.jpg)
លោក Maurizio Sarri គ្រូបង្វឹក Chelsea បញ្ចប់ប្រតិកម្មក្នុងពេលក្រុមខ្លួនប្រកួតជាមួយ Arsenal។ AFP
ក្រុងឡុងដ៍: លោក Maurizio Sarri អ្នកចាត់ការទូទៅរបស់ក្រុម Chelsea បានរិះគន់ទៅលើភាពទន់ខ្សោយផ្នែកស្មារតីនៃកីឡាកររបស់លោក និងការខ្វះការលើកទឹកចិត្តខ្លួនឯង ក្រោយពីចាញ់ ២-០ នៅលើទឹកដីក្រុម Arsenal ក្នុងការបង្ហាញពីទម្រង់លេងដែលគ្មានភាពមុតស្រួចកាលពីថ្ងៃសៅរ៍។
ក្រុមកាំភ្លើងធំមួយនេះបានធ្វើឲ្យការប្រចែងចំណាត់ថ្នាក់កំពូលទាំង ៤ នៃក្របខ័ណ្ឌ Premier League មានលក្ខណៈបើកចំហ ខណៈគ្រាប់បាល់ក្នុងតង់ទី ១ ពីខ្សែប្រយុទ្ធ Alexandre Lacazette និងខ្សែការពារ Laurent Koscielny បានធ្វើឲ្យក្រុម Arsenal និង Manchester United ដែលបានផ្តួលក្រុម Brighton នៅថ្ងៃដដែលនោះដេញតាមពីក្រោយ Chelsea ត្រឹម ៣ ពិន្ទុក្នុងចំណាត់ថ្នាក់លេខ ៤។
លោក Sarri ដែលបានជ្រើសរើសយកការនិយាយតាមរយៈអ្នកបកប្រែម្នាក់ ក្នុងភាសាអ៊ីតាលីរបស់លោក ដើម្បីពន្យល់យ៉ាងច្បាស់ពីទំហំនៃការខកចិត្តរបស់លោកនោះបានឲ្យដឹងថា៖ «ខ្ញុំពិតជាខឹងសម្បាយ៉ាងខ្លាំង ខ្ញុំពិតជាខឹងណាស់»។
គ្រូបង្វឹករូបនេះបានបញ្ជាក់ថា៖ «យើងបានលេងជាមួយនឹងក្រុមមួយដែលមានការប្តេជ្ញាចិត្តជាងយើង ហើយខ្ញុំមិនអាចទទួលយកបានឡើយ។ អ្វីដែលពិតនោះគឺថា វាហាក់បង្ហាញថាកីឡាករទាំងនេះពិតជាលំបាកក្នុងការលើកទឹកចិត្តខ្លួនឯង»។
ទាក់ទងនឹងទម្រង់លេងនាពេលបច្ចុប្បន្នក្រុមរបស់លោក Sarri នឹងត្រូវតាមទាន់ដោយក្រុម Arsenal ឬ Man United ខណៈដែលការបរាជ័យជាលើកទី ៤ ក្នុងការប្រកួតលីក ១១ លើកបានបង្ហាញពីតម្រូវការជាចាំបាច់សម្រាប់ការចុះកុងត្រាជាមួយនឹងខ្សែប្រយុទ្ធអន្តរជាតិអាហ្សង់ទីន Gonzalo Higuain ក្នុងលក្ខខណ្ឌខ្ចីជើងពី Juventus ដែលត្រូវបានរំពឹងទុកថា នឹងបំពេញក្នុងប៉ុន្មានថ្ងៃខាងមុខនេះ។
ការធ្លាក់ចុះទម្រង់លេងនោះបានចាប់ផ្តើមជាមួយនឹងការចាញ់ ៣-១ នៅលើទឹកដីក្រុម Tottenham កាលពីខែវិច្ឆិកាហើយទម្រង់លេងរបស់ក្រុម Chelsea ពិតជាបង្ហាញពីភាពទន់ខ្សោយនៅរាត្រីនោះនាកីឡដ្ឋាន Wembley។
លោក Sarri បានប្រាប់បន្តថា៖ «យើងមានបញ្ហាស្រដៀងគ្នាមួយក្នុងការប្រកួតក្របខ័ណ្ឌលីកនៅលើទឹកដីក្រុម Tottenham។ យើងបាននិយាយយ៉ាងច្បាស់ពីការបរាជ័យនោះ និងការព្យាយាមរបស់យើងនៅពេលនោះហើយខ្ញុំបាននិយាយទៅកាន់កីឡាករ ហើយខ្ញុំបានគិតថា យើងយកឈ្នះលើបញ្ហានោះបានហើយ»។
គ្រូបង្វឹករូបនេះបានប្រាប់បន្ថែមឲ្យដឹងទៀតថា៖ «ប៉ុន្តែវាហាក់បង្ហាញថា យើងនៅតែមានបញ្ហា ហើយយើងនៅតែខ្វះនូវការលើកទឹកចិត្តខ្លួនឯងឲ្យបានគ្រប់គ្រាន់ និងរឹងមាំផ្នែកស្មារតី និងការប្តេជ្ញាចិត្តរបស់យើង»៕ IS
