.jpg)
លោក Jordi Cruyff បានចាកចេញពីក្លិបចិន Chongqing Lifan ក្រោយពីមិនទទួលបានការបន្តកុងត្រាថ្មីសម្រាប់រដូវកាលក្រោយ។ AFP
ក្រុងស៊ាងហៃ៖ គ្រូបង្វឹកលោក Jordi Cruyff បានចាកចេញពីក្លិបចិន Chongqing Lifan ក្រោយពីមិនទទួលបានការបន្តកុងត្រាថ្មីសម្រាប់រដូវកាលក្រោយ។
គ្រូបង្វឹកវ័យ ៤៥ ឆ្នាំរូបនេះ បានដឹកនាំបានរយៈពេល ១៦ ខែ នៅក្លិបដែលលេងនៅលីកកំពូលចិនមួយនេះ ដោយជួយឲ្យពួកគេឡើងផុតពីតំបន់បាតតារាងកាលពីឆ្នាំមុនឡើងដល់ចំណាត់ថ្នាក់ទី ១០ នៅរដូវកាលនេះ។
លោក Jordi ជាអតីតគ្រូបង្វឹកនៅក្លិប Maccabi Tel Aviv នៅប្រទេស អ៊ីស្រាអែល នោះ បាននិយាយក្នុងរបាយការណ៍សំដៅទៅរកក្រុមអ្នកគាំទ្រថា៖ «ប្រសិនបើគ្មានការគាំទ្ររបស់ពួកគេទាំងនេះទេ វានឹងមិនអាចសម្រេចបានគោលដៅដែលយើងបានកំណត់នោះទេ»។
គ្រូបង្វឹករូបនេះបន្ថែមថា៖ «ខណៈខ្ញុំនឹងបញ្ចប់កុងត្រានៅក្លិប Chongqing នេះ ខ្ញុំសូមអរគុណអ្នកគាំទ្រក្លិបនេះ ចំពោះការបង្ហាញអារម្មណ៍អាណិតស្រឡាញ់ចំពោះខ្ញុំដែលធ្វើឲ្យខ្ញុំរំជួលចិត្តបំផុតទោះជាមានរបាំងភាសាយ៉ាងណាក៏ដោយ»៕ AFP/SN
