ភ្នំពេញ៖ ប្រធានសហព័ន្ធកីឡាគុនល្បុក្កតោកម្ពុជា លោក ច័ន្ទ សារុន និង លោក វ៉ាត់ ចំរើន បានដាក់ចេញនូវអនុសាសន៍មួយចំនួន ដើម្បីឲ្យគ្រប់សមាជិកក្លិប និងសាលាគុនទាំង ៣៥ នៅទូទាំងប្រទេសកម្ពុជា បន្តអនុវត្ត ដើម្បីឆ្ពោះទៅរកជោគជ័យនៅក្នុងការប្រកួតស៊ីហ្គេមឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ ហើយតាមសកម្មភាព និងសក្តានុពលរបស់កីឡាគុនល្បុក្កតោ គឺអាចមានលទ្ធភាពខ្ពស់ក្នុងការដណ្តើមជយលាភីល្អជូនជាតិ។
លោក ច័ន្ទ សារុន បានបញ្ជាក់ក្នុងកិច្ចប្រជុំបូកសរុបការងារ និងលើកទិសដៅបន្តរបស់សហព័ន្ធកីឡាគុនល្បុក្កតោកម្ពុជា កាលពីថ្ងៃព្រហស្បតិ៍ សប្តាហ៍មុនថា៖ «យើងត្រូវពង្រឹងយន្តការច្បាប់ លក្ខន្តិកៈ បទបញ្ជាផ្ទៃក្នុង និងកែសម្រួលឲ្យមានសាមគ្គីភាពគ្នាល្អ និងក្រមសីលធម៌ ព្រោះកីឡា ត្រូវមានតម្លាភាព ក្នុងនោះគ្រូបង្វឹក និងអត្តពលិក ត្រូវគោរពតាមឋានានុក្រម និងចូលរួមហ្វឹកហាត់ឲ្យបានច្រើនក្នុងការស្វែងរកអត្តពលិកឆ្នើមមានសមត្ថភាព ដើម្បីទទួលបានលទ្ធផលល្អ»។
ចំណែកលោក វ៉ាត់ ចំរើន ជាអគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី ៣២ ឆ្នាំ ២០២៣ (CAMSOC) និងជាអនុប្រធានសហព័ន្ធកីឡាគុនល្បុក្កតោកម្ពុជាបានថ្លែងថា តាមការប្រឹងប្រែងរួមគ្នាកន្លងមកនេះ វៀតណាម ឡាវ ហ្វីលីពីន ម៉ាឡេស៊ី និងមីយ៉ាន់ម៉ា ជាដើម បានយល់ស្របចូលរួមជួយរៀបចំកីឡាគុនល្បុក្កតោ សម្រាប់ដំណើរការប្រកួតស៊ីហ្គេមលើកទី ៣២ ឆ្នាំ ២០២៣ នៅកម្ពុជា ប៉ុន្តែបច្ចុប្បន្នយើងកំពុងមានភាពលំបាកស្មុគស្មាញខ្លះ ដែលត្រូវរួមគ្នាពុះពារដោះស្រាយ និងរួមអនុវត្តធ្វើទាំងអស់គ្នា ទើបអាចសម្រេចទៅបាន។
អគ្គលេខាធិការ NOCC លោក វ៉ាត់ ចំរើន បានបញ្ជាក់ថា៖ «យើងត្រូវត្រៀមគ្រូបង្វឹក ទៅបង្រៀនគេ អំពីច្បាប់ និងបទបញ្ជានៃការប្រកួត ដើម្បីឲ្យគេចេះរបៀបបច្ចេកទេស ក្នុងការប្រកួតប្រជែងជាមួយយើង ហើយការឈ្នះ ឬចាញ់ ត្រូវតែឲ្យមានតម្លាភាព។ ហេតុនេះចាប់ពីឥឡូវនេះទៅ យើងត្រូវត្រៀមរៀបចំបទបញ្ជានៃការប្រកួតជាកម្រិតអន្តរជាតិ ហើយតាមលោក អ៊ុក សិទ្ធិជាតិ អគ្គនាយកកីឡាបានឲ្យដឹងថា នៅឆ្នាំក្រោយ នឹងស្នើសុំថវិកាឧបត្ថម្ភពីក្រសួងអប់រំ យុវជន និងកីឡា ដើម្បីរៀបចំការប្រកួតកម្រិតអាស៊ីអាគ្នេយ៍ ដើម្បីឲ្យបណ្ដាប្រទេសមួយចំនួនមកជួបជុំគ្នា នៅក្នុងប្រទេសកម្ពុជា ផ្ទាល់តែម្តង»។
ចំណែកលោក អ៊ូ តារា អគ្គលេខាធិការសហព័ន្ធកីឡាល្បុក្កតោកម្ពុជាបានឲ្យដឹងថា គិតមកដល់បច្ចុប្បន្ន កីឡាល្បុក្កតោមានសាលាគុនចំនួន ៣៥ នៅទូទាំង ១២ ខេត្ត និងរាជធានីក្នុងប្រទេសកម្ពុជា។ ជាមួយគ្នានេះ យើងបានធ្វើការជាមួយក្រសួងការពារជាតិក្នុងការបង្វឹកក្បាច់គុនល្បុក្កតោ ទៅដល់កងទ័ព គឺមានកងពលលេខ ៥១ នៃភូមិភាគ ៥ ដែលបង្វឹក និងបណ្តុះបណ្តាលបានល្អប្រសើរ។
លោកបានបន្តថា នៅលើឆាកអន្តរជាតិយើងមានកីឡាគុនល្បុក្កតោចំនួន ២០ ប្រទេស ហើយក្នុងនោះនៅសល់ប្រទេសចំនួន ៤ មិនទាន់ចេញអាជ្ញាប័ណ្ណ។ ប្រទេសចំនួន ២០ នោះមាន បារាំង អៀរឡង់ អ៊ីរ៉ង់ ម៉ារ៉ុក អ៊ីរ៉ាក់ គុយវ៉ែត អូម៉ង់ តួកគី អាហ្វហ្គានីស្ថាន អាល់ហ្ស៊េរី ទុយនេស៊ី សហរដ្ឋអាមេរិក អូស្ត្រាលី ហ្វីលីពីន ឥណ្ឌា ស្រីលង្កា ម៉ាឡេស៊ី វៀតណាម ឡាវ និងប្រទេសមីយ៉ាន់ម៉ា។ លោកបន្ថែមថា តាមផែនការ គឺចាប់ពីឆ្នាំ ២០២១ ទៅ យើងអាចនឹងបញ្ជូនគ្រូបង្វឹក ចេញទៅក្រៅប្រទេស ដើម្បីជួយប្រទេសដែលជាសមាជិក៕