ភ្នំពេញ៖ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានជំរុញឲ្យថ្នាក់ដឹកនាំគ្រូបង្វឹក និងក្រុមអត្តពលិកព្រមទាំងភាគីពាក់ព័ន្ធផ្សេងទៀត រួបរួមគ្នាជួយអភិវឌ្ឍវិស័យកីឡាការ៉ាតេឲ្យកាន់តែមានភាពរីកចម្រើន និងមានគុណភាព ដើម្បីឆ្ពោះទៅរកភាពជោគជ័យ គឺការដណ្តើមបានមេដាយជូនជាតិ នៅក្នុងការប្រកួតស៊ីហ្គេមលើកទី ៣២ ឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ។
លោក អូន ព័ន្ធមុនីរ័ត្ន បានថ្លែងថា៖ «ក្នុងអាណត្តិទី ៨ កន្លងមកនេះ យើងបានធ្វើការកែទម្រង់ការងារផ្ទៃក្នុង និងការងារបច្ចេកទេសចាំបាច់មួយចំនួន ដោយរលូន និងប្រកបដោយប្រសិទ្ធភាព។ ហេតុនេះខ្ញុំសូមឲ្យអ្នកទាំងអស់គ្នា បន្តរួបរួមគ្នា ដើម្បីធ្វើឲ្យការ៉ាតេ កាន់តែមានការរីកចម្រើនមានសម្ទះ និងមានភាពរឹងមាំ ហើយជួយឲ្យយើង អាចនាំមកបាននូវកិត្តិយសជូនប្រទេសជាតិយើង នៅពេលដែលកម្ពុជាត្រូវធ្វើជាម្ចាស់ផ្ទះស៊ីហ្គេម ឆ្នាំ ២០២៣»។
ការលើកឡើងរបស់លោកឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ រូបនេះត្រូវបានធ្វើឡើងនៅក្នុងមហាសន្និបាតបញ្ចប់អាណត្តិទី ៨ របស់សហព័ន្ធកីឡាការ៉ាតេកម្ពុជា នៅទីស្នាក់ការគណៈកម្មាធិការជាតិអូឡាំពិក កម្ពុជា (NOCC) កាលពីព្រឹកថ្ងៃអង្គារ ហើយក៏ជាពេលដែលអង្គមហាសន្និបាត បានបោះឆ្នោតឲ្យលោក អូន ព័ន្ធមុនីរ័ត្ន បន្តធ្វើជាប្រធានសហព័ន្ធ ដោយសំឡេងគាំទ្រ ១០០ ភាគរយផងដែរ។
ចំណែកលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ត្រូវបានអង្គមហាសន្និបាតបោះឆ្នោតឲ្យធ្វើជាអនុប្រធាន លោក ជូ វិជិត្ត ជាអនុប្រធានអចិន្រ្តៃយ៍ ហើយលោក សុក ស៊ីផាន់ណា លោក សាមឺឌី ស៊ីវឌ្ឍនា លោក ហាវ រតនៈ និងលោក សាយ ណូរ៉ា ជាអនុប្រធាន។
ចំពោះលោក វ៉ាត់ ចំរើន បន្តធ្វើជាអគ្គលេខាធិការដដែល ហើយអគ្គលេខាធិការរងមានលោក ណុប វណ្ណថារ៉ូ លោក ម៉ិញ បានកុសល លោក អ៊ិច សុខមនី និងលោក ដែក ភារៈ ខណៈលោក កែវ បេងវឌ្ឍន៍ ជាអគ្គហេរញ្ញិក លោក អ៊ឹម សិទ្ធីរ៉ា លោក ជាប ដាវុធ លោក ប៊ូ វង្សសុខា និងលោក រ័ត្ន មុនី ជាអគ្គហេរញ្ញិករង រីឯលោក យាន ងួន លោក ម៉ៅ ម៉ុន កញ្ញា ជា ថាវី និងលោក ប៉ែន រតនា ជាសមាជិក។
