន ១៣៥ នាក់ចេញទៅហ្វឹកហាត់នៅប្រទេសចិន ដើម្បីត្រៀម ស៊ីហ្គេម លើកទី៣១ ឆ្នាំ ២០២១ នៅប្រទេសវៀតណាម និងឆ្ពោះទៅទទួលធ្វើម្ចាស់ផ្ទះស៊ីហ្គេម លើកទី៣២ ឆ្នាំ ២០២៣ នៅកម្ពុជា៕
