.jpg)
លោក Xavi បានអបអរជាមួយខ្សែប្រយុទ្ធ Messi និង Neymar កាលអ្នកទាំង៣ លេងឲ្យក្រុមយក្ស Barcelona ជាមួយគ្នា។ រូបថត AFP
ទីក្រុងម៉ា្រឌីដ៖ លោក Xavi Hernandez បាននិយាយដដែលៗពីបំណងប្រាថ្នា ក្នុងការទៅធ្វើជាគ្រូបង្វឹកក្រុមចាស់របស់ខ្លួន នាពេលអនាគត គឺអ្នកមានបុណ្យ Barcelona ក្រុមលំដាប់កំពូលនៅប្រទេស អេស្ប៉ាញ ប៉ុន្តែបានអះអាងថា លោកនឹងមិនត្រឡប់ទៅជាដាច់ខាត ប្រសិនបើក្រុមប្រឹក្សាពិសេស មិនបង្កើតឲ្យមានគំនិតថ្មីៗ ក្នុងការដឹកនាំក្លិបមួយនេះ។
លោក Hernandez ដែលបច្ចុប្បន្នកំពុងដឹកនាំ Al-Sadd ជាក្រុមអាជីពនៅប្រទេស កាតា ធ្លាប់បានបដិសេធការស្នើរបស់ Barcelona កាលពីខែមករា ក្រោយក្រុមយក្សមួយនេះ បានបណ្ដេញគ្រូបង្វឹក Ernesto Valverde ហើយក្រោយមកក៏តែងតាំងលោក Quique Setien ជាអ្នកដឹកនាំថ្មី។
ក្នុងកិច្ចសម្ភាសន៍ជាមួយនឹងកាសែតនៅប្រទេស អេស្ប៉ាញ La Vanguardia ដែលចេញផ្សាយកាលពីចុងសប្ដាហ៍កន្លងទៅ គឺបានស្រង់សម្ដីរបស់លោក Xavi ដែលនិយាយថា ការទិញបានខ្សែប្រយុទ្ធឆ្នើម Neymar ត្រឡប់មកវិញ គឺជារឿងដ៏អស្ចារ្យបំផុត ហើយអតីតមិត្តរួមក្រុម គឺខ្សែការពារ Carles Puyol និងខ្សែបម្រើ Jordi Cruyff ជាមនុស្សដែលរូបគេចង់រួមការងារជាមួយបំផុត។
បច្ចុប្បន្នឃើញថា ទំនាក់ទំនងរវាងក្រុមប្រឹក្សារបស់ក្លិប Barcelona ដែលមានលោក Josep Maria Bartomeu ជាប្រធាន និងកីឡាករ នៅតែតានតឹងដដែល ដោយមានការរិះគន់ជាសាធារណៈពីសំណាក់កីឡាករឆ្នើម Lionel Messi ទៅលើលោក Eric Abidal ជាលេខាធិការបច្ចេកទេស ជុំវិញវិវាទក្រៅទីលានមួយចំនួន។
លោក Xavi ដែលជាអតីតកីឡាករល្អ ក្នុងការនាំលេងទាំងនៅក្នុងក្រុមអ្នកមានបុណ្យ និងក្រុមគោជល់អេស្ប៉ាញ បាននិយាយក្នុងកិច្ចសម្ភាស នោះថា៖ «ខ្ញុំច្បាស់ក្នុងចិត្តថាខ្ញុំចង់ត្រលប់ទៅ Barcelona ហើយខ្ញុំរំភើបណាស់ ប្រសិនបើអាចក្លាយជាការពិត។ ជាក់ស្ដែង ខ្ញុំចង់ច្រៀងចម្រៀងបទតែមួយជាមួយអ្នកគ្រប់គ្នា ព្រោះក្នុងបន្ទប់ផ្លាស់សម្លៀកបំពាក់ត្រូវតែរីករាយ ពោលគឺមិនត្រូវមានបរិយាកាសអវិជ្ជមាន ឬអាប់អួរឡើយ»។
