ភ្នំពេញៈ ប្រតិភូកីឡាល្បុក្កតោកម្ពុជា មានគ្នា ៨ នាក់ នឹងធ្វើដំណើរទៅកូរ៉េខាងត្បូង នៅព្រឹកថ្ងៃពុធនេះ ដើម្បីទៅចូលរួមប្រកួតប្រជែងលើប្រភេទក្បាច់គុន ដែលជាអត្តសញ្ញាណជាតិ ជាមួយបណ្តាប្រទេសមានក្បាច់គុនជារបស់ខ្លួនចំនួន ២១ នៅក្នុងព្រឹត្តិការណ៍កីឡាយុទ្ធសិល្ប៍អន្តរជាតិ ឆ្នាំ ២០១៨ ដែលត្រូវធ្វើពីថ្ងៃទី ២៦ ដល់ថ្ងៃទី ២៨ ខែតុលានេះ។
លោក អ៊ូ តារា អគ្គលេខាធិការសហព័ន្ធកីឡាល្បុក្កតោកម្ពុជា បានចាត់ទុកការទៅចូលរួមការប្រកួតកីឡាយុទ្ធសិល្ប៍អន្តរជាតិនេះថា ជាពេលវេលាដ៏មានតម្លៃ ដែលក្រុមល្បុក្កតោបានបង្ហាញពីអត្តសញ្ញាណក្បាច់គុនរបស់ខ្មែរ ឲ្យពិភពលោកបានឃើញ ស្របពេលដែលកម្ពុជាកំពុងដាក់ កីឡា «គុនល្បុក្កតោ» ទៅក្នុងបញ្ជីសម្បត្តិបេតិកភណ្ឌវប្បធម៌អរូបីនៃមនុស្សជាតិ។ ប៉ុន្តែព្រឹត្តិការណ៍ដ៏ធំ និងមានតម្លៃនេះ មិនត្រូវបានក្រសួងអប់រំ យុវជន និងកីឡា ដាក់នៅក្នុងប្រភេទព្រឹត្តិការណ៍ ដែលទទួលបានប្រាក់រង្វាន់ពីរដ្ឋាភិបាល ពេលឈ្នះបានមេដាយនោះទេ។
ប្រធានប្រតិភូដឹកនាំការប្រកួត លោក អ៊ូ តារា បានប្រាប់ភ្នំពេញប៉ុស្តិ៍ កាលពីថ្ងៃអង្គារថា៖ «ការចូលរួមប្រកួតកីឡាយុទ្ធសិល្ប៍អន្តរជាតិនេះ គឺកម្ពុជាយើងទទួលបានអត្តប្រយោជន៍ច្រើនណាស់ ព្រោះយើងមានឱកាសបង្ហាញនូវមរតកវប្បធម៌ផ្នែកក្បាច់គុនរបស់យើង នៅក្នុងកម្មវិធីដ៏ធំ ដែលស្ថិតក្រោមការឧបត្ថម្ភរបស់អង្គការយូណេស្កូ ហើយស្របពេលដែលកម្ពុជា បានស្នើសុំដាក់ គុនល្បុក្កតោ ទៅក្នុងបញ្ជីសម្បត្តិបេតិកភណ្ឌវប្បធម៌អរូបីនៃមនុស្សជាតិ ទៅទៀត»។
លោកបានបន្ថែមថា៖ «ខ្មែរយើងមានក្បាច់គុនជាអត្តសញ្ញាណជាតិផ្ទាល់ខ្លួន ដែលដូនតាខ្មែរបានបន្សល់ទុកឲ្យរាប់ពាន់ឆ្នាំមកហើយ ប៉ុន្តែដោយសារតែយើងមិនសូវបានចេញទៅប្រកួតនៅលើឆាកអន្តរជាតិ ទើបគេមិនសូវស្គាល់យើង អ៊ីចឹងការចូលរួមកម្មវិធីនេះ ជាឱកាសដែលយើងបានបង្ហាញឲ្យពិភពលោកបានឃើញពីអ្វីដែលយើងមាន ហើយប្រទេសចំនួន ២០ ទៀត ក៏គេបង្ហាញពីក្បាច់គុនអត្តសញ្ញាណជាតិរបស់គេដែរ តែប្រទេសដែលគ្មានក្បាច់គុន ជាអត្តសញ្ញាណ គេមិនអនុញ្ញាតឲ្យចូលរួមទេ»។
