.jpg)
លោក Unai Emery ដែលកំពុងរងសម្ពាធខ្លាំង ក្នុងការដឹកនាំក្រុម Arsenal។ AFP
ក្រុងឡុងដ៍៖ អតីតប្រធានក្រុម Arsenal លោក Patrick Vieira បានទទូចថា លោក Unai Emery សមតែត្រូវបានទុកពេលវេលាថែមទៀត ដើម្បីកែប្រែអនាគតថ្មីៗរបស់ក្រុមកាំភ្លើងធំ Arsenal។
លោក Emery កំពុងរងសម្ពាធកាន់តែខ្លាំងឡើង ក្រោយពីរងបរាជ័យនៅក្រៅទឹកដីរបស់ខ្លួនក្រោមថ្វីជើងរបស់ក្រុម Leicester City ២-០ កាលពីថ្ងៃសៅរ៍។ លទ្ធផលនោះ ធ្វើឲ្យក្រុម Arsenal ធ្លាក់ផុតពីកំពូលតារាងទាំង ៤ ដោយមាន ៨ ពិន្ទុ ក្រោយពេលប្រកួតបាន ១២ លើក និងបានឈ្នះតែម្ដងគត់ នៅក្នុង ៧ ប្រកួតចុងក្រោយ។
នៅពេលគេជឿជាក់ថា ចំណាត់ថ្នាក់របស់ក្លិបនេះ ស្ថិតនៅពីក្រោយលោក Emery ដែលត្រូវបានតែងតាំងជាគ្រូបង្វឹកជំនួសឲ្យលោក Arsene Wenger បន្ទាប់ពីរដូវកាលឆ្នាំ ២០១៧-២០១៨ នោះ ក្រុមអ្នកគាំទ្រក្លិប Arsenal មានការមិនសប្បាយចិត្តកាន់តែខ្លាំងឡើងដោយពួកគេបានគិតថា មានតែការផ្លាស់ប្តូរទេ ទើបអាចជួយសង្គ្រោះរដូវកាលនេះបាន។
លោក Vieira ម្ចាស់ជើងឯកក្របខ័ណ្ឌ Premier League ៣ ជំនាន់ក្នុងអាជីពដ៏អស្ចារ្យនៅក្លិប Arsenal នោះ និយាយថា ឥឡូវនេះ គឺជាពេលវេលាដែលត្រូវរួមគ្នា ក្រោមការដឹកនាំរបស់អតីតគ្រូបង្វឹកនៅក្លិប PSG រូបនេះ។
អតីតប្រធានក្រុមកាំភ្លើងធំរូបនេះ បានប្រាប់ក្រុមអ្នកកាសែត កាលពីថ្ងៃចន្ទថា៖ «ជាការពិតដែលថា ក្រុម Arsenal កំពុងឆ្លងកាត់ការលំបាកយ៉ាងខ្លាំង ប៉ុន្តែខ្ញុំមិនបានមើលការប្រកួតរបស់ពួកគេទាំងអស់នោះទេ ដូច្នេះហើយខ្ញុំមិនអាចជជែកពីការប្រកួតរបស់ពួកគេបានទេ»។
លោក Vieira បានបន្ថែមថា៖ «ពួកគេមានគ្រូបង្វឹកម្នាក់ ដែលមានសមត្ថភាព និងធ្វើការបានល្អ។ នៅពេលក្លិបមួយជួបការលំបាក វាចាំបាច់ណាស់ត្រូវរួបរួមគ្នា។ ខ្ញុំគិតថា គាត់មានបទពិសោធគ្រប់គ្រាន់ ដើម្បីជួយពួកគេឆ្លងកាត់ការលំបាកនេះ ហេតុនេះយើងត្រូវតែដើរតាមពីក្រោយគាត់ ហើយទុកពេលឱ្យគាត់ផ្លាស់ប្តូរអ្វីទាំងអស់ ព្រោះខ្ញុំមិនប្រាកដថា ការផ្លាស់ប្តូរអ្នកគ្រប់គ្រង នឹងដោះស្រាយបញ្ហានោះទេ»។
ទន្ទឹមនោះដែរ លោក Wenger ត្រូវបានគេព្រលយថា នឹងវិលទៅរកអាជីពនេះវិញជាលើកដំបូង តាំងពីចាកចេញពីកីឡដ្ឋាន Emirates របស់ក្លិប Arsenal។ បុរសវ័យ ៧០ ឆ្នាំរូបនេះបានប្រាប់ BeIN SPORTS កាលពីសប្តាហ៍មុនថា គាត់នឹងជួបពិភាក្សាជាមួយប្រធានក្លិប Bayern Munich លោក Karl-Heinz Rummenigge ជុំវិញក្តីសង្ឃឹមនៃការស្នងតំណែងរបស់លោក Niko Kovac ប៉ុន្តែបន្ទាប់មក គាត់បានបញ្ជាក់កាលពីថ្ងៃចន្ទថា គាត់មិនស្ថិតក្នុងការប្រជែងការងារនេះទេ។
លោក Vieira គ្រូបង្វឹករបស់ក្លិប Nice នៅតែសង្ឃឹមថា នឹងឃើញគ្រូបង្វឹកចាស់របស់គាត់ត្រឡប់ទៅរកអាជីពនេះវិញ ដោយនិយាយថា៖ «ខ្ញុំចង់ឃើញគាត់ត្រឡប់ទៅដឹកនាំហ្វឹកហាត់ជាថ្មីម្ដងទៀត»។
គ្រូបង្វឹករូបនេះ បាននិយាយថា៖ «Arsenal មានឆន្ទៈធំសម្រាប់បាល់ទាត់ ហើយខ្ញុំមិនដែលបានជួបគ្រូបង្វឹកណា ដែលបានចំណាយពេលច្រើនមើលបាល់ទាត់ វិភាគការប្រកួតពីក្រុមប្រជែង និងជជែកពីបាល់ទាត់ដូចជាគ្រូបង្វឹករូបនេះទេ»។
លោក Vieira បានបន្ថែមទៀតថា៖ «វាជាចំណង់ចំណូលចិត្តរបស់គាត់ ហើយវាជាជីវិតរបស់គាត់។ ដូច្នេះខ្ញុំសង្ឃឹមថា គាត់អាចរកបានក្លិបមួយផ្សេងទៀត ដើម្បីធ្វើជាគ្រូបង្វឹក បើទោះជាមិនបានធ្វើការជាមួយក្លិប Bayern Munich ក៏អាចធ្វើការនៅក្រុមផ្សេងទៀតដែរ»៕ AFP/SN