លោក Xavi ត្រូវបានកូនក្រុមចាប់បោះឡើងលើ ពេលលោកដឹកនាំក្រុម Al-Sadd ឲ្យឈ្នះពាន Qatar Cup។ AFP
គ្រូបង្វឹកវ័យ ៤០ ឆ្នាំ រូបនេះ បាននិយាយបន្តទៀតថា៖ «គ្រប់យ៉ាងត្រូវតែប្រសើរ។ ខ្ញុំចង់ធ្វើការជាមួយមនុស្ស មកពីបរិយាកាសដែលអាចបង្កើតក្រុមខ្លាំងមួយ»។
នៅពេលសួរបន្តទៀតថា តើការរួមការងារជាមួយនឹងក្រុមប្រឹក្សារបស់ក្លិបបច្ចុប្បន្ន នឹងអាចជាឧបសគ្គដែរទេ? លោក Xavi បានឆ្លើយថា៖ «ច្បាស់ណាស់មិនមែនអ៊ឺចឹងទេ តែខ្ញុំគ្រាន់តែចង់បានភាពរីករាយពិតប្រាកដទាំងស្រុង។ ខ្ញុំមិនដឹងថា វាអាចកើតឡើងឬអត់? ខ្ញុំគ្មានបញ្ហាជាមួយអ្នកណាទាំងអស់ ហើយខ្ញុំមានទំនាក់ទំនងជាមួយ Bartomeu ធម្មតា»។
ជាមួយគ្នានេះ Xavi ក៏បានលើកឡើងផងដែរ ពីការចង់ធ្វើការជាមួយមិត្តចាស់ Puyol ដែលធ្លាប់លេងជាមួយគ្នា ក្រោមការដឹកនាំរបស់លោក Pep Guardiola និង Cruyff ដែលជាកូនប្រុសរបស់អតីតកីឡាករឆ្នើមសញ្ជាតិហូឡង់ Johan Cruyff ដោយបាននិយាយថា៖ «ខ្ញុំចង់រួមការងារជាមួយមនុស្សដែលខ្ញុំមានទំនុកចិត្ត និងមានភាពស្មោះត្រង់? ហើយអ្នកដែលយើងកំពុងនិយាយដល់នោះ គឺ Carles Puyol ដែលធ្លាប់ធ្វើជាប្រធានក្រុម Barca និងម្នាក់ទៀត គឺ Jordi Cruyff ដែលជាអ្នកជំនួញដ៏ល្អម្នាក់ ព្រមទាំងមានបទពិសោធច្រើន ជាមួយនឹងការងារជាលេខាធិការបច្ចេកទេស»។
ចុងក្រោយ លោក Xavi ដែលចំណាយពេលជាមួយក្រុម Barcelona ចន្លោះពីឆ្នាំ ១៩៩៨ ដល់ឆ្នាំ ២០១៥ ក៏បាននិយាយដល់កីឡាករ Neymar ដែលក្លិបនៅតំបន់ Catalans បានព្យាយាមទិញ តែត្រូវបានក្លិបអ្នកមាន Paris Saint-Germain នៅបារាំងបដិសេធ កាលពីរដូវក្ដៅកន្លងទៅ ដោយលោកបានប្រាប់ថា៖ «កីឡាករក្នុងក្រុមបច្ចុប្បន្ន គឺសុទ្ធតែល្អៗហើយ ហើយបើខ្ញុំទិញខ្សែប្រយុទ្ធខ្ញុំចង់បាន Neymar។ ខ្ញុំមិនដឹងថា តើគាត់នឹងទទួលយកនូវការយល់ឃើញពីសង្គមខាងក្រៅបានដែរ ឬយ៉ាងណា? ប៉ុន្តែសម្រាប់កីឡាបាល់ទាត់ ខ្ញុំមិនមានការសង្ស័យអ្វីទាំងអស់ ពោលគឺនឹងក្លាយជាការផ្ទេរដ៏អស្ចារ្យ ប្រសិនបើវាកើតឡើងមែន»៕ AFP/VN