បន្ថែមទៅលើសមាសភាពគណៈកម្មាធិការប្រតិបត្តិទាំង ២១ រូប ក្នុងអាណត្តទី ៩ ឆ្នាំ ២០២០ ដល់ឆ្នាំ ២០២៤ នេះ សហព័ន្ធកីឡាការ៉ាតេកម្ពុជា បានតែងតាំងព្រឹទ្ធាចារ្យការ៉ាតេមួយចំនួនជាទីប្រឹក្សាជាន់ខ្ពស់ និងជាឧត្តមការ៉ាតេចារ្យរបស់សហព័ន្ធ ហើយក៏បានផ្តល់វិញ្ញាបនបត្រដល់ព្រឹទ្ធាចារ្យ និងគ្រូបង្វឹកមួយចំនួនធំ ដែលបានទទួលកម្រិតដាន់ និងខ្សែក្រវាត់ខ្មៅផងដែរ។
ទន្ទឹមនឹងនេះ លោករដ្ឋមន្រ្តីក្រសួងទេសចរណ៍ ថោង ខុន និងជាប្រធាន NOCC បានចាត់ទុកការបង្កើតបានមហាគ្រួសារកីឡាការ៉ាតេដ៏រឹងមាំ ក្នុងអាណត្តិទី ៩ នេះ ថាជាអាណត្តិដ៏សំខាន់ និងជាអាណត្តិយុទ្ធសាស្រ្តសម្រាប់កីឡាការ៉ាតេ ក្នុងការអភិវឌ្ឍខ្លួនដើម្បីពង្រឹង និងសម្រួចគុណភាពកាន់តែប្រសើរ ឡើងថែមទៀតក្នុងការឈានទៅដណ្តើមមេដាយជូនជាតិ នៅក្នុងការប្រកួតស៊ីហ្គេម ឆ្នាំ ២០២៣។
យ៉ាងណាក៏ដោយ លោកអូន ព័ន្ធមុនីរ័ត្ន បានជំរុញឲ្យគណៈកម្មាធិការប្រតិបត្តិអាណត្តិថ្មី ត្រូវខំប្រឹងបន្ថែមទៀត ក្នុងការជួយជ្រោមជ្រែងកីឡាការ៉ាតេ។ លោកបានថ្លែងថា៖ «ខ្ញុំសូមលើកទឹកចិត្តឯកឧត្តម លោក និងលោកស្រីទាំងអស់ ដែលទើបបានការតែងតាំង និងទទួលភារកិច្ចថ្មីខិតខំចូលរួមចំណែកពង្រឹង និងអភិវឌ្ឍវិស័យកីឡាការ៉ាតេ នៅកម្ពុជាឲ្យកាន់តែខ្លាំងក្លាថែមទៀត»។
លោកបន្ថែមថា៖ «ចំពោះផែនការយុទ្ធសាស្រ្ត យើងត្រូវអនុវត្តឲ្យបានសកម្មជាងមុន ដោយត្រូវពុះពារលុបបំបាត់គ្រប់ឧបសគ្គរារាំងការអភិវឌ្ឍជំនាញការ៉ាតេ និងជំរុញការអភិវឌ្ឍឆ្ពោះទៅមុខជានិច្ច ទើបយើងអាចស្វែងរកសក្តានុពលភាព និងឧត្តមភាពកីឡាការ៉ាតេបាន ព្រោះស៊ីហ្គេម នៅកម្ពុជា នៅសល់ពេលវេលាត្រឹមតែ ៣ ឆ្នាំកន្លះទៀតប៉ុណ្ណោះ។ ហេតុនេះយើងត្រូវជំរុញការហ្វឹកហាត់ឲ្យទាន់ពេលវេលាប្រកបដោយប្រសិទ្ធភាព និងគុណភាពខ្ពស់»៕