.jpg)
លោក Joachim Loew បញ្ចេញប្រតិកម្ម ក្នុងពេលក្រុមជម្រើសជាតិអាល្លឺម៉ង់ ប្រកួតជាមួយនឹងក្រុមជម្រើសជាតិបារាំង។ AFP
ក្រុងប៉ារីស: គ្រូបង្វឹកក្បាលរឹងលោក Joachim Loew បានកោតសរសើរការបង្ហាញពីទម្រង់លេងរបស់ក្រុមបាល់ទាត់ជម្រើសជាតិ អាល្លឺម៉ង់ ក្នុងពេលចាញ់ក្រុមម្ចាស់ជើងឯកពិភពលោកបារាំង ២-១ ក្នុងការប្រកួត UEFA Nations League កាលពីថ្ងៃអង្គារ ខណៈដែលោកបានរិះគន់ «ទៅលើបាល់ប៉េណាល់ទីគ្មានយុត្តិធម៌ទាំងស្រុងដែលត្រូវបានផ្តល់ទៅឲ្យក្រុមម្ចាស់ផ្ទះ។
ខ្សែប្រយុទ្ធ Antoine Griezmann បានស៊ុតបាល់បញ្ចូលទីទាំង២គ្រាប់ក្នុងតង់ទី២ ក្នុងនោះរាប់បញ្ចូលទាំងគ្រាប់បាល់ឈ្នះពីចំណុចពិន័យ១១ម៉ែត្រផងដែរ ខណៈដែលក្រុមជម្រើសជាតិបារាំង បានវាយបកពីការដេញតាមពីក្រោយគ្រាប់បាល់ប៉េណាល់ទីរបស់ខ្សែបម្រើ Toni Kroos ដើម្បីផ្តល់ការបរាជ័យជាលើកទី៦ដល់ក្រុមអាល្លឺម៉ង់ ក្នុងចំណោមការប្រកួត១០លើកចុងក្រោយរបស់ពួកគេ។
លទ្ធផលនេះ បានធ្វើឲ្យអាល្លឺម៉ង់ ធ្លាក់ចេញពីការប្រជែងដណ្តើមយកពាន Nations League និងបានធ្វើឲ្យពួកគេត្រូវការឈ្នះពេលជួបក្រុមជម្រើសជាតិហូឡង់ ក្នុងការប្រកួតចុងក្រោយរបស់ពួកគេក្នុងពូល នាថ្ងៃទី១៩ ខែវិច្ឆិកា ប្រសិនបើពួកគេចង់គេចផុតពីការធ្លាក់ចេញពីលីកកំពុល។
ខ្សែប្រយុទ្ធអន្តរជាតិបារាំង Antoine Griezmann (កណ្តាល) ទាត់បាល់ ក្នុងពេលប្រកួតជាមួយនឹងក្រុមជម្រើសជាតិអាល្លឺម៉ង់។ AFP
ទោះបីជាយ៉ាងណា លោក Loew បានបញ្ជាក់ថា លោកពិតជា «រីករាយ» ជាមួយនឹងការបង្ហាញពីទម្រង់លេងរបស់ក្រុមលោក ខណៈអាល្លឺម៉ង់ មានកម្រិតលេងល្អប្រសើរជាងមុន បើធៀបទៅនឹងក្រុមដែលចាញ់ហូឡង់ ៣-០ ក្នុងទីក្រុង Amsterdam។
លោក Loew បានឲ្យដឹងថា៖ «ខ្ញុំពិតជាខកចិត្តជាមួយនឹងលទ្ធផលនេះ បើទោះបីខ្ញុំត្រូវតែនិយាយថា ការបរាជ័យនេះ គឺមានភាពផ្ទុយគ្នាទៅនឹងការបរាជ័យកាលពីថ្ងៃសៅរ៍ក៏ដោយ។ មិនមែនដោយសារតែលទ្ធផលនេះឡើយ ប៉ុន្តែ ដោយសារតែទម្រង់លេង។ ខ្ញុំពិតជាពេញចិត្តទៅនឹងទម្រង់លេង»។
គ្រូបង្វឹករូបនេះបានបន្ថែមទៀតថា៖ «ខ្ញុំគិតថា យើងបានស្ថិតក្នុងកម្រិតស្មើគ្នាជាមួយនឹងក្រុមដ៏ខ្លាំងបំផុតក្នុងពិភពលោក។ ប៉ុន្តែ បារាំង មានកីឡាករឆ្នើមៗជាច្រើន ហើយប្រសិនបើអ្នកមិនមានការប្រុងប្រយ័ត្នទេនោះ អ្នកនឹងទទួលរងនូវទណ្ឌកម្មភ្លាមៗ»៕
