.jpg)
លោក ស សុខា ពេលដឹកនាំអង្គប្រជុំ ដែលធ្វើកាលពីថ្ងៃចន្ទ។ រូប ពន្លក
ភ្នំពេញ៖ រដ្ឋលេខាធិការក្រសួងអប់រំ យុវជន និងកីឡា លោក ស សុខា បានអំពាវនាវឲ្យសហព័ន្ធកីឡាជាតិ ដែលទទួលថវិកាឧបត្ថម្ភពីក្រសួង ត្រូវបង្កើតគណនីធនាគាររបស់សហព័ន្ធផ្ទាល់ គឺមិនត្រូវបង្កើតគណនីខ្លួនឯងនោះឡើយ ហើយការចំណាយត្រូវធ្វើឡើងឲ្យចំគោលដៅដែលបានកំណត់។
នៅក្នុងកិច្ចប្រជុំ ស្តីពីវឌ្ឍនភាពការងារអនុវិស័យអប់រំកាយ និងកីឡា នៅសាលមជ្ឈមណ្ឌលជាតិហ្វឹកហ្វឺនកីឡាកាលពីថ្ងៃចន្ទ លោក ស សុខា បានថ្លែងថា៖ « មានសហព័ន្ធកីឡាជាតិចំនួន ៤២ ដែលបានការឧបត្ថម្ភថវិកាពីក្រសួងអប់រំ ដើម្បីយកទៅជំរុញ និងជួយអភិវឌ្ឍប្រភេទកីឡានីមួយៗ ដូច្នេះសហព័ន្ធត្រូវបង្កើតគណនីធនាគាររបស់សហព័ន្ធផ្ទាល់ ព្រោះក្រសួងមិនបានឧបត្ថម្ភបុគ្គលឡើយ ហេតុនេះបើប្រធានសហព័ន្ធបង្កើតគណនីធនាគាររបស់ខ្លួនផ្ទាល់ គឺនាយកដ្ឋានមិនអនុញ្ញាតផ្តល់ជូនទេ»។
លោករដ្ឋលេខាធិការបានបន្ថែមទៀតថា សហព័ន្ធទទួលបានឧបត្ថម្ភហើយនៅតែពិបាកទៀតគ្រាន់តែបំពេញតួនាទី ជាអ្នកទទួលសោះ។ ជាមួយគ្នានេះ ក្រសួងក៏ចង់ដឹងពីការចាយវាយរបស់សហព័ន្ធថា ត្រឹមត្រូវទៅតាមគោលការណ៍ទាំង ៣ ផ្នែកហើយ ឬនៅ គឺទី១ ចំណាយលើវគ្គបណ្តុះបណ្តាលទី២ លើរៀបចំការប្រកួតជើងឯកប្រចាំឆ្នាំ និងទី៣ ចំណាយទៅលើទំនាក់ទំនងរដ្ឋបាល។
លោក ស សុខា ដែលជារដ្ឋលេខាធិការទទួលបន្ទុកកីឡានោះ តែងតែយកចិត្តទុកដាក់ និងហ៊ានរិះគន់ទៅលើលើភាពអសកម្មរបស់មន្ត្រីថ្នាក់កណ្តាល និងថ្នាក់ក្រោម ដើម្បីឲ្យមានការកំណែទម្រង់ជាវិជ្ជមាន ហើយកន្លងមក លោកធ្លាប់ប្រើពាក្យគួរឲ្យចងចាំមួយថា ថ្នាក់ដឹកនាំនៅក្នុងសហព័ន្ធមួយ មិនគួរមានតួនាទីជាចោរផង និងជាប៉ូលិសផងនោះទេ ព្រោះវានឹងធ្វើឲ្យសហព័ន្ធនោះរលាយ។
ចំណែក លោក រស់ សុវាចា អគ្គលេខាធិការគណៈកម្មាធិការទទួលស្គាល់គុណភាពអប់រំនៃកម្ពុជា និងជាអ្នកនាំពាក្យក្រសួងអប់រំ យុវជន និងកីឡា បានប្រាប់ភ្នំពេញប៉ុស្តិ៍ថា៖ «នៅក្នុងសហព័ន្ធកីឡាជាតិទាំង ៤២ ដែលទទួលបានថវិកាសម្រាប់ធ្វើសកម្មភាព ត្រូវបានចែកជា ៣ គឺសហព័ន្ធកីឡាជាតិប្រភេទទី១ មាន ១០ ដោយក្នុងសហព័ន្ធទទួលបាន ១០០ លានរៀល ឯសហព័ន្ធប្រភេទទី២ មាន ៩ បាន ៨០ លានរៀល និងសហព័ន្ធប្រភេទទី៣ មាន ២៣ ដោយ ១ សហព័ន្ធបាន ៦០ លាន ក្នុង ១ ឆ្នាំ»។
លោកបន្តថា៖ «ការចំណាយនេះ សហព័ន្ធជាតិនីមួយៗ ត្រូវបានកំណត់ឲ្យចំគោលដៅចំនួន ៣ ផ្នែក គឺទៅលើវគ្គបណ្តុះបណ្តាលចំនួន ៣៥ ភាគរយ ចំណាយលើការប្រកួតចំនួន ៤៥ ភាគរយ និងចំណាយទៅលើរដ្ឋបាលចំនួន ២០ ភាគរយ»។ តាមការចំណាយប្រចាំឆ្នាំដែលភ្នំពេញប៉ុស្តិ៍ទទួលបាន គឺសហព័ន្ធប្រភេទទី១ ចំណាយសរុបអស់ ១ ០០០ លានរៀល ប្រភេទទី២ ចំណាយអស់ ៧២០ លានរៀល និងសហព័ន្ធប្រភេទទី៣ ចំណាយសរុបអស់ ១ ៣៨០ លានរៀល ហើយបើសរុបក្នុង ១ ឆ្នាំ ក្រសួងអប់រំត្រូវចំណាយអស់ចំនួន ៣ ១០០ លានរៀលឯណោះ។
យ៉ាងណាក៏ដោយ តាមការសម្ភាសស្រង់ប្រភពព័ត៌មានផ្សេងៗបានឲ្យដឹងថា សហព័ន្ធកីឡាជាតិមួយចំនួនកន្លងមកបានចំណាយមិនចំគោលដៅ ដោយការប្រកួតជើងជាតិប្រចាំឆ្នាំម្តងៗ មន្ត្រីខ្លះមានតែឈ្មោះបើកលុយ អត់ឃើញបង្ហាញវត្តមាន ហើយកីឡាករខ្លះមានតែឈ្មោះ តែគ្មានកីឡាករ។ បន្ថែមពីលើនេះ គណៈកម្មការមានច្រើនសំពីងសំពោងតែអ្នកជំនាញកីឡាប្រាប់ថា ចំនួនប្រកួត គឺហួសតម្រូវការប្រហែល ២ ដង៕
