ភ្នំពេញ៖ អត្តពលិក គ្រូបង្វឹក និងប្រតិភូជាមន្ត្រីនគរបាលជាតិកម្ពុជា ក្នុងអង្គភាពកីឡាក្រសួងមហាផ្ទៃជិត ១០០ នាក់ ដែលទើបបានឈ្នះមេដាយមាស ប្រាក់ សំរឹទ្ធ ពីព្រឹត្តិការណ៍ 18th World Police And Fire Games នៅខេត្តចឹងតូ ប្រទេស ចិន នោះ ត្រូវបានលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ផ្តល់ប្រាក់រង្វាន់សរុបចំនួន ៩៩ ១០០ ដុល្លារ ដើម្បីលើកទឹកចិត្ត។
សម្រាប់ការផ្តល់ប្រាក់រង្វាន់នេះ ត្រូវបានធ្វើឡើងនៅទីស្តីការក្រសួងមហាផ្ទៃកាលពីល្ងាចថ្ងៃព្រហស្បតិ៍ដោយក្នុងនោះ លោក ស ខេង បានផ្តល់ជូនអត្តពលិកឈ្នះមេដាយមាសមួយគ្រឿង ចំនួន ២ ០០០ ដុល្លារ មេដាយប្រាក់ចំនួន ១ ៥០០ ដុល្លារ និងមេដាយសំរឹទ្ធចំនួន ១ ០០០ ដុល្លារ ហើយមានប្រភេទកីឡាចំនួន ១៣ ដែលបានឈ្នះមេដាយ មានកីឡាទូកនាគបាល់ឱប ការ៉ាតេ យូដូ ជឺជីតស៊ូ ចំបាប់ និងចំបាប់កាច់ដៃ កីឡាតេក្វាន់ដូ ហែលទឹក វាយសី អត្តពលកម្ម វាយកូនឃ្លីលើតុ និងកីឡាទ្រីយ៉ាត្លុង។
លោក ជា ប៊ុនហេង ប្រធានអង្គភាពកីឡានគរបាលជាតិ បានប្រាប់ភ្នំពេញប៉ុស្តិ៍ថា នៅក្នុងព្រឹត្តិការណ៍ 18th World Police and Fire Games នៅប្រទេស ចិន នោះ ក្រុមអត្តពលិកជាប៉ូលិសកម្ពុជា ដណ្ដើមបានមេដាយសរុប ៤៦ គ្រឿង ក្នុងនោះមេដាយមាស ១៨ ប្រាក់ ១៧ និងមេដាយសំរឹទ្ធ ១១ គ្រឿង លើប្រភេទកីឡាចំនួន ១៣ ហើយមានចំណាត់ថ្នាក់លេខ ១៣ ក្នុងចំណោម ៧៩ ប្រទេស នៅលើពិភពលោកដែលបានប្រព្រឹត្តទៅតាំងពីថ្ងៃ ៨ ដល់ទី ១៨ ខែ សីហា ឆ្នាំ ២០១៩។
លោកឧត្តមសេនីយ៍ឯក ជា ប៊ុនហេង បានបញ្ជាក់ថា៖ «ដោយមើលឃើញពីភាពរីកចម្រើន និងសកម្មភាពលេចធ្លោ ឈានជាលំដាប់របស់កីឡាក្រសួងមហាផ្ទៃ ហើយក្នុងនាមសម្តេចក្រឡាហោម ស ខេង ជាប្រធានក្រុមប្រឹក្សាកីឡាក្រសួងមហាផ្ទៃផងនោះ សម្តេចបានប្រឹងប្រែងស្វែងរកការជួយឧបត្ថម្ភលើកទឹកចិត្ត ដល់អ្នកឈ្នះមេដាយពីព្រឹត្តិការណ៍នេះ ហើយនេះចាត់ទុកថា ជាប្រវត្តិសាស្ត្ររបស់កីឡាប៉ូលិសកម្ពុជា ដែលមានអត្តពលិកឆ្នើមៗដណ្តើមបានចំណាត់ថ្នាក់ល្អគួរជាទីមោទនភាព»។
លោក ជា ប៊ុនហេង បានលម្អិតថា សម្រាប់រង្វាន់ជាក្រុម ដូចជាអត្តពលិកទូកនាគ ១២ រូប ទទួលបាន ៩ ៦០០ ដុល្លារ បាល់ឱបចំនួន ១៣ នាក់ ទទួលបាន ៦ ៥០០ ដុល្លារ ក្រុមការ៉ាតេដូបុរសចំនួន ៥ នាក់ ទទួលបាន ៤ ០០០ ដុល្លារ ការ៉ាតេដូផ្នែកនារី ៣ នាក់ បាន ១ ៥០០ ដុល្លារ ខណៈគ្រូបង្វឹក និងប្រតិភូ ចំនួន ២៣ នាក់ ក្នុងម្នាក់ៗបាន ៥០០ ដុល្លារ។
ចំណែកលោក ស ខេង បានថ្លែងក្នុងពិធីចែករង្វាន់នោះថា៖ «ខ្ញុំសូមកោតសរសើរចំពោះការប្រឹងប្រែងរបស់កីឡាករកីឡាការិនី គ្រូបង្វឹក និងថ្នាក់ដឹកនាំកីឡាក្រសួងមហាផ្ទៃទាំងអស់ ដែលប្រឹងប្រែងប្រជែងបានលទ្ធផលល្អ ពិសេសមានលោកនាយឧត្តមសេនីយ៍ នេត សាវឿន និងលោកឧត្តមសេនីយ៍ឯក ជា ប៊ុនហេង»។
ជាមួយគ្នានោះ លោក ស ខេង បានបន្តសង្កត់ធ្ងន់ដល់អង្គភាពកីឡាក្រសួងមហាផ្ទៃ ដើម្បីជំរុញកីឡា ៣ ប្រភេទទៀត មានបាល់ទាត់ វាយកូនហ្គោល និងកីឡាបាញ់កាំភ្លើង ពិសេសកីឡាដែលប្រើប្រាស់បញ្ញាស្មារតី ក្នុងការប្រកួតប្រជែង។ បន្ថែមលើនេះ លោកឧបនាយករដ្ឋមន្រ្តីនឹងផ្លាស់ប្តូរ អ្នកគ្រប់គ្រងកីឡាបាល់ទាត់អគ្គស្នងការដ្ឋាននគរបាលជាតិពីលោក ជួន ណារិន្ទ ដើម្បីឲ្យលោកនាយឧត្តមសេនីយ៍ នេត សាវឿន រៀបចំឡើងនូវអ្នកគ្រប់គ្រងថ្មីឡើងវិញ ព្រោះកីឡាបាល់ទាត់អគ្គស្នងការដ្ឋាននគរបាលជាតិបច្ចុប្បន្នស្ថិតនៅចំណាត់ថ្នាក់លេខ ១១ ក្នុងបណ្តាក្រុមទាំង ១៤ នៃលីកកំពូលកម្ពុជា៕