.jpg)
លោក ស សុខា ពេលថ្លែងនៅក្នុងពិធីបើកកិច្ចប្រជុំបូកសរុបការងារកាលពីព្រឹកថ្ងៃចន្ទ។ រូប អគ្គនាយកដ្ឋាន
ភ្នំពេញៈ លោក ស សុខា រដ្ឋលេខាធិការក្រសួងអប់រំ យុវជន និងកីឡា បានធ្វើការអំពាវនាវឲ្យមន្ទីរអប់រំ យុវជន និងកីឡានៅតាមបណ្តាខេត្តនីមួយៗត្រូវចៀសវាងឲ្យបាននូវការប្រកាន់បក្ខពួកនិយមក្នុងការជ្រើសរើសអត្តពលិកឲ្យឡើងមកប្រកួតថ្នាក់ជាតិក៏ដូចជាជ្រើសរើសក្រុមយុវជនថ្នាលជម្រើសជាតិ។
លោក ស សុខា បានថ្លែងថា៖ «ខ្ញុំសំណូមពរឲ្យប្រធានមន្ទីរអប់រំទាំងអស់យកចិត្តទុកដាក់ ហើយធ្វើម៉េចបើកឲ្យបានទូលំទូលាយក្នុងការជ្រើសរើសកីឡាករថ្នាលជម្រើសជាតិ ឬត្រៀមជាក្រុមថ្នាលគឺយើងមិនអាចយកតែបងប្អូន ឬមិត្តភក្តិ ឬកូនចៅមកហាត់ដើម្បីផ្តល់ឱកាសទេ គឺយើងត្រូវផ្តល់ឱកាសឲ្យជារួម»។
ការលើកឡើងរបស់លោក ស សុខា ត្រូវបានធ្វើឡើងនៅក្នុងពិធីបើកកិច្ចប្រជុំបូកសរុបការងារអនុវិស័យអប់រំកាយ និងកីឡាឆ្នាំ ២០១៧-២០១៨ និងលើកទិសដៅឆ្នាំ ២០១៩ កាលពីថ្ងៃចន្ទម្សិលមិញ ហើយការលើកឡើងបែបនេះក៏ព្រោះតែលោកធ្លាប់បានជួបប្រទះឃើញភាពមិនប្រក្រតីមួយចំនួនជុំវិញការជ្រើសរើសអត្តពលិកមានទេពកោសល្យខ្ពស់តំណាងឲ្យខេត្តឡើងមកប្រកួតថ្នាក់ជាតិ ឬចូលរួមការប្រកួតសិស្សថ្នាក់តំបន់ដែលធ្វើឲ្យអត្តពលិកល្អៗមួយចំនួនបានបាត់ឱកាសក្នុងការប្រជែងយកឱកាសចូលក្រុមជម្រើសជាតិ ឬក្រុមថ្នាលជម្រើសជាតិ។
នៅក្នុងកិច្ចប្រជុំបូកសរុបការងារអនុវិស័យអប់រំកាយ និងកីឡាដែលត្រូវបានធ្វើឡើងនៅភោជនីយដ្ឋានទន្លេបាសាក់ ២ ហើយមានការចូលរួមគ្រប់ភាគីពាក់ព័ន្ធទាំងផ្នែកអប់រំកាយ និងផ្នែកកីឡានោះលោក ស សុខា ក៏ជំរុញឲ្យមានការរួមគ្នា ដើម្បីពង្រឹងគុណភាពកីឡាកម្ពុជា ដើម្បីប្រជែងជាមួយប្រទេសក្នុងតំបន់ផងដែរ។
លោក ស សុខា បានថ្លែងថា៖ «ចំពោះខ្ញុំផ្ទាល់នៅមិនទាន់ពេញចិត្តនៅឡើយទេចំពោះលទ្ធផលការប្រកួតកីឡាដែលយើងទទួលបាននៅលើឆាកអន្តរជាតិកន្លងមកព្រោះមកដល់ម៉ោងនេះ យើងលើតែប្រ៊ុយណេ និងលើឡាវ បន្តិចបន្តួច ហើយបើយើងមិនខំប្រឹង គេអាចនឹងស្មើយើងដែរ។ ចំណែកប្រទេសនៅលើយើងក្នុងតំបន់អាស៊ានមានថៃ វៀតណាម សិង្ហបុរី ឥណ្ឌូនេស៊ី និងហ្វីលីពីនជាដើម»។
លោកបញ្ជាក់ថា៖ «ការប្រកួតស៊ីហ្គេមឆ្នាំ ២០២៣ ខាងមុខ បើយើងមិនខិតខំប្រឹងប្រែងចម្រាញ់រកធនធានមនុស្សដែលគាត់ចេះដឹង ឬមានសមត្ថភាពពិតប្រាកដទេគឺយើងខំប្រឹងប៉ុនណាក៏ទៅមិនរួចដែរ អ៊ីចឹងការទទួលបាននូវមេដាយនេះខ្ញុំបាទក៏ដូចជាថ្នាក់ដឹកនាំក្រសួងអប់រំ យុវជន និងកីឡានឹងមានវិធានការបន្ថែមក្នុងការប្រមូលផ្តុំក្រុមជម្រើសជាតិថ្នាលដើម្បីឲ្យចូលមករួមរស់ជាមួយគ្នាអាចរយៈពេល ១ ឬ ២ ឆ្នាំមុនពេលស៊ីហ្គេម ឆ្នាំ ២០២៣ មកដល់»។
ជាមួយគ្នានេះក្រសួងអប់រំក៏បានដាក់ចេញនូវផែនការសំខាន់ៗចំនួន ៦ ចំណុចដើម្បីឲ្យមន្ទីរអប់រំ និងភាគីពាក់ព័ន្ធធ្វើការអនុវត្តផងដែរ ទី១ មន្ទីរត្រូវរៀបចំផែនការសកម្មភាពឲ្យបានច្បាស់លាស់ ហើយមិនអាចចម្លងតាមគ្នា ទី២ ត្រូវសហការជាមួយសហព័ន្ធជាតិដើម្បីចុះបណ្ដុះបណ្ដាលពីច្បាប់ និងជំនាញកីឡា ទី៣ ត្រូវមានការយកចិត្តទុកដាក់ និងតាមដានចំពោះវត្តមានគ្រូ វត្តមានសិស្ស និងការអនុវត្តម៉ោងកីឡាតាមសាលាឲ្យបានជាប់លាប់ និងជាក់លាក់។
ចំណែកទី៤ ធ្វើរបាយការណ៍ជូនក្រសួងឲ្យបានទៀងទាត់ដើម្បីតាមដានការអនុវត្ត វាយតម្លៃ និងដាក់ទិសដៅប្រកបដោយប្រសិទ្ធភាព។ ទី៥ រៀបចំការប្រកួតថ្នាក់ជាតិឲ្យមានពេលវែង និងមានកីឡាគ្រប់ប្រភេទ ដើម្បីពង្រឹងពង្រីកសមត្ថភាព និងគុណភាពអត្តពលិកត្រៀមធ្វើស៊ីហ្គេមឆ្នាំ ២០២៣ ហើយទី៦ ត្រូវរួមគ្នាជាពហុវិស័យ ដើម្បីជំរុញការអភិវឌ្ឍវិស័យកីឡាទាំងថ្នាក់ខេត្ត ជាតិ និងអន្តរជាតិ៕