គួររំឭកថា សហព័ន្ធកីឡាល្បុក្កតោកម្ពុជា ដែលជាសមាជិករបស់សម្ព័ន្ធកីឡាយុទ្ធសិល្ប៍ពិភពលោក ច្រើនឆ្នាំមកហើយនោះ ធ្លាប់បានបញ្ជូនក្រុមល្បុក្កតោ ទៅចូលរួមការប្រកួតកីឡាយុទ្ធសិល្ប៍អន្តរជាតិនេះ បានត្រឹម ២ ដងទេ។ ការចូលរួមលើកទី ១ កាលពីឆ្នាំ ២០១៣ កម្ពុជាបានលេខ ២ ក្នុងការប្រកួតជាក្រុម ប៉ុន្តែការចូលរួមលើកទី ២ កាលឆ្នាំ ២០១៥ កម្ពុជា មិនដណ្តើមបានមេដាយទេ ហើយ ២ ឆ្នាំបន្ទាប់មកទៀត យើងបានអវត្តមាន។
លោក អ៊ូ តារា បាននិយាយថា៖ «ការចូលរួម ២ លើកកន្លងមក គឺមានភាពស្តួចស្តើង និងមិនបានពេញមុខ ដោយសារយើងមានការខ្វះខាតច្រើន ក្នុងការបញ្ជូនអត្តពលិកទៅចូលរួម ប៉ុន្តែលើកនេះឯកឧត្តមប្រធានសហព័ន្ធ (ច័ន្ទ សារុន) បានជួយជ្រោមជ្រែង ឲ្យយើងបានចូលរួមប្រកួតទាំង ៦ វិញ្ញាសាតែម្តង ដោយឯកឧត្តមបានចំណាយថវិកាផ្ទាល់ខ្លួន ៥០០០ ដុល្លារ ក្នុងការបញ្ជូនអត្តពលិក ៦ នាក់ គ្រូបង្វឹកម្នាក់ និងប្រតិភូម្នាក់ទៅចូលរួមការប្រកួតនេះ»។
អត្តពលិកទាំង ៦ នាក់ ដែលត្រូវបានបញ្ជូនទៅចូលរួមការប្រកួតកីឡាយុទ្ធសិល្ប៍ ឆ្នាំ ២០១៨ នេះ រួមមានកីឡាករ វី តារ៉ា, សយ ផាន់និច, គីម ទិត្យសុវឌ្ឍនៈ, ឌឹប ង៉ែត កីឡាការិនី យស់ សញ្ចណា និង ស៊ិន សៀវសៀន ឯគ្រូបង្វឹក គឺលោក អ៊ុង ដារិទ្ធ ហើយពួកគេត្រូវប្រកួតសម្តែង នៅលើវិញ្ញាសាឯកត្តជនប្រើដៃ ឯកត្តជនប្រើអាវុធ សមយុទ្ធគូប្រើដៃ សមយុទ្ធគូមានអាវុធ សម្តែងក្បាច់គុនចម្រុះបែបច្នៃប្រឌិត (ប្រើដៃ អាវុធ ហក់លោត) និងប្រកួតជាក្រុម។
លោក អ៊ូ តារា បានបញ្ជាក់ថា៖ «ការចេញទៅប្រកួតលើកនេះ យើងត្រៀមខ្លួនបានល្អ ហើយយើងមានរំពឹងថា នឹងទទួលបានលទ្ធផលល្អ ជាពិសេសនៅលើវិញ្ញាសាសមយុទ្ធគូនារី គូបុរស និងប្រកួតជាក្រុម ប៉ុន្តែយើងត្រូវប្រឈមដៃគូប្រកួតរបស់យើងខ្លាំងៗ ពិសេសប្រទេសធំៗ ដែលគេមានការអភិវឌ្ឍយូរឆ្នាំ ទាក់ទងនឹងក្បាច់គុនបុរាណនេះ ហើយអាកាសធាតុត្រជាក់ខ្លាំង ពី ៨ ទៅ ១២ អង្សាសេ នៅកូរ៉េ ក៏ជាកង្វល់របស់យើងផងដែរ»៕