ភ្នំពេញៈ ជាមួយឧបនិស្ស័យ និងចំណង់ចំណូលចិត្តតាំងពីកុមារភាព បានធ្វើឲ្យលោក Michael Sovann (ម៉ៃឃើល សុវណ្ណ) ដែលគេស្គាល់ថា ជាអ្នកចូលចិត្តលេងកីឡាយ៉ាងសកម្ម និងជាអ្នកស្វះស្វែងរកការឧបត្ថម្ភដល់វិស័យកីឡានៅកម្ពុជា ផងនោះ បានដក់ចិត្តកាន់តែជ្រៅ លើការជួយកីឡា រហូតហ៊ានកំណត់គោលការណ៍ប្រចាំជីវិតរបស់ខ្លួនថា ត្រូវកសាងឲ្យបាននូវស្នាដៃអ្វីមួយដើម្បីឲ្យអ្នកជំនាន់ក្រោយ បានចងចាំដល់រូបលោក។
លោក Michael បាននិយាយថា៖ «អ្វីដែលខ្ញុំគិត គឺយើងគង់តែស្លាប់ទៅវិញទេ អ៊ីចឹងបើយើងមានលុយច្រើន ហើយអាចធ្វើអ្វីដែលល្អបាន យើងធ្វើទៅ! យើងគួរណាស់បន្សល់អ្វីមួយ ដែលជាស្នាដៃរបស់យើង (នៅក្នុងវិស័យកីឡា) មុនពេលយើងស្លាប់ទៅវិញ ដើម្បីឲ្យគេស្គាល់យើង និងនៅចងចាំដល់យើង»។
លោកបន្ថែមថា៖ «ឱកាសធ្វើអំពើល្អឲ្យបានច្រើន វាមានតិចណាស់ អ៊ីចឹងយើងខំធ្វើវាទៅ! បើទោះបីជាយើងមានលុយច្រើន តែចុងក្រោយពេលស្លាប់ទៅវិញ យើងក៏អត់អាចយកអ្វីទៅតាមបានដែរ គឺទៅតែខ្លួនទេ ហេតុនេះ សម្រាប់គោលការណ៍រស់នៅផ្ទាល់ខ្លួនរបស់ខ្ញុំ គឺនៅពេលដែលយើងមានជីវិត យើងជួយបានប៉ុនណា យើងធ្វើវាទៅ»។
គិតមកដល់ពេលនេះ កំលោះមានដើមកំណើតនៅខេត្តកំពង់សោម Michael ទើបតែមានអាយុ ៣៥ ឆ្នាំទេ ប៉ុន្តែបុរស ដែលជាប្រធានផ្នែកកម្មវិធីនៃក្រុមហ៊ុនខ្មែរប៊ែវើរីជីស (Khmer Beverages) រូបនេះ តែងតែមានមុខស្ទើរគ្រប់ព្រឹត្តិការណ៍កីឡាធំៗក្នុងប្រទេសកម្ពុជា ក្នុងនាមជាម្ចាស់ឧបត្ថម្ភផង និងជាអត្តពលិកផង។
លោក Michael ចូលចិត្តលេងកីឡាតាំងពីកុមារភាព ហើយបច្ចុប្បន្ន លោកនៅតែចូលរួមប្រកួតរត់ចម្ងាយ ពិសេសការប្រណាំងកង់ភ្នំ Cambodia MTB Series 2018។ បើទោះបីជា លោក មិនធ្លាប់ទទួលបានលទ្ធផលល្អ ប៉ុន្តែ Michael ជាអ្នកប្រណាំងកង់ មានគោលដៅច្បាស់លាស់ គឺ មិនបោះបង់ចោលការប្រកួតនៅពាក់កណ្តាលទីនោះទេ។ «ខ្ញុំជាអ្នកចូលចិត្តលេងកីឡាម្នាក់ តែចំពោះខ្ញុំ ការចាញ់ឈ្នះ វាមិនមែនជារឿងធំដុំទេ តែការយកឈ្នះខ្លួនឯង ទើបជារឿងសំខាន់បំផុត។ ហេតុនេះរាល់ការចូលរួមលេងកីឡា គឺខ្ញុំតាំងចិត្តធ្វើយ៉ាងម៉េច ត្រូវតែបញ្ចប់ជុំ ដែលខ្ញុំបានចុះឈ្មោះប្រណាំង អ៊ីចឹងមិនថា ខ្ញុំចាញ់គេ ឬនៅលេខរៀងទីប៉ុន្មានទេ គឺសំខាន់ខ្ញុំត្រូវតែបញ្ចប់ជុំ ដែលខ្ញុំត្រូវជិះ ដើម្បីយកឈ្នះលើខ្លួនឯង និងបញ្ចប់គោលដៅ ដែលយើងត្រូវធ្វើ»។
ជាមួយការចូលចិត្តការប្រណាំងកង់នេះ Michael តែងតែជួយជ្រោមជ្រែងនាំយកការឧបត្ថម្ភពីក្រុមហ៊ុនខ្មែរប៊ែវើរីជីស មកជួយដល់សហព័ន្ធខ្មែរកីឡាទោចក្រយាន ទាំងលើការរៀបចំការប្រកួត Cambodia MTB Series និងជួយដល់ក្រុមជម្រើសជាតិប្រណាំងកង់កម្ពុជា។
លោក Michael និយាយថា៖ «ការប្រណាំងកង់ រយៈពេល ៥ ឆ្នាំចុងក្រោយនេះ មានការរីកចម្រើនច្រើន ហើយទៅថ្ងៃខាងមុខ ខ្ញុំគិតថា កីឡាប្រណាំងកង់ នឹងមានការរីកចម្រើន កាន់តែខ្លាំង អ៊ីចឹងក្រុមហ៊ុន Khmer Beverages មានមោទនភាព ដែលយើងបានឧបត្ថម្ភដល់ក្រុមជម្រើសជាតិ ក្នុងឆ្នាំ ២០១៨ នេះ ហើយការឧបត្ថម្ភនេះ យើងក៏គ្មានផែនការណាមួយ ត្រូវបញ្ឈប់នោះដែរ»។
ក្រៅពីការជួយឧបត្ថម្ភដល់វិស័យកីឡាផ្សេងៗ នៅកម្ពុជា ក្នុងនាមជាអ្នកតំណាងឲ្យក្រុមហ៊ុន Khmer Beverages លោក Michael ទៅថ្ងៃអនាគត នឹងនៅតែជួយឧបត្ថម្ភជាលក្ខណៈឯកជនដល់វិស័យកីឡាកម្ពុជា នៅពេលណាលោកមានលទ្ធភាព។
លោកថា Michael បញ្ជាក់ថា៖ «ចំពោះខ្ញុំផ្ទាល់ គឺនៅតែបន្តជួយដល់វិស័យកីឡា បើថ្ងៃក្រោយទៅ ខ្ញុំមានលុយច្រើន ព្រោះខ្ញុំចង់លើកស្ទួយវិស័យកីឡាកម្ពុជា ឲ្យមានមុខមាត់នៅលើឆាកអន្តរជាតិ ខណៈពេលនេះ វិស័យកីឡារបស់យើងទាំងប្រណាំងកង់ រត់ប្រណាំង និងបាល់ទាត់ជាដើមកំពុងមានការរីកចម្រើន អ៊ីចឹងខ្ញុំនៅតែស្ម័គ្រចិត្តជួយដល់វិស័យកីឡា»៕